I SAMUELE 5 - Embimbiliya - Bíblia Sagrada em Umbundu

¹ Eci va Filisiti va kuata ocikasia covisila via Suku oco va cupa ke Evenese, va ci tuala ka Asidode.

² Kuenje va Filisiti va yelula ocikasia covisila via Suku, va ci tuala vonjo ya Dagoni, va ci tumbika konẽle ya Dagoni.

³ Omẽle kociteketeke, eci va Asidode va pasuka, tala, Dagoni wa kupukila posi, wa likuhapo ocipala kovaso yocikasia covisila via Yehova. Oco vo petulapo, vo tumbika vali komangu yaye.

⁴ Puãi omẽle yikuavo, eci va pasuka ociteketeke, tala haico vali, Dagoni wa kupukila posi, wa likuhapo ocipala kovaso yocikasia covisila via Yehova, lutue waye lovaka aye avali o soyoka, a kala posi pulukuki, etimba lika lia supapo.

⁵ Oco toke etaili lilo muẽle ovitunda via Dagoni kuenda vosi va iñila vonjo ya Dagoni ka va liatala volukuki luonjo ya Dagoni.

⁶ Eka lia Yehova lia veta omanu va Asidode. Wa va yokokisa, kuenje wa asa ovipumbu va Asidode lovikanjo viaco viosi.

⁷ Eci omanu va Asidode va mõla ovina ndomo vi kasi, oco va popia vati, Ocikasia ca Suku ya va Isareli ka ci ka kale letu momo eka liaye lia tu veta etu kumosi la Dagoni suku yetu.

⁸ Oco va tuma oku ongolola olosungu viosi via va Filisiti, vati, Tu linga nye locikasia ca Suku ya va Isareli? Va kumbulula vati, Ocikasia ca Suku ya va Isareli va ka ci tuale ko Gati. Oco va tualako ocikasi ca Suku ya va Isareli.

⁹ Eci va ci tualako eka lia Yehova lia veta imbo liaco kuenje kueya efengi linene, alume vosi vo vimbo lamalehe lolosekulu, va vela ovipumbu.

¹⁰ Oco va tuma ocikasia ca Suku ke Ekirone. Puãi eci ocikasia ca Suku ceya ke Ekirone oco va Ekirone va vilikiya vati, Va tu nenela ocikasia ca Suku ya va Isareli ha ci tu ipãla etu lomanu vetu.

¹¹ Oco vongolola olosungu viosi via va Filisiti, vati, Tumi kupãla ocikasia ca Suku ya va Isareli. Ci tiukile muẽle komangu yaco, okuti ka ci nyõli vali ndaño omanu vetu. Momo imbo liosi lia sakalala eci ca kãla enene. Eka lia Suku lia va veta enene.

¹² Alume ava ka va file va vela ovipumbu. Lokulitetela kuimbo liaco kua enda kilu.