I SAMUELE 23 - Embimbiliya - Bíblia Sagrada em Umbundu

¹ Va sapuila Daviti vati, Tala, va Filisiti va kasi loku liyaka la Kaila loku punda ovimbandi vioku sasela.

² Oco Daviti wa puliliya ku Yehova hati, Ngenda ha liyaka la va Filisiti ale? Yehova wa kumbulula Daviti hati, Kuende, ka yake la va Filisiti. Popela Kaila.

³ Puãi alume va Daviti va popia laye vati, tala, mulo vo Yuda tu kasi ale lusumba. Nda tu enda ko Kaila oku liyaka lolohoka via va Filisiti, siti usumba u piãla vali enene?

⁴ Oco Daviti wa puliliya vali ku Yehova kuenje Yehova wo kumbulula hati, Votoka. Lokila ko Kaila, momo ngeca va Filisiti peka liove.

⁵ Daviti lalume vaye va enda ko Kaila, va liyaka la va Filisiti, va punda olongombe viavo, kuenje va va kundula calua. Oco Daviti wa popela va Kaila.

⁶ Eci Aviyatare, omõla a Ahimeleke, a tilila ku Daviti ko Kaila, weya lefonde peka.

⁷ Va sapuila Saulu okuti Daviti weya ko Kaila. Oco Saulu wa popia hati, Suku wo weca povaka ange omo wa liyaka eci a iñila vimbo li kuete olombundi kuenda ovikundiko.

⁸ Oco Saulu wongolola omanu vosi ha va endi kovita, ha va lokila ko Kaila, ha va sitikilamo Daviti lalume vaye.

⁹ Daviti wa kuliha okuti Saulu wa kala loku u simĩla oku u linga cĩvi, oco a popia la Aviyatare ocitunda hati, Nena efonde.

¹⁰ Oco Daviti wa likutilila hati, A Yehova, a Suku ya va Isareli, ukuenje wove wa yeva ndomo Saulu o yongola oku iya ko Kaila ha nyõli imbo omo va suvuka ame.

¹¹ Alume va Kaila hẽ va ngeca peka liaye ale? Ocili, Saulu o lokila kulo ndeci ukuenje wove a yeva, ale? A Yehova, a Suku ya va Isareli, oco ñasi loku likutilila. Sapuila ukuenje wove. Yehova yu wo sapuila hati, Iya muẽle.

¹² Daviti yu wa pula vali hati, Alume va Kaila hẽ, va ngeca ame kumosi lalume vange povaka a Saulu ale? Yehova yu wa kumbulula hati, Vo weci.

¹³ Oco Daviti lalume vaye ovita eapndu va katuka, va tunda ko Kaila va enda oko loko, kuosi va tẽla. Eci va sapuila Saulu okuti Daviti wa tila ko Kaila oco Saulu kaileko vali.

¹⁴ Daviti wa kala kala vovilala vekalasoko kuenda vofeka yolomunda vekalasoko lia Sife. Eteke keteke Saulu wo sandiliya. Suku puãi ko wecele peka liaye.

¹⁵ Daviti wa kala lusumba omo Saulu wa sandiliya omuenyo waye. Daviti wa kala vo Horesi vekalasoko lia Sife.

¹⁶ Yonatão, omõla a Saulu, wa votoka, wa enda ko Horesi ku Daviti, wo halisila vonduko ya Suku.

¹⁷ Wa popia laye hati, Ku ka kale lusumba. Eka lia tate Saulu ka li ku veta. Ove o linga osoma ya va Isareli. Lame ñala konẽle yove. Tate Saulu layevo wa ci kũlĩha.

¹⁸ Kavali kavo va lisila ocisila kovaso a Yehova. Daviti wa siala vo Horesi. Yonatão wa tiukila konjo yaye.

¹⁹ Va Sife va enda ku Saulu ko Givea vati, Daviti hẽ, ka salamẽle pokati ketu vovilala vioko Horesi, komunda ya Hakila, konele yokutundilo ya Yesimone?

²⁰ Cilo, a Soma, lokilako, ndeci ca yongola utima wove oku lokilako. Cetu muẽle oku u weca peka lia Soma.

²¹ Saulu wa popia hati, Suku a vu sumuluise omo wa ñuateli ohenda.

²² Kuendi ka kũlĩhisi vali lutate. Kũlĩhisi loku vanja apa pali ociwundilo caye. Kũlĩhisi nda helie wo muilako. Omo nda yeva okuti wa lunguka enene.

²³ Oco kũlĩhisi muẽle. Limbuki ciwa oviwundilo viosi apa a salayama. Tiuki kokuange loku sapuila cosi locili. Kovaso yaco ngenda lene. Nda a kasi muẽle vofeka ndu vanjiliya pokati kolohulũkai viomanu va kasi vo Yuda.

²⁴ Oco va kutuka, va livanga oku enda ko Sife. Saulu wa siala. Daviti lalume vaye va kala vekalasoko lia Maona, vo Araba, konele yoko Sul ya Yesimone.

²⁵ Oco Saulu lalume vaye va ko sandiliya. Va ci sapuila Daviti oco wa lokila kesenje lia kala vekalasoko lia Maona. Eci Saulu a ci yeva oco wo vanjiliya vekalasoko lia Maona.

²⁶ Saulu wo vanjiliya konele eyi yomunda, Daviti lomanu vaye puãi vava konele yikuavo. Daviti wa kala loku yoloka calua ha tila Saulu osimbu Saulu lalume vaye va ñuala Daviti lalume vaye ocingonja ha va va kuata.

²⁷ Kuenje ku Saulu kueya omunga yiti, Yayulako. Enju. Va Filisiti va kasi loku punda ofeka.

²⁸ Oco Saulu wa liweka oku sandiliya Daviti kuenje wa katukila va Filisiti. Oco tunde keteke liaco opo a kala pa tukuiwa Esenjeliepuluko.

²⁹ Daviti yu wa tundako, wa ka tumãla vovilala vi Engedi.