I SAMUELE 25 - Embimbiliya - Bíblia Sagrada em Umbundu

¹ Samuele yu wa fa. Va Isareli vosi vongoloka ha vo lili. Kuenje vo kenda vonjo yaye muẽle vo Rama. Oco Daviti wa katuka, wa lokila kekalasoko lia Parane.

² Vo Maona mua kala ulume, oviunda viaye a fuka via kala vo Karimele. Ulume waco ohuasi, wa kala lolohũlũkai vitatu violomeme kuenda ohulukãi yimosi yolohombo. Eye wa kala loku pemula olomeme viaye vo Karimele.

³ Ulume waco, onduko yaye Nabala, ukãi waye onduko yaye Avigaile. Ukãi waco eye wa lunguka haeye wa posoka, ulume puãi wa tatama, haeye wa tangeleka. Eye ukuepata lia Kalembe.

⁴ Vekalasoko omo Daviti a yevela okuti Nabala wa kala loku pemula olomeme viaye.

⁵ Oco Daviti wa tuma akuenje ekui. Daviti wa sapuila akuenje hati, Kuendi ko Karimele ku Nabala, ko tualeli ocilamo cange.

⁶ Oku u lama vu ko lama ndomo, hoti, kala lombembua. Epata liove li kale lombembua. Cosi o kuete ci kale lombembua.

⁷ Nda yeva okuti o kasi la vakuakupemula. Cilo ci kasi okuti angombo vove va kala letu, letu ka tua va lingile cimue cĩvi, ka va nyelisile cimue osimbu yosi va kala vo Karimele.

⁸ Pula ove muẽle akuenje vove kuenje va ku sapuila. Oco omo tueya eteke liofesta sanjukila akuenje vange. Ndinge ohenda, cosi wa sokiya ci tepisila akuenje vove lomõlove Daviti.

⁹ Eci akuenje va Daviti veya oco cosi eci va ci sapuila Nabala vonduko ya Daviti. Kovaso yoku sapula oco va talamẽla.

¹⁰ Nabala wa kumbulula akuenje va Daviti hati, Daviti nga helie? Omõla a Jese nga helie? Oloneke vilo kuli akuenje valua va kasi loku tila vacime cavo.

¹¹ Ame nga nyañula olombolo lovava lositu vina nda pongiyila vakuakupemula vange si vi eci kakuenje sia kulihile oko va tunda?

¹² Oco akuenje va Daviti va ñualapo, va tiukila kokuaye, kuenje vo sapuila cosi.

¹³ Daviti vu wa popia lalume vaye hati, Omunu lomunu a limalehise osipata yaye. Oco vosi yavo, omunu omunu, wa limalehisa osipata yaye. Daviti layevo wa limalehisa osipata yaye. Oco ovita vikuãla vialume via enda la Daviti, ovita vivali via siala oku tata ovikuata.

¹⁴ Puãi umue pokati kakuenje vavo wa sapuila Avigaile, ukãi wa Nabala, hati, Ota, Daviti wa tuma olomunga, via tunda kekalasoko, vieya oku lama cime cetu kuenje cime cetu wa vi kelohaila.

¹⁵ Puãi alume vaco va kala letu ciwa, ka va tu lingile cimue cĩvi, ka tua nyelisile cimue eci ovo va kala vovisenge otembo yosi tua kala lavo.

¹⁶ Va tu vindikiya ndocimbaka lutanya luteke otembo yosi tua kala lavo oku tata olomeme.

¹⁷ Oco ciwa nda ove o ci lumbuka. Sokolola ciwa ndomo o linga. Momo va kasi loku pongiyila cime cetu lonjo yaye yosi uvi, cime cetu puãi wa tatama enene okuti oku vangula laye ka ci tava.

¹⁸ Oco Avigaile wa yayulako. Wa sokiya ovita vivali violombolo, lovipa vivali viovinyu kuenda olomeme vitãlo va vi yuvale kumosi lolonjongo vitãlo violukango kuenda ocita covisiakata viayuva lovita vivali viakende akuyu. Viosi wa vi ambatela kovimbulu.

¹⁹ Wa popia lakuenje vaye hati, Ene piti kovaso, lame ndu kuami. Veyaye Nabala puãi ko sapuilileko.

²⁰ Osimbu a kala loku endela kocimbulu loku pita konẽle yomunda, Daviti lalume vaye veya ocipepi laye. Eye wa tokekela lavo.

²¹ Konyima Daviti wa popele hati, Ocili ame nda likavisa ño oku tata cosi ulume waco wa kala laco vekalasoko okuti lacimue caye ca nyelela. Cilo uwa ndo lingila eye o kasi loku u niuwila luvi.

²² Suku a ci lingevo ku Daviti loku vandekako nda komele kalume vaye ku supa umue ndaño umosi.

