I SAMUELE 3 - Embimbiliya - Bíblia Sagrada em Umbundu

¹ Oco ukuenje Samuele wa vumba vumba Yehova kovaso a Eli. Oloneke viaco ondaka ya Suku ya pepa calua komanu, ovinjoinjoi ka via siatele.

² Kotembo yaco Eli wa pekela vohondo yaye, ovaso aye a vuvala okuti ka lete ciwa.

³ Ovela ya Suku ka ya imile handi. Samuele wa pekela omu mua kala ocikasia ci kola ca Suku vonembele ya Yehova.

⁴ Kuenje Yehova wa kovonga Samuele hati, A Samuele, a Samuele. Samuele hati, Ame ulo.

⁵ Kuenje wa lupukila ku Eli, hati, Ame ulo momo wa ñovonga. Eli hati, Sia ku kovongele, kuende ka pekele. Oco wa ka pekela.

⁶ Yehova wa kovonga vali Samuele. Oco Samuele wa pasuka vali, wa enda ku Eli, hati, Ame ulo momo wa ñovonga. Eli puãi hati, Sia ku kovongele amõlange, pekela vali.

⁷ Samuele handi ka kũlĩhile Yehova. Londaka ya Yehova ka ya situluiwile handi kokuaye.

⁸ Kuenje Yehova wa kovonga vali Samuele onjanja yatatu. Oco wa pasuka, wa enda ku Eli hati, Ame ulo, wa ñovonga muẽle. Oco Eli wa limbuka okuti Yehova eye wa kovonga ukuenje.

⁹ Oco Eli wa popia la Samuele hati, Kuende, ka pekele, nda o ku kovonga vali, ove kumbulula, huti, A Yehova, popia ño. Ukuenje wove o yevite. Oco Samuele wa ka pekela vohondo yaye.

¹⁰ Kuenje Yehova weya vali, wa talama, wa kovonga vali ndolonjanja vikuavo hati, A Samuele, a Samuele. Samuele yu wa kumbulula hati, Popia ño. Ukuenje wove o yevite.

¹¹ Oco Yehova hati, Tala, ndopo ndinga cimue vi Isareli okuti ovatui a vosi va ci yeva, kavali kao, a luluma.

¹² Eteke liaco ndi lemuluila Eli cosi nda tukuila epata liaye tunde kefetikilo toke kesulilo.

¹³ Ndu sapuila siti, Njambula hũ epata liove. Ndi li yambuila olohole viosi wa vi kũlĩha, momo omãla vove va pembula Suku, ove puãi kua va lemelele.

¹⁴ Oco ndi lisila ocisila lepata lia Eli okuti olohole viepata lia Eli ka va imũiwa vali, ci kale locilumba coku yoka, ci kale lovilumba vikuavo.

¹⁵ Samuele wa kala ño toke omele. Oco wa yulula apito onjo ya Suku. Samuele wa kala lohele yoku lomboluila Eli ocinjoinjoi caye.

¹⁶ Puãi Eli wa kovonga Samuele hati, Amõlange, a Samuele. Yu hati, Ame ulo.

¹⁷ Oco Eli wo pula hati, Eci a ku sapuila oco nye? Ku ka ci ndimbike. Nda o ndimbika ndaño cimosi pokati kovina viosi a ku sapuila Suku a ku ci vete ove muẽle loku yolako vali.

¹⁸ Samuele yu wo sapuila cosi, ko limbikile cimue. Kuenje Eli hati, Eye muẽle Yehova. A linge eci co sungulukila.

¹⁹ Samuele wa kula, kuenje Yehova wa kala laye, ka tavele okuti olondaka viaye vi enda posi.

²⁰ Kuenje va Isareli vosi, tunde ko Dani toke ko Bereseva, va limbuka okuti Samuele wa noliwa muẽle oku linga uprofeto wa Yehova.

²¹ Oco Yehova wa tukulukila vali vo Silo, omo vo Silo haimo a lisituluila ku Samuele londaka yaye.