I SAMUELE 30 - Embimbiliya - Bíblia Sagrada em Umbundu

¹ Eci Daviti lalume vaye veya ko Cikilage eteke liatatu va sanga okuti va Amaleke va katukila ofeka yoko Sul kuenda Cikilage. Va yula Cikilage kuenje va li yoka.

² Va kuata akãi la vosi va kalamo, lava vanene lava vatito. Ka va ipayele umue puãi va vambata, va enda lavo.

³ Eci Daviti lalume vaye va pitila vimbo va li sanga lia pia, va sangavo okuti akãi lomãla valume lomãla vakãi vambatiwa, va linga apika.

⁴ Oco Daviti lomanu va kala laye va kaluka loku lila, va lila toke olondaka via lala.

⁵ Akãi vavali va Daviti okuti Ahinoame u Yesirele, kuenda Avigaile, ocimbumba ca Nabala u Karimele, lavovo vambatiwa.

⁶ Daviti wa sakalala cimue vutima momo omanu vo simila oku u sosola lovawe; omo omanu vosi va nyumãla vovitima, omunu omunu wa nyumalela omala vaye valume lomãla vaye vakãi. Daviti puãi wa likolisa vutima poku imba ovaso ku Yehova Suku yaye.

⁷ Daviti wa popia locitunda Aviyatare, omõla a Ahimeleke, hati, Nenele efonde. Oco Aviyatare wa nenela Daviti efonde.

⁸ Daviti yu wa pula Yehova hati, Ndandula olohoka viaco ale? Ndi vi sanga ale? Wo kumbulula hati, Landula muẽle. Ocili o vi sanga kuenda o ka popela.

⁹ Oco Daviti wa tunda kumosi lovita epandu vialume via kala laye. Va pitila kokalui Besore oko kua tumala ava va siala konyima.

¹⁰ Daviti puãi wamako oku va landula, eye kuenda ovita vikuãla vialume. Alume ovita vivali via siala konyima. Ovo va fa ovipepe kuenje ka va tẽlele oku yoka okalui Besore.

¹¹ Vepia limue va sanga umue u Egito. Vo nena ku Daviti. Vo wiha ombolo kuenje via lia. Vo wihavo ovava oku nyua.

¹² Vo wiha ocinyanyu cekende liakuyu kuenda ovisiakata vivali viayuva a kukuta. Eci a lia oco wa kuata vali ongusu omo ovotanya atatu lovoteke atatu ka lile ombolo ndaño oku nyua ovava.

¹³ Daviti yu wo pula hati, Wa tunda pi? Wa tiama kulie? Eye hati, Ame ndu Egito ndukuenje wumue u Amaleke. Konyima yoloneke vitatu nda velele kuenje cime cange wa ngu sia.

¹⁴ Tua punda ale ofeka ya va Kereti yi kasi ko Sul leyi ya Yuda leyi ya Kalembe. Cikilage tua li yoka.

¹⁵ Oco Daviti wo pula hati, O tava oku songuila kohoka yaco ale? Eye hati, Lisila la Suku okuti ku njipaya pamue oku ngeca povaka a cime cange kuenje hu songuila kohoka yaco.

¹⁶ Eci wo songuilako oco vava, va lisandola kuosi vofeka. Va kala loku lia loku nyua loku cĩla omo olohute via pundiwa ku wa Filisiti kuenda kofeka ya Yuda vialua.

¹⁷ Daviti wa va kundula tunde koñolosi yeteke eli toke koñolosi yeteke likuavo. Lulume umosi ka pulukile te ovita vikuãla viakuenje va wila kolongamelo kuenje va tila.

¹⁸ Daviti wa tambula vali cosi cambatiwile la va Amaleke. Daviti wa popelavo akãi vaye vavali.

¹⁹ Lacimue ca kambapo, ndaño cinene ndaño citito, ndaño omãla valume ndaño omãla vakãi, ndaño ohute pamue cosi ño cambatiwile. Daviti wa popela cosi.

²⁰ Daviti wa popelavo oviunda violomeme loviunda violongombe. Lomanu va vi senga kovaso aye, vati, Evi ovio olohute via Daviti.

²¹ Oco Daviti weya kalume vana ovita vivali va file ipepe okuti ka va tẽlele oku kuama Daviti kuenje va sula kokalui Besore. Va tunda oku ñualẽhela la Daviti lomanu va kala laye. Eci Daviti a kokela komanu vaco oco wa va lama.

²² Pokati kalume vaile la Daviti kua kala vakuotima uvi kuenda usesiame kuenje ovo vosi va popia vati, Omo ka va endele letu ka tu va iha cimue kolohute evi tua ka pundile, te lika okuti ulume lulume o tẽla oku tambula ukãi waye lomala vaye ha endi lavo.

²³ Daviti puãi wa popia hati, A vamanjange, oco hacoko vu linga leci Yehova a tuiha. Yehova wa tu popela kuenda vali wa eca peka lietu ohoka ya tu katukilile.

²⁴ Kombangulo yaco yene helie o yevako? Momo ndeci ci tambula u wa endele kocilunga haico ci tambula u wa siale loku tata ovikuata; poku liamuĩla va lisoke.

²⁵ Kuenje tunde keteke liaco ondaka yaco eye wa yi kolisa kuenje ya linga ocihandeleko ca va Isareli toke ketaili lilo.

²⁶ Eci Daviti eya ko Cikilage oco wa tuma kakamba vaye akulu va va Yuda olohute vimue hati, Ombanjaile yoyo ya tunda kolohute via tambuiwa kovanyali va Yehova.

²⁷ Vimue via enda ku va Betele la va Ramote vo Sul kuenda ku wa Gatira,

²⁸ vimue ku va Aroere la va Sifimote la va Esitemoa.

²⁹ Vimue ku wa Rakala kuenda ku vakuavaimbo a va Yirahimeli, la vakuavaimbo a va Keni.

³⁰ Vimue ku va Horima, la va Borasiane kuenda va Ataka.

³¹ Vikuavo ku va Hevirone kuenda kuosi kua ñuala ñuala Daviti lalume vaye.