I SAMUELE 8 - Embimbiliya - Bíblia Sagrada em Umbundu

¹ Eci Samuele a kuka wa tukula omãla vaye valume ha va lingi olonganji via va Isareli.

² Nuñulu yaye, onduko yaye Yoeli, wavali, onduko yaye Aviya, ovo va kala olonganji vo Bereseva.

³ Omãla vaye valume puãi ka va endelele volonjila viaye, va pambukila olombongo, va tambola ovitukiko kuenje va pengisa esunga.

⁴ Oco akulu vosi va va Isareli vongoloka, veya ku Samuele ko Rama.

⁵ Va popia laye vati, Tala, ove wa kuka, omãla vove ka va endela volonjila viove, oco tu nolele osoma ha yi tu viala ndolofeka viosi.

⁶ Puãi ka ca sanjuisile Samuele eci va popia vati, Tu nolele osoma yi tu viala. Oco Samuele wa likutilila ku Yehova.

⁷ Yehova yu wa kumbulula Samuele hati, Yeva cosi omanu va popia love momo haveko va ku yanduluka, ame muẽle va njanduluka okuti si lingi vali Soma yavo.

⁸ Ndeci va ndingila ame tunde keteke nda vopa ke Egito toke ketali lilo, okuti oku njanduluka loku vumba olosuku vikuavo, haico va kasi oku ku linga ove.

⁹ Oco cilo, yevelela kondaka yavo. Cinene ceci, oku vu lungula loku va lekisa ovituwa viosoma yi va viala.

¹⁰ Oco Samuele wa sapula olondaka viosi via Yehova komanu vosi va kala oku pinga osoma.

¹¹ Hati, ovina osoma yu viali yi laika oku linga vievi: O tambula omãla vene valume, o va kapa vakãlu aye ha va lingi vakuakuendela kotuvalu tuaye loku pita kovaso yakãlu aye.

¹² O linolela vakesongo vovisoko viohũlũkãi ohũlũkai kuenda vakesongo vovisoko viakui atãlo. O tumĩla vamue oku lima, kuenda vamue oku ungula. O tumĩla vamue oku tunga ovimãleho viovita kuenda vamue oku tunga evi vi sukila akãlu aye.

¹³ O tambula omãla vene vakãi ha va tungi onguendu yelemba liwa, loku linga vakuakuteleka pamue vakuakutunga olombolo.

¹⁴ O tambula ovapia ene a velapo loviumbo viayuva via velapo loviumbo violiveira vina via velapo oku vi eca kakuenje vaye.

¹⁵ O tambula onepa yekui yolomema lovinyu oku vi eca ku vakesongo vaye lokakuenje vaye.

¹⁶ O tambula akuenje vene lafeko vene lolongombe viene via velapo lovimbulu viene loku vi kapa kupange waye muẽle.

¹⁷ O tambula onepa yekui yoviunda viene kuenje ene muẽle vu linga apika vaye.

¹⁸ Eteke liaco vu lisiõsũila Soma yene una wa noli ene muẽle. Yehova puãi ko kumbululi eteke liaco.

¹⁹ Omanu puãi va likala oku yevelela kondaka ya Samuele vati, Oco hacoko. Tu yongola muẽle osoma yi tu viala,

²⁰ okuti letuvo tu lisoka lolofeka viosi kuenda Soma yetu o tu viala loku pita kovaso etu loku tu yakela.

²¹ Eci Samuele a yeva olondaka viomanu oco a vi pituluila Yehova.

²² Yehova yu wa popia la Samuele hati, Yevelela kondaka yavo. Va vanjiliyila osoma. Oco Samuele wa popia lalume va Isareli hati, Kuendi vosi, omunu koliavo, omunu koliavo.