I SAMUELE 27 - Embimbiliya - Bíblia Sagrada em Umbundu

¹ Daviti wa likunda lutima waye, hati, eteke limue ndaika oku taka muẽle peka lia Saulu. Kokuange ca mbelelapo oku tilila kofeka ya va Filisiti, oco Saulu ka simi vali oku mbanjiliyila vofeka ya va Isareli, kuenje muluka muẽle peka liaye.

² Oco Daviti wa katuka, wa enda ku Akisi, omõla a Maoki, osoma ya va Gati, wa enda kumosi lalume vana ovita epandu va kala laye.

³ Daviti yu wa sikila ku Akisi ko Gati, eye lalume vaye, vosi yavo va iluka lolonjo viavo. Daviti wa kala lakãi vaye vavali, Ahinoama u Yesirele, la Avigaile u Karimele, ukãi wa Nabala.

⁴ Eci va sapuila Saulu okuti Daviti wa tilila ko Gati oco ko sandiliyile vali.

⁵ Kovaso Daviti wa popia la Akisi hati, Nda wa sanjukila okuiya kuange, nyihe ocitumãlo vocikanjo cimue cove okuti ñalamo. Ukuenje wove nye a tungila love vombala?

⁶ Oco eteke liaco Akisi wo wiha imbo lia Cikilage. Oco toke ketaili lilo Cikilage lia tiama kolosoma via Yuda.

⁷ Kuenje otembo Daviti a kala vofeka ya va Filisiti ya soka ulima kolosai vikuãla.

⁸ Daviti lalume vaye va enda, va punda va Gesiuri la va Girisi kuenda va Amaleke; momo tunde kosimbu ovo muẽle va kala olonungi vofeka, toke ko Siuri vonjila yoku enda ke Egito.

⁹ Daviti wa kundula ofeka, ka sile omunu lomuenyo, ndaño ukãi ndaño ulume, olomeme puãi lolongombe lovimbulu kuenda olongamelo luwalo wa vi ambata, weyaiya ku Akisi.

¹⁰ Eci Akisi wo pula pula hati, Helie wa punda etaili? Daviti wa kumbolola hati, Tua punda vofeka yi kasi ko Sul ya Yuda, pamue hati, Tua punda vofeka yi kasi ko Sul ya va Gerameli, pamue hati, Tua punda vofeka yi kasi ko Sul ya va Keni.

¹¹ Kuenje Daviti ka supisilepo omunu, ndaño ulume ndaño ukãi, okuti o tẽla oku sapula ondaka yaco vo Gati. Wa sokolola hati, Sanga va sapula eci tu kasi loku linga, vati, Daviti wa ci linga. Oco a lingaile otembo yosi a kala vofeka ya va Filisiti.

¹² Akisi yu wa kolela Daviti. Wa sima hati, Omo ovilinga viaye vĩvi, oco omanu vaye va Isareli vo suvuka ocili. Oco o kala ño-o ukuenje wange.