I SAMUELE 6 - Embimbiliya - Bíblia Sagrada em Umbundu

¹ Ocikasia ca Yehova ca kala vofeka ya va Filisiti olosãi epanduvali.

² Oco va Filisiti va kovonga ovitunda la vakuakutaha, vati, Tu linga nye locikasia ca Yehova? Tu sapuili eci tu tuma laco eci tu ci tiuwiya komangu yaco.

³ Va va sapuila, vati, Nda vu tiuwiya ocikasia ca Suku ya va Isareli ko ka ci tiuwiyi upolokoso. Ci sukila muẽle oku lumbila Suku yaco ocilumba celembe lioku lueya. Kovaso yaco vu kaya, kuenda vu limbuka ndeci eka liaye ka lio tundilili.

⁴ Oco va pula vati, Ocilumba celembe lioku lueya tu a lumbila oco nye? Vati, Ovipumbu viulu vitãlo kuenda olomuku viulu vitãlo, ca soka lakulu vovaimbo atãlo a va Filisiti. Momo efengi limosi lio veti vosi imbo limbo lia vetavo akũlu vene.

⁵ Oco co sesameli oku tunga oviñumañuma viapumbu ene, loviñumañuma violomuku vi kasi oku nyõla ofeka ha weci ulamba ku Suku ya va Isareli; pamue eye u leluisili eka liaye loku li leluisilavo olosuku viene lofeka yene.

⁶ Ene vu tĩlisila nye ovitima viene ndeci va Egito la Fareo va tĩlisile ovitima viavo? Suku ya va Isareli wa va yola epembe. Kovaso yaco puãi ka va tavele hẽ oku eca va Isareli yu va tunda kofeka yaco?

⁷ Oco pongiyi ekãlu liokaliye lolomange vivali violongombe via cita ndopo haivio ka via la kapiwa okanga, vi pandekeli kekãlu, olonale viaco puãi vi siale vocimanga.

⁸ Yeluli ocikasia ca Yehova, ci kapi vekãlu. Konele yaco kapivo ocikasia cikuavo omu muendela oviñumañuma viulu, vina woku u vi lumbili ocilumba celembe lioku lueya. Ci wile vonjila, cende.

⁹ Noke lavululi ciwa. Nda cenda lonjila yokofeka yaco muẽle, okuti ko Betesemese, ca lomboloka okuti Suku yaco eye muẽle wa tu talisa ohali yaco, puãi nda hakoko cenda, ca lomboloka okuti heka liayeko lia tu veta. Ca tu sanga ño.

¹⁰ Alume vaco oco va linga. Va sanga olomange vivali violongombe ndopo via cita kuenje va vi pandekela kekãlu, olonãle viaco puãi via siala vocimanga.

¹¹ Va kapa ocikasia ca Yehova vekãlu, va kapavo ocikasia omu mua endela oviñumañuma violomuku viulu levi viovipumbu.

¹² Lolomange via suñamela muẽle vonjila yoko Betesemese, via enda loku lila. Ka via pambukilile kondio ndaño kepĩli, lolosungu via va Filisiti, via vi kuama toke via pitila kongave ya Betesemese.

¹³ Omanu va Betesemese va kala oku kelula otiliku vovimbota. Eci va vanja kuenje va mõla ocikasia covisila va yolela enene.

¹⁴ Ekãlu lia iñila vepia lia Yehosua u Betesemese, haimo lia talama. Oko kua kala ewe linene, oco va tetula avaya ekãlu, keunje olomange va vi lumbila Yehova ocilumba coku pia elisi.

¹⁵ Va Lewi vopako ocikasia ca Yehova locikasia ci kuete oviñumañuma. Va vi kapa kewe linene. Alume va Betesemese eteke liaco va timĩha insensu loku lumbila Yehova ovilumba vioku pia elisi.

¹⁶ Eci akulu vatãlo va va Filisiti va ci mõla oco va tiukila ke Ekirone eteke liaco muẽle.

¹⁷ Ovipumbu viulu, vina va Filisiti va lumbila Suku ya va Isareli ocilumba celembe lioku lueya, vievi, cimosi ca Asidode, cimosi ca Gasa, cimosi ca Asekeloni, cimosi ca Gati, cimosi ca Ekirone.

¹⁸ Lolomuku viulu laviovo via soka lovaimbo osi a va Filisiti, la-a a malehisua, la-a ka a kuete ovimbaka, hao a tiama kakulu vaco vatãlo. Lopo le etaili ewe liaco linene oko va kapele ocikasia ca Yehova lieli nduvangi vepia lia Yehosua u Betesemese.

¹⁹ Kuenje wa ipãla alume vamue va ipãla alume vamue va Betesemese momo va vanja vocikasia covisila via Yehova, wa ipãla akui epanduvali. Lomanu va lila calua momo Yehova wa nenela ekundu.

²⁰ Alume va Betesemese va pula vati, Helie o tẽla oku talama kovaso a Suku yilo yi kola? Kuenda oku tunda kokuetu enda kulie?

²¹ Oco va tuma olomunga ku va Kiriyata Yeari vati, Va Filisiti va tiuwiya ocikasi covisila via Yehova. Enjui, u ci tambuli wendi laco.