I SAMUELE 28 - Embimbiliya - Bíblia Sagrada em Umbundu

¹ Oloneke viaco va Filisiti va konga olohoka ha va yaki la va Isareli. Oco Akisi wa popia la Daviti hati, Cu ku lomboloke okuti love muẽle lalume vove wendi lame koku yaka.

² Daviti wa kumbulula Akisi hati, Ci tava. Love o limbuka eci ukuenje wove o tẽla oku linga. Akisi hati, Oco muẽle, kuenje ove o linga ombetateli yange omuenyo wove wosi.

³ Cilo Samuele wa fa ale. Kuenje va Isareli vosi vo lila, vo kenda vo Rama, vimbo liavo muẽle. Saulu vofeka wa tundisamo ale vakuakutaha la vakuakupilula.

⁴ Va Filisiti vongoloka, veya, va tunga ocilombo vo Siuneme. Saulu wongolola va Isareli vosi, ovo va tunga ocilombo vo Giliboa.

⁵ Eci Saulu a mõla ovita via va Filisiti wa kala lusumba, utima wa luluma.

⁶ Leci Saulu a pula ku Suku, Suku ko kumbuluile, ndaño lolonjoi, ndaño la Urimi ndaño luprofeto.

⁷ Oco Saulu wa tuma akuenje vaye hati, Ka mbanjiliyili ukãi ukuakupilula oco ngende kokuaye ho pule. Akuenje vaye vo sapuila vati, A kuku, ke Endore kuli muẽle ukãi ukuakupilula.

⁸ Oco Saulu wa liviaviaya, wa wala uwalo wiñi, kuenje wa enda kumosi lalume vavali, uteke veya kukãi waco. Saulu hati, Naheleko, nenele u hu tukuila.

⁹ Ukãi wa popia laye hati, Ka ku pumbi okuti ove wa kũlĩha eci ca linga Saulu, ndomo a tundisa vofeka vakuakutaha la vakuakupilula. Oco hẽ, nye o tela omuenyo wange onjanjo okuti ndi fa?

¹⁰ Saulu puãi wa lisinga laye vonduko ya Yehova hati, Ndeci Yehova o kasi lomuenyo ku yambuiwila ocina eci.

¹¹ Ukãi yu wa pula hati, Helie hu pinduila? Eye hati, Minduile Samuele.

¹² Eci ukãi wa mõla Samuele oco wa liyula londaka yalua, wa popia la Saulu hati, Nye wa ndimbikila? Siti ove Saulu.

¹³ Soma yu wo sapuila hati, Ku ka yokoke. O lete nye? O lete nye? Ukãi wa sapuila Saulu hati, Ndete okusu yimue yi tunda posi.

¹⁴ Saulu wo pula hati, Wa tuwa ndati? eye hati, U wa pinduka ekongo, wa lisikĩlila lonanga. Oco Saulu wa limbuka okuti Samuele muẽle, kuenje wa wila posi, wa fendela.

¹⁵ Samuele wa pula Saulu hati, Nye wa nduahalisila loku mindula? Saulu hati, Nda sakalala enene. Va Filisiti va ñatukila. Suku wa njanduluka, ka ñumbulula vali ndaño lovaprofeto ndaño lolonjoi. Oco nda ku kovonga siti, Eye o sapuila eci ndinga.

¹⁶ Samuele yu wa pula hati, Nda Suku wa ku yanduluka loku linga unyali wove nye o mulila ame?

¹⁷ Suku wa ku linga ndeci a popele lame. Momo Suku wa ku nyeha uviali, wo weca kukuẽle Daviti.

¹⁸ Momo ove kua pokuile kondaka ya Yehova, kua lekisile Amaleke onyeño yaye ndeci a ku sapuila. Oco Yehova a ku muisila eci o kasi laco etaili.

¹⁹ Kuenda vali, Yehova ecavo Isareli, o ku ecavo ove, povaka a va Filisiti. Hẽla muẽle ove lomãla vove vu kala lame. Yehova ecavo olohoka via va Isareli povaka a va Filisiti.

²⁰ Saulu yu wa wila posi, wa kala lusumba wa lua omo olondaka via Samuele vio lingisa usumba. Ongusu yo pua omo lutanya luteke ka lile.

²¹ Ukãi weya ku Saulu. Eci a mõla ndomo a sakalala oco wa popia laye, hati, Ota, omõlove wa ku yeva. Loku ambata omuenyo peka eci wa popia nda yevako.

²² Cilo, eci omõlove o popia love vo yevako. Tava okuti huiha okambolo. Ka lia oco o kale longusu eci o wila vonjila.

²³ Eye wa likala hati, Si li. Akuenje vaye puãi kumosi lukãi vo peya peya kuenje eye wa yeva kondaka yavo. Yu wa votoka, wa tumãla pula.

²⁴ Ukãi wa kala lonale ya neta vocunda. Oco wa yipaya lonjanga. Wa nyañulavo okasema, wa ka kosa kuenje wa tunga lako ombolo ka yi kuete etumbisa.

²⁵ Wa vi nena ku Saulu lakuenje vaye kuenje va lia. Noke uteke waco haiwo va votoka oku enda.