I TIMOTEO 1 - Embimbiliya - Bíblia Sagrada em Umbundu

¹ Ame ndi Paulu, haime ndupostolo wa Kristu Yesu, momo oco ca handelekiwa la Suku Upopeli wetu kuenda Kristu Yesu elavoko lietu,

² ndi sonehela Timoteo omolãnge wocili vekolelo. Ocali lohenda kuenda ombembua ya tunda ku Suku Isia kuenda ku Kristu Yesu Ñala yetu yi kale love.

³ Ndeci nda ku pinga ale eci nda kala loku enda ko Makedonia, haico minga vali, siti, Kala ve Efeso oco o lungule omanu vamue okuti ka va longisa ovilongua viñi,

⁴ pamue oku sakalala lolosapo loku sinumula ovikoti viapata ka vi kuete esulilo. Momo ovina ndevi vi koka lika olonamalala, ka vi koki okupindisua ku kola ku kasi vekolelo.

⁵ Etu puãi, ocimãho cocikundi cetu ocisola ci tunda kutima u yela haiwo wa sunguluka, kuenda kekolelo halioku luvikiyako.

⁶ Vamue va sia ovina evi, kuenje va yapukila koku popia ovina viaño.

⁷ Va yongola oku linga alongisi vovihandeleko, ndaño ka va yevite eci va popia, levi va longisa ka via va lombolokele.

⁸ Etu tua kũlĩha okuti ovihandeleko viwa nda omunu o linga lavio ndeci ca sungulukila ovihandeleko.

⁹ Tua sesamela oku limbuka okuti ovihandeleko ka via sovuiluile vakuesunga, te vakuakutomba ovihandeleko, kuenda vakuemande, la vakuakutomba ovina vi kola, la vakuakandu, lava havakua Sukuko, kuenda vakuakutomba Suku, la vakuakuipa vaisiavo, lava va ipa vainavo, lolomondi,

¹⁰ la vakuokahonga, kuenda alume va lala lalume, la vakuakukuata omanu, lolohembi, la vakuakuimba uvangi hawociliko, kuenda cosi cikuavo ci nyõla ovilongua viocili

¹¹ via tunda kondaka yiwa yulamba wa Suku yesumũlũho. Ondaka yaco oyo ya ñundikiwa.

¹² Mandula Kristu Yesu Ñala yetu u wa nyiha ongusu yoku tẽlisa ocikundi eci. Momo, poku nola ha ñapi kupange waye, wa lekisa okuti wa ñolela.

¹³ Ndaño ale nda kaile ukuakupopia Suku atonãi haime ndo kangisa loku u tondala, haimo nda lingiwa ohenda momo nda ci lingila onumbi yomo sia tavele handi.

¹⁴ Oco ocali ca Ñala yetu ca supokaila, kuenje ca nyiha ekolelo lioku Kristu Yesu locisola coku u sola.

¹⁵ Ondaka eyi yokuti Kristu Yesu weyilila kilu lieve oku popela vakuakandu, ondaka yocili, haiyo ya sungulukila oku taviwa kuoha. Pokati ka vakuakandu vaco ame fu.

¹⁶ Puãi nda lingiwa ohenda, okuti vokuange, haime fu kakandu, Yesu Kristu o lekisilamo epandi liaye, ha ci lingi ndongangu kuava vo tavela omuenyo ko pui.

¹⁷ Kaliye ku Soma yonahũlũlua, haeye ka fi, haeye ka muiwa muiwa, haeye lika Suku, ku kale esumbilo lulamba toke koloneke vi enda ño-o hũ ka vi pui. Amene.

¹⁸ Amõlange, a Timoteo, hu kundika ocikundi ca soka ndovitumasuku via popia uprofeto vina via ku ilika, okuti, poku kolisiwa lolondaka viaco, o yaka uyaki uwa,

¹⁹ kuenje o kuatelela kekolelo kuenda kelungulo li tunda kutima wa sunguluka. Omo omanu vamue va likala elungulo li tunda kutima wa sunguluka oco ketavo va nyõleha ndonaviyu ya teka.

²⁰ Pokati kavo pali Humaneo la Alesandro. Nda va eca ku Satana oco va longisiwe okuti ka va popi vali Suku atonãi.