I SAMUELE 4 - Embimbiliya - Bíblia Sagrada em Umbundu

¹ Ondaka ya Samuele ya yevala ku va Isareli vosi. Va Isareli va katukila va Filisiti. Ocilombo ca va Isareli ca kala ke Evenese, locilombo ca va Filisiti ca kala ka Afeke.

² Va Filisiti va lialekela va Isareli. Eci va liyaka oco va Isareli va yuliwa la va Filisiti. Va ipãliwa la va Filisiti vovita viaco va tẽla olohũlukãi vikuãla vialume.

³ Eci va Isareli veya vali kocilombo cavo oco akulu vavo va va pula vati, Suku wa tu lunduililila nye etaili kovaso a va Filisiti? Tu kopi ocikasia covisila via Yehova ci kasi ko Silo, tu ci nena kulo okuti eye o kala pokati ketu loku tu popela kongusu yovanyãli vetu.

⁴ Oco omanu va tuma ko Silo, va nena ocikasa covisila via Suku yolohoka, haeye wa tumãla kilu lia va Keruvi. Lomãla vavali va Eli, Hafeni la Finehase, va kala locikasia covisila via Suku.

⁵ Eci ocikasia covisila via Yehova ca iñila vocilombo oco va Isareli vosi va vilikiya loku ulula enene okuti ndaño ongongo ya tiula vali ocileñi caco.

⁶ Leci va Filisiti va yeva onjuvungo yaco va pula vati, Oku ulula ku kasi vocilombo ca va Isareli kua lomboloka ndati? Eci va yeva okuti ocikasia ca Yehova ceya kocilombo,

⁷ oco va Filisiti va kuata usumba vati, Olosuku via pitila kocilombo. Avoyo we! Cimue ndeci ka ca la pita letu.

⁸ Ngongo yetu we! Helie o tu popela kongusu yolosuku viaco via pama? Ovio olosuku via veta va Egito lolohali viosi eci va kala vekalasoko.

⁹ Ene a va Filisiti, kolisiko, lingi alume, sanga vu linga apika va va Isareli ndeci ovo va lingile apika vene. Lingi alume. Kolisiko oku yaka.

¹⁰ Oco va Filisiti va yaka kuenje va Isareli va yuliwa. Vosi va tilila, omunu konjo yaye, omunu konjo yaye. Ekundu liaco lia kãla enene, momo kua fa asualali va va Isareli olohũlũkai akũi atatu.

¹¹ Locikasia covisila via Suku lacovo ca kuatiwa. Lomãla vavali va Eli, Hafeni la Finehase, kavali kavo va fa.

¹² Eteke liaco umue u Benjamini wa tila kovita, weya ko Silo, uwalo waye wa toka toka, kutue waye kua kala eve.

¹³ Eci a pitila Eli wa kala konele yetapalalo, wa tumãla komangu yaye oku lavulula, momo wa kala lohele yalua yocikasa covisila. Eci ulume waco a iñila vimbo loku sapula ondaka yovita oco imbo liosi lia vilikiya loku litetela.

¹⁴ Eci Eli a yeva okulitetela kuaco oco wa pula hati, Okulitetela kuaco kue? Oco ulume waco wa yayulako, weya, wa sapuila Eli.

¹⁵ Kotembo yaco Eli wa kala lanyamo akuĩ ecea lecelãla, lovaso aye a fa okuti ka lete.

¹⁶ Oco ulume wa sapuila Eli hati, Ame nda tunda kovita, nda tila kovita etaili muẽle. Eli yu wo pula hati, Amõlange ca pita ndati?

¹⁷ U wa nena ondaka yovita wa kumbulula hati, Va Isareli va yuliwa la va Filisiti. Pokati komanu pa kalavo ekundu lia lua. Omãla vove, Hafeni la Finehase, va fa. Locikasia covisila ca kuatiwa.

¹⁸ Eci a tukula ocikasia covisila oco Eli wa kupuka ocinyimaime komangu yaye ya kala konẽle yombundi. Osingo ya teka kuenje wa fa, omo wa kuka ale kuenda etimba liaye linene. Wa kala onganji vi Isareli anyamo akui akuãla.

¹⁹ Ca kala okuti ndatembo yaye, ukãi wa Finehase, wa kala latimba avali okuti ndopo o cita. Eci a yeva okuti ocikasia covisila ca kuatiwa kuenda ndatembo yaye la veyaye vosi va fa oco wa petamako kuenje wa kutuluka momo olongembia vio sanga.

²⁰ Eci a si oku fa akãi vo halisa vati, Ku ka yokoke momo wa cita omõla ulume. Puãi ka yeveleko kuenje ka kumbuluile.

²¹ Omo ocikasia covisila via Suku ca kuatiwa kuenda ndatembo yaye la veyaye va fa oco wa luka omõlaco Ikabode, hati, Ulamba wa va Isareli wa va tunda.

²² Wa popia hati, Ulamba ku va Isareli wa tundako omo ocikasia covisila via Suku ca kuatiwa.