I SAMUELE 7 - Embimbiliya - Bíblia Sagrada em Umbundu

¹ Kuenje alume va Kiriyata Yeari veya, vambata ocikasia ca Yehova, va enda laco toke konjo ya Avinadave komunda, va tumbika omõlaye Eleasara kupange woku tata ocikasia ca Yehova.

² Tunde keteke ocikasia ca kapiwa vo Kiriyata Yeari pa pita osimbu ya lua mbi akui avali kalima, kuenje epata liosi lia va Isareli lia livela oku tiukila ku Yehova.

³ Oco Samuele wa popia lepata liosi lia Isareli hati, Nda ocili vu kasi loku livela lutima wene wosi oku tiukila ku Yehova, imbipo olosuku viosi via vakualofeka levi via Asitarote ho tiamisi ovitima viene ku Yehova loku u vumba eye lika. Kovaso eye u popeli povaka a va Filisiti.

⁴ Va Isareli yu va imbapo olosuku viosi via Baale levi via Asitarote kuenje va vumba lika Yehova.

⁵ Samuele wa popiavo hati, Ongololi va Isareli vosi vo Misipa kuenje ndi va likutilila ku Yehova.

⁶ Oco vongolokela vo Misipa. Va tapa ovava kuenje va a itila kovaso a Yehova. Va likandangiya okulia eteke liaco kuenje va popia vati, Tua lingila Yehova ekandu. Samuele wa linga onganji ya va Isareli ko Misipa.

⁷ Eci va Filisiti va yeva okuti va Isareli vongolokela ko Misipa oco olosungu via va Filisiti via tundila va Isareli. Eci va Isareli va ci yeva va kuatela va Filisiti usumba.

⁸ Va Isareli va livondela la Samuele vati, Ku ka liweke oku tu likutilala ku Yehova Suku yetu okuti o tu popela povaka a va Filisiti.

⁹ Kuenje Samuele wa nyañula okameme ka nyama, wa ka lumbila Yehova ocilumba coku pia elisi. Samuele wa likutilila va Isareli ku Yehova kuenje Yehova wo kumbulula.

¹⁰ Osimbu Samuele a kala oku lumba ocilumba coku pia elisi oco va Filisiti va kokela ha va yaki la va Isareli. Puãi Yehova wa popia la va Filisiti, londaka ya soka oku lemila ca va yokokisa kuenje vosi va lunduka kovaso a va Isareli.

¹¹ Alume va Isareli va tunda ko Misipa va landula va Filisiti oku va nyõla toke koku pitahãla Betekare.

¹² Oco Samuele wa nyañula ewe, wa li tumbika pokati ka Misipa la Sene, wa li luka hati, Evenese, hati, Momo toke cilo Yehova wa tu kuatisa.

¹³ Oco va Filisiti va yuliwa, ka veyile vali kofeka ya va Isareli, kuenje eka lia Yehova lia veta va Filisiti oloneke viosi via Samuele.

¹⁴ Ovaimbo osi a va Isareli, ana a kuatiwile la va Filisiti, a tiukila ku va Isareli tunde ke Ekirone toke ko Gadi. Oco va Isareli va popela ofeka yavo povaka a va Filisiti. Va Isareli la va Amori lavovo va lisokiya lombembua.

¹⁵ Samuele wa linga onganji vi Isareli oloneke viosi viomuenyo waye.

¹⁶ Kuenje ulima kulima wa ñuala vovaimbo a Betele la Giligali la Misipa oku tetuluila va Isareli vovaimbo aco osi.

¹⁷ Eci a mala va tiukila ko Tama momo oko kua kala onjo yaye, haiko wa tetuluila va Isareli lesunga. Wa tungilakovo Yehova utala.