I SAMUELE 9 - Embimbiliya - Bíblia Sagrada em Umbundu

¹ Kua kala ulume, u Benjamini, onduko yaye Kisi, eye omõla a Aviele, omõla a Sirore, omõla a Bikorata, omõla a Afiya u Benjamini, eye ekope.

² Wa kala lomõla ulume, onduko yaye Saulu. Eye ukuenje wa posoka. Pokati ka va Isareli ka pa kaile u wo velapo keposo. Ndaño koku lepa eye wa lepa okuti omanu vosi va sulila kapepe aye.

³ Ca kala okuti ovimbulu via Kisi, so ya Saulu, via nyelela. Oco Kisi wa popia lomõlaye Saulu, hati, Pañinya umue pokati kakuenje oco kuendi, ka vanjiliyi ovimbulu.

⁴ Oco va pita vofeka yolomunda ye Efarimi kuenda vofeka ya Salisia puãi ka va vi sangele. Va pitavo vofeka ya Sialime puãi ka via kailemo. Noke va pita vofeka ya Benjamini lamovo ka va vi sangele.

⁵ Eci veya kofeka ya Sufe oco Saulu wa vangula lukuenje una a kala laye hati, Tuende, tu tiukile, sanga tate ka kuatela vali ovimbulu ohele, o tu kuatela etu ohele.

⁶ Ukuenje puãi wa popia laye hati, Tala, vimbo lilo muli omunu wa Suku, eye wa kemãla, cosi a popia ciya muẽle. Tuende kokuaye, sanga o tẽla oku tu lomboluila cimue cungende tu kasi loku enda.

⁷ Saulu yu wa vangula lukuenje hati, Puãi nda tu enda tu ko tualela nye? Momo volonjeke ombolo ya pua, lombanjaile yoku tualela ulume wa Suku ka kuli. Tu kuete nye?

⁸ Ukuenje wa kumbulula vali Saulu, hati, Tala, ame muẽle peka ñuete okapalata, ndi ka eca kulume wa Suku okuti o tu lekisa onjila yetu.

⁹ Ale ca kaile vo Isareli okuti eci umue a ka pula ku Suku eye o popia hati, Enju, tuende kukuavinjoinjoi momo u va tukola palo vati, Uprofeto, ale vo tukowaile ukuavinjoinjoi.

¹⁰ Oco Saulu wa popia lukuenje hati, Ciwa muẽle, tuende. Oco va enda vimbo omu mua kala ulume wa Suku.

¹¹ Osimbu va kala oku lamanela kimbo va ñualehela lafeko vamue veya oku tapa ovava. Oco va va pula vati, Ukuavinjoinjoi he, yo?

¹² Ovo vati, Yu, eye wa pitilale, ene wa siali konyima. Yayuliko, ndopo a iñila vimbo, momo etaili omanu va lumbila konumbuko.

¹³ Tuli wiñili vimbo vu u sanga osimbu ka endele handi konumbuko oku ka lia, momo omanu ka va li te eye weya, omo eye o livanga oku panduila ocilumba kuenje, kovaso yaco, oco ava va lalekiwa va lia. Kuendi ño, ndopo vu lisanga laye.

¹⁴ Oco va lamanela kimbo. Poku iñila vimbo oco va mõla Samuele yu iyilila kokuavo vonjila yokonumbuko.

¹⁵ Momo ca pita okuti hẽla, eci Saulu keyile handi oco Yehova wa situluila Samuele hati,

¹⁶ Hẽla liya, ola yilo muẽle, hu tumisa ulume ukuafeka ya Benjamini. Eye muẽle o waveka ha lingi Soma yomanu vange va Isareli. Eye o popela omanu vange peka lia va Filisiti, momo nda mõla ohali yomanu vange, lomo uteto wavo wa njevala.

¹⁷ Eci Samuele a mõla Saulu oco Yehova wo sapuila hati, Una nda ku sapuila hayu. Eye muẽle o viala omanu vange.

¹⁸ Oco Saulu weya ku Samuele pombundi hati, Sapuileko oku ku kasi onjo yukuavinjoinjoi.

¹⁹ Samuele wa kumbulula Saulu hati, Ame, ame ndukuavinjoinjoi. Livanga lomanu konumbuko, etaili o lia lame. Omẽle hu eca haico hu sapuila cosi ci vutima wove.

²⁰ Ovimbulu viove vina via nyelile konyima yoloneke vitatu ku ka vi sakalaele vali momo via molẽha. Cosi ca posoka ca va Isareli celie? Hacoveko hẽ, lepata liosi lia so?

²¹ Saulu wa kumbulula hati, Ame hẽ, siu Benjamini ko, epata li sule pokati kapata osi a va Isareli? Onjo yange hẽ, ka yi sule vepata liosi lia Benjamini? Oco hẽ, nye wa vanguila lame ndomo?

²² Oco Samuele wa enda la Saulu lukuenje waye, wa va tuala kohondo yakombe, yu wa va tumalisa komangu ya velapo, okuti olomangu viakui atatu komanu vana va lalekiwa vi sule.

²³ Oco Samuele wa vangula luteleki hati, Nena ocikepa nda kulihĩle, cina nda ci nolele siti, Ci likalele.

²⁴ Uteleki yu wa nyañula ocikalo lonepa yelombo, wa vi kapa kovaso a Saulu, kuenje Samuele hati, Tala, eci ca selekiwa ceci. Lia. Momo ca ku selekiwila toke ola ya tukuiwa okuti oco o lie kumosi lakombe. Oco Saulu wa lila pamosi la Samuele eteke liaco.

²⁵ Eci va tunda konumbuko ha va voolokela kimbo oco va yalela Saulu ula kilu lionjo kuenje wa pekela.

²⁶ Ociteketeke Samuele wa vilikiya Saulu kilu lionjo hati, Pasuka oco hu wilise vonjila. Oco Saulu wa pasuka kuenje kavali kavo, eye la Samuele, va tundila kelila.

²⁷ Eci va suñamela konele yimbo oco Samuele wa popia la Saulu hati, Sapuila ukuenje a pite ño kovaso. Eci a pita ove talama, oco hu sapuile ondaka ya Suku.