I SAMUELE 22 - Embimbiliya - Bíblia Sagrada em Umbundu

¹ Daviti yu wa tundako, wa tilila kocikolo ca Adulama. Eci vahuvaye la vosi vokonjo ya isiaye va ci yeva oco va lokilako oku u pasula.

² Kuenje vosi va kala kohali yimue, la vosi va sakalala lolofuka kuenda vosi va suvala, vongolokela kokuaye, eye wa linga usongui wavo. Alume va kala laye va tẽla ovita vikuãla.

³ Daviti wa tundako kuenje wa enda ko Misipa ko Moavi. Wa popia losoma ya Moavi hati, Ñasi oku ku pinga okuti tate la mai va kala love toke ñuliha eci Suku o linga lame.

⁴ Oco wa va sia la Soma ya Moavi. Va kala laye otembo yosi Daviti a kala vocikolo.

⁵ Uprofeto Gadi wa popia la Daviti hati, Ku ka kale vali vocikolo. Tundamo. Kuende kofeka ya Yuda. Oco Daviti wa tundamo, wa enda vusenge wa Herete.

⁶ Saulu wa yeva okuti Daviti wa mõleha, wa yevavo alume va kala laye. Saulu wa kala ko Givea, wa tumãla vemehi liuti umue wa kala ponumbuko, wa kala lonjelia yaye peka, lakuenje vaye vosi vo ñuala.

⁷ Saulu wa popia lakuenje vaye vo ñuala hati, Ene a va Benjamini, yeveleli. Omõla a Jese nga eye o wihi ovapia loviumbo viayuva, pamue olomangu ho lingi vakesongo volohulũkai pamue vakesongo vovita,

⁸ okuti vosi yene yu wa ñualelipo ame? Lomue o sapuila ame eci omõlange a lisila ocisila lomõla a Jese. Lomue o ñuetele ame ohenda, lomue o sapuila okuti omõlange wa nutuminyila ukuenje wange ha ndavekela ndeci o kasi oku linga etali.

⁹ Doege u Edome wa kala ocipepi lakuenje va Saulu, wa kumbulula hati, Nda mõla omõla a Jese eci eya ko Nove, ku Ahimeleke, omõla a Ahituva.

¹⁰ Eye wo likutililila ku Suku kuenje wo wiha okulia, wo wihavo osipata ya Goliata u Filisiti.

¹¹ Oco Soma wa tumila ocitunda Ahimeleke, omõla a Ahituva, kuenda ovitunda viosi vakuepata lia soyaye via kala vo Nove. Kuenje vosi veya ku Soma.

¹² Saulu wa popia hati, Amõla a Ahituva, yevelela. Eye wa kumbulula hati, Amilo a Kuku.

¹³ Saulu wa popia hati, Nye wa ñualelelipo, ove lomõla a Jese, okuti ove wo wiha okulia losipata haive wo likutililila ku Suku okuti eye wa ñatukila loku ndavekela ndomo o kasi loku linga etali?

¹⁴ Ahimeleke wa kumbulula Soma hati, Pokati kakuenje vove vosi helie wa ku kakatela oku ku vumba ndeci Daviti, ondatembo ya Soma, haeye kesongo liolondavululi viove muẽle, haeye wa sumbiwa vonjo yove?

¹⁵ Etali nga olio onjanja yatete ndo likutilila ku Suku? Ndati. Soma ka ka simile cimue ukuenje waye ndaño onjo ya tate momo cosi eci, ci kale calua, ci kale citito, ukuenje wove ka ci kũlĩhile.

¹⁶ Oco Soma hati, Ove, a Ahimeleke, o fila muẽle kumosi la vosi va kasi vonjo ya so.

¹⁷ Soma yu wa sapuila ondavululi ya kala laye hati, Kuende, ka ipaye ovitunda via Yehova omo via tiama ku Daviti. Va kuliha okuti wa tila kuenje ka va ci sapuilile. Akuenje vosoma puãi ka va tavele oku oluila eka ovitunda via Yehova oku vi ponda.

¹⁸ Oco Soma wa popia la Doege hati, Ove muẽle, ñualapo, ipaya ovitunda. Doege u Edome yu wa ñualapo kuenje wa ipaya ovitunda. Eteke liaco wa ipaya omanu vakuakuambata efonde akui ecelãla la vatãlo.

¹⁹ Limbo lia Nove, olio imbo liovitunda viaco laliovo wa li kundula losipata. Lalume lakãi, lomãla loloñaña lolongombe lovimbulu kuenda olomeme, cosi wa ci kundula losipata.

²⁰ Puãi pokati komãla va Ahimeleke, omõla a Ahituva, pa puluka umosi, onduko yaye Aviyatare. Eye wa tilila ku Daviti.

²¹ Aviyatare yu wa sapuila Daviti okuti Saulu wa ipaisa ovitunda via Yehova.

²² Daviti wa popia la Aviyatare hati, Eteke liaco muẽle, eci Doege u Edome a kalako, nda ci kũlĩha ale okuti eye ka pumbi oku sapuila Saulu. Ame, ame muẽle, nda muisa omanu vosi vepata lia so okufa.

²³ Kala lame, ku ka yokoke, momo wosi o sanda omuenyo wange o sandavo omuenyo wove. Nda o kala lame o koka.