²³ Eci Avigaile a mõla Daviti oco wa yayulako, wa loka kocimbulu, wa wila posi, wa petama kovaso a Daviti.

²⁴ Wa wila posi polomãi viaye, hati, A cime cange, ongole yaco yi linge yange. Ndinge ohenda, tava okuti ame ndimõlove mbangula love. Yeva eci ci popia omõlove.

²⁵ Cime cange ka ka kapeko omunu waco wa tatama, Nabala, momo wa lisoka londuko yaye. Onduko yaye Nabala, yokuti Eveke, yo soka muẽle. Ame puãi ndimõlove sia muĩle akuenje va cime cange vana wa tumĩle.

²⁶ Kaliye, a cime cange, ndeci Yehova a kasi lomuenyo, lutima wove u kasi lomuenyo, omo Yehova wa ku tiula kongole yoku pesela osonde loku fetuluniya leka liove muẽle, oco ovanyãli vove lava va sanda oku linga cĩvi cime cange, kokuove va kale nda Nabala.

²⁷ Cilo, ombanjaile yilo ya nenela omõlove cime caye yeciwe kakuenje va kasi loku enda la cime cange.

²⁸ Ecela omõlove osiata eyi, momo Yehova o tumãlisa ciwa epata lia cime cange omo cime cange o kasi loku yaka ovita via Yehova. Eviho ka li sangiwa kokuove otembo yosi o kasi lomuenyo.

²⁹ Nda alume va katuka loku ku landula loku sanda omuenyo wove, omuenyo wa cime cange u pandekelua vomunga ya vakuamuenyo, kuenje Yehova Suku yove o ku lava. Ovimuenyo viovanyãli vove o vimba ndeci cimba epipili.

³⁰ Kuenda vali, eci yehova a linga cime cange eci ca soka luwa wosi wa ku tukuila loku ku vialeka osoma ya va Isareli,

³¹ oco cime cange ka kala leci cu kutisa osõi, pamue ceci a lipisa laco omo wa pesela osonde olivova, pamue wa fetuluinya eye muẽle. Eci Yehova a linga ciwa cime cange oco cime canga a ivaluke omõlaye.

³² Daviti yu wa popia la Avigaile hati, Yehova, Suku ya va Isareli, una wa ku tuma kokuange etali, a pandiyiwe.

³³ Olondunge viove vi pandiyiwe. Love muẽle, pandiyiwa omo wa niula kongole yoku pesela osonde loku fetuluinya ame muẽle leka liange.

³⁴ Momo ocili, ndomo a kasi lomuenyo Yehova, Suku ya va Isareli, una wa niula koku ku linga cĩvi, nda kua yayuileko oku ñualẽhela lame, nda omele ka kua supile ndaño umosi kalume va Nabala.

³⁵ Oco Daviti wa tambula peka liaye evi o nenela. Wa popia laye hati, Kuende konjo yove lombembua. Nda yeva kondaka yove. Nda tava kepingilo liove.

³⁶ Avigaile yu weya ku Nabala. Wonjo yaye mua kala ofesta ya soka lofesta yosoma. Nabala wa sanjuka loku yola yola omo wa kolua enene. Oco Avigaile ko sapuilile cimue toke omele.

³⁷ Omele, eci Nabala a kololuka, oco ukãi waye wa sapuila ovina evi. Utima waye wa teka, leye wa linga ndewe.

³⁸ Kovaso yoloneke ekui Yehova wa veta Nabala kuenje wa fe.

³⁹ Eci Daviti a yeva okuti Nabala wa fa wa popia hati, a Yehova pandiyiwe una wa fetuluinya ondaka yoku nondala yina ya popia Nabala, haeye wa tiula ukuenje waye koku linga cĩvi. Yehova wa fetuluinya ovilinga vivi via linga Nabala, wa vi tiula kokuaye. Oco Daviti wa tuma oku vangula la Avigaile okuti o linga ukãi waye muẽle.

⁴⁰ Eci akuenje va Daviti veya ku Avigaile vo Karimele va popia laye vati, Daviti wa tu tuma kokuove ha tu ku ambata hu lingi ukãi waye.

⁴¹ Eye wa votoka, wa petamẽla posi, hati, Omõlene wa linga upika woku yuisa olomãi viakuenje va cime caye.

⁴² Avigaile yu wa yayulako, wa katuka, wa wila kocimbulu. Afeko vaye vatãlo va enda laye. Wa kuama olomunga via Daviti kuenje wa linga ukãi waye.

^43-44 Daviti wa tumbulavo Ahinoama u Yesirele. Kavali kavo va linga akãi vaye. Saulu wa eca ale omõlaye Mikale, ukãi wa Daviti, ku Paliti, omõla a Laisi u Galimi.