I SAMUELE 26 - Embimbiliya - Bíblia Sagrada em Umbundu

¹ Va Sife veya ku Saulu ko Givea vati, Daviti nga ka salamele vomunda Hakila yi kasi konele yutundilo ya Yesimone?

² Oco Saulu wa katuka, wa lokila kekalasoko lia Sife. Wa enda lolohulukãi vitatu vialume va noliwa wa Isareli ha sandi Daviti vekalasoko lia Sife.

³ Saulu yu wa tunga ocilombo vomunda Hakila yi kasi ocipepi lonjila yi kasi konele yutundilo ya Yesimone. Daviti puãi wa siala vekalasoko. Eci Daviti a yeva okuti Saulu wo vanjiliya vekalasoko,

⁴ oco wa tuma vakuakuendiliya kuenje wa yeva ocili okuti Saulu weya muẽle.

⁵ Oco Daviti wa katuka, weya kocilombo ca Saulu, Daviti wa mõla apa pa pekela Saulu kuenda Avinere, omõla a Nere, kesongo liovita viaye. Saulu wa pekela vokati kocilombo, lasualali vo ñuala.

⁶ Daviti wa pula Ahimeleke u Hiti, kuenda Avisiai, omõla a Ceruya, hati, Helie enda lame kocilombo ca Saulu?

⁷ Avisiai wa kumbulula hati, Ame ngenda love. Oco Daviti la Avisiai va enda kocilombo uteke, Saulu wa pekela vokati kocilombo, onjelia yaye ya sembikua posi kovitue viaye. Avinere lasualali vo ñuala va pekela.

⁸ Avisiai wa popia la Daviti hati, Suku wa eca unyali wove peka liove etaili. Oco cilo, tava okuti ndu tomẽla posi lonjelia onjanja yimosi, siu tomi luvali.

⁹ Daviti puãi wa popia la Avisiai hati, Ku ko wipaye. Helie o tẽla oku oluila eka liaye ombuavekua ya Yehova loku pua eko?

¹⁰ Daviti hati, Ndeci Yehova o kasi lomuenyo, Yehova eye u veta, pamue eteke liaye lioku fa liya, pamue o fila vocilunga.

¹¹ Yehova a ñuatise okuti si oluila eka liange ombuavekua ya Yehova. Puãi yelula onjelia yi kasi kovitue viaye kuenda esanga liovava. Tuende.

¹² Oco Daviti wa nyañula onjelia lesanga liovava via kala kovitue via Saulu kuenje va tundako. Lomue wa ci mõla. Lomue va pekela omo otulo tua kãla tua Yehova tua va wila.

¹³ Daviti wa enda konele yikuavo, wa talama kilu liomunda yimue ya kala kupãla. Pokati kavo pa kala ocivanja cinene.

¹⁴ Daviti wa vilikiya asualali kuenda Avinere, omõla a Nere, hati, A Avinere, ku kumbulula? Avinere wa kumbulula hati, Ove elie o vilikiya osoma?

¹⁵ Daviti wa kumbulula Avinere hati, Ove nga kumunuko? Helie wa lisoka love vo Israeli? Oco nye kua tatelele cime cove osoma? Omo kueyile umue oku nyõla osoma, cime cove.

¹⁶ Eci wa linga kaciwako. Ndeci Yehova o kasi lomuenyo, ove o sesamẽla oku fa momo kua tatele cime cove ombuavekua ya Yehova. Kaliye, vanja apa pali onjelia yosoma lesango liovava vina via kaile kovitue via Soma.

¹⁷ Saulu wa limbuku ondaka ya Daviti kuenje hati, Amõlange Daviti, ondaka oyo yove ale? Daviti hati, A cime cange, a Kuku, ondaka yange muẽle.

¹⁸ Hativo, Cime cange nye o sandela ukuenje waye? nda linga nye? Eko lie li kasi povaka ange?

¹⁹ Cilo, a cime cange, a Soma, va yeve olondaka viukuenje wove. Nda ca kala Yehova wa ku sanumuila ame eye a tambule ocilumba. Puãi nda omanu va ci linga va siñaliwe kovaso a Yehova. Omo etaili va ndupuisa okuti si tambula onepa yocipiñalo ca Yehova, vati, Kuende, ka vumbe olosuku vikuavo.

²⁰ Oco osonde yange ka yi ka pesekele posi kupãla la Yehova, momo Soma ya va Isareli wa tundila oku sanda omuenyo wange ndeci va sanda sanda onguali volomunda.

²¹ Saulu yu wa popia hati, Nda lueya. Amõlange Daviti, tiuka omo siu ku lingi vali cĩvi. Momo etaili omuenyo wange u kola kovaso ove. Ocili muẽle nda linga uveke. Nda lueya calua.

²² Daviti wa kumbulula hati, Onjelia haiyi, a Soma. Umue ukuenje wove eye, a yupe.

²³ Yehova eca komunu omunu onima yesunga liaye locili caye. Momo etaili Yehova wa ku ecele peka liange. Kuenje ame sia tavele oku olũila eka liange ombuavekua ya Yehova.

²⁴ Kuenda vali, ndeci omuenyo wove u kola kovaso ange etaili haico omuenyo wange u kole kovaso a Yehova. Eye a mopele kolohali viange viosi.

²⁵ Oco Saulu wa popia la Daviti hati, Amõlange Daviti, Suku a ku sumuluĩse. Ove o linga ovina vialua kuenje viosi vi pita ciwa. Oco Daviti wa enda kuenje Saulu wa tiukila konjo yaye.