I SAMUELE 24 - Embimbiliya - Bíblia Sagrada em Umbundu

¹ Eci Saulu a tiuka koku yaka la va Filisiti oco vo sapuila vati, Ota, Daviti o kasi vekalasoko li Engedi.

² Saulu yu wa konga olohulukãi vitatu vialume va noliwa pokati ka va Isareli vosi. Wa ka sandiliya Daviti lalume vaye kovaso yovawe olohoka.

³ Wa pitila kovimanga violomeme vi kasi vonjila. Ocipepi kua kala eleva. Saulu wa iñila oku lipopela. Daviti lalume vaye va tumãla kupãla kohondo yeleva liaco.

⁴ Alume va Daviti va popia laye vati, Lilo olio eteke Suku a sokolola eci a popia love hati, Unyali wove ndu weca peka liove, love o linga laye cosi wa sima. Oco Daviti wa katuka, wa tete ocinimbu konanga ya Saulu.

⁵ Noke puãi Daviti co vala vutima omo a tete ocinimbu konanga ya Saulu.

⁶ Wa popia lalume vaye hati, Suku a ñuatise okuti eci si ci lingi cime cange, haeye ombuavekua ya Yehova, okuti ndu wolũila eka liange omo eye ombuavekua ya Yehova.

⁷ Oco lolondaka evi Daviti wa pongoluisa ovisimilo vialume vaye, kuenje ka tavele okuti va katukila Saulu. Oco Saulu wa votoka, wa tunda veleva kuenje wamako lungende waye.

⁸ Noke Daviti layevo wa votoka, wa tunda veleva, wa vilikiya Saulu hati, A cime cange a Soma. Leci Saulu a vanja konyima Daviti wa petamẽla posi lesumbilo.

⁹ Daviti yu wa popia la Saulu hati, Nye o yevela kolondaka viomanu va popia vati, Daviti o sanda oku ku linga cĩvi?

¹⁰ Etaili lovaso ove muẽle ove wa ci mõla ndomo Suku wa ku eca peka liange veleva. Vamue vati, U wipaya. Ame puãi sia tavele, siti, Si olũila cime cange eka liange omo eye ombuavekua ya Yehova.

¹¹ Tala a tate, o lete ocitetele eci conanga yove ci li peka liange. Siti omo nda teta ocitetele konanga yove kuenje sia ku ipaile ove o tẽla oku kolela okuti peka liange ka pali oku ku linga cimue cĩvi pamue oku ku kuatela usuanji. Sia ku lingilile ekandu ndaño ove o sanda omuenyo wange.

¹² Yehova a linge onganji pokati kange love. Yehova a ku fetuluinyile ame, eka liange puãi ka li ku olohela.

¹³ Ndolusapo luolosekulu luti, Ku vakuevĩho ku tunda evĩho, eka liange puãi ka li ku olohela.

¹⁴ Soma ya va Isareli wa tundila elie? O kasi loku landula elie, ombua ya fa ale, pamue olunambue?

¹⁵ Oco Yehova a linge onganji, a tepise pokati kange love, a ci kulihise, a nundile olunda, loku mopela peka liove.

¹⁶ Eci Daviti a mala oku popia olondaka evi la Saulu oco Saulu hati, Ondaka oyo yove ale, amõlange Daviti? Saulu yu wa lila calua.

¹⁷ Wa popia la Daviti hati, Ove wa sunguluka ca velapo, ame ci sule, omo ove wa fetuluinya ame luwa, ame puãi nda ku fetuluinya luvi.

¹⁸ Haive vali wa ndekisa etaili ndomo wa ndinga ciwa omo kua njipãlele eci Yehova a ngeca peka liove.

¹⁹ Momo omunu hẽ, nda o kuata unyali waye, o weca, ko lingi lavi? Oco Suku a ku tiuwile eci ciwa omo wa ndinga eci ciwa etali.

²⁰ Cilo, tala, ñuliha ciwa okuti ove o linga osoma. Ñulihavo okuti uviali wa va Isareli u kala ciwa peka liove.

²¹ Lisila lame vonduko ya Suku okuti ku nyõli ombuto yange yiya kovaso ndaño onduko yange vepata lia tate.

²² Daviti yu wa ci lisila la Saulu. Saulu wa tiukila konjo. Daviti lalume vaye puãi va tiukila kocilala.