I SAMUELE 21 - Embimbiliya - Bíblia Sagrada em Umbundu

¹ Daviti yu weya ko Nove kocitunda Ahimeleke; leye Ahimeleke weya oku ñualẽhẽla la Daviti loku luluma, wo pula hati, Nye weyilila lika wove, lomue wa ku kuama puã?

² Daviti wa kumbulula Ahimeleke hati, Soma wa nyiha ocikundi, kuenje hati, Lomue ka ka kũlĩhe ocikundi ñasi loku ku kundika. Ñuete ohuminyo yoku lisanga lakuenje vaco ko Gandi.

³ Cilo hẽ, nye o kuete? Nyihe olombolo vitãlo, pamue cosi ño o kuete.

⁴ Ocitunda ca kumbulula Daviti citi, Ombolo yaño si kuete, ombolo yi kola kuli, nda akuenje vaco ka va kaile pamosi lakãi.

⁵ Daviti wa kumbulula ocitunda hati, Ka kuli ohele, akãi va tu lemeliwa ndeci olonjanja viosi eci ngendaenda kovita. Ndaño kungende waño atimba akuenje a kola, etaili nga atimba avo ka a velipo oku kola?

⁶ Oco ocitunda co wiha ombolo yi kola omo ka kua kaile ombolo yikuavo te eyi ya tumbikiwa ku Suku, haiyo yupiwa eteke va piñainyapo eyi ya sanya.

⁷ Ca kala okuti eteke liaco umue kovakuenje va Saulu wa kalako, wa kala oku talamẽla oku suisapo okuyelisua kuaye kovaso a Yehova. Onduko yaye Doege, eye u Edome, haeye usongui wangombo va Saulu.

⁸ Daviti wa pula Ahimeleke hati, Kulo ku kuete onjelia pamue osipata? Ame siambatele ndaño osipata ndaño ovimaleho vikuavo omo ondaka yosoma yi kuete onjanga.

⁹ Ocitunda citi, Osipata ya Goliata u Filisiti, una ove wa ipaya vocimbota ca Ela, yi kasi, ya wungiwa ponanga, yoyo konyima yefonde. Nda o yongola oku yambata, yambata, kulo ka kuli yikuavo nda hayoyo. Daviti hati, Yikuavo ya lisoka layo ka kuli.

¹⁰ Daviti wa katuka, kuenje eteke liaco wa tila ku Saulu, wa enda ku Akisi, osoma ya Gati.

¹¹ Akuenje va Akisi vo pula vati, U nga ha-Daviti-ko, osoma yofeka? Heyeko nga va likumbuluaila loku imba loku cĩla, vati, Saulu wa ipaya olohulukãi viaye. Daviti wa ipaya olohuluwa viaye.

¹² Daviti wa sokolola calua olondaka viaco kuenje wa kuatela usumba Akisi, osoma ya Gati.

¹³ Oco wa pongoloka kovaso avo, wa liluvikiya ndeyui povaka avo, wa taya taya kapito ombundi, kuