I SAMUELE 29 - Embimbiliya - Bíblia Sagrada em Umbundu

¹ Va Filisiti vongoluila olohoka viavo vo Afeke. Va Isareli va tunga ocilombo ocipepi letumu li kasi vo Yerusalãi.

² Osimbu olosoma via va Filisiti via pita lolohoka viavo viocita ocita kuenda viohũlũkãi ohũlukãi oco Daviti lalume vaye kumosi la Akisi va kuama konyima yolohoka.

³ Vakesongo vati, Va Isareli ava nga va linga nye kulo? Oco Akisi wa kumbulula vakesongo va va Filisiti hati, U nga ha Daviti ko, ukuenje wa Saulu, Soma ya Isareli, una o kasi lame otuneke ndaño otuanyamo kuenje apa ñasilili laye toke etaili sia lo muĩla eko limue?

⁴ Puãi va kesongo va va Filisiti vo temẽla. Va kesongo va va Filisiti va popia laye vati, Tiula ulume waco okuti o tiukila kocitumãlo wo wiha, ka endi letu koku yaka sanga poku yaka o tu ñualelapo. Momo ulume waco o linala ndati la cime caye nda halovitueko vialume valo?

⁵ U hẽ, heyeko Daviti una va likumbolola pokati loku imba loku cĩla, vati, Saulu wa ipaya olohulukãi viaye. Daviti wa ipaya olohuluwa viaye.

⁶ Oco Akisi wa kovonga Daviti, wa popia laye hati, Ndeci Yehova o kasi lomuenyo, ove ukuacili kuenje kokuange ca sunguluka nda wenda lame kocilunga, momo sia la sanga cimue ca penga kokuove tunde keteke weya kokuange toke ketaili lilo. Haimo lumue olosoma ka via ku kolelele.

⁷ Oco tiukila, kuende lombembua okuti ku temisa olosoma via va Filisiti.

⁸ Daviti yu wa popia la Akisi hati, Nda linga nye? Wa sanga nye kukuenje wove tunde keteke nda iñila vupange wove toke cilo okuti si tẽla oku enda oku liyaka lovanyãli va cime cange?

⁹ Akisi wa kumbulula Daviti hati, Ndi ci okuti kokuange ove wa pua eko ndungelo wa Suku. Haimo lumue vakesongo va va Filisiti vati, Ka endi letu kocilunga.

¹⁰ Oco, pasuka ociteketeke, ove lakuenje va cime cove vana veya love. Limeleha. Tuli posi pa yela wila vonjila.

¹¹ Oco Daviti lalume vaye va limeleha. Ociteketeke va wila vonjila yoku tiukila kofeka ya va Filisiti. Va Filisiti puãi va enda ko Yesirele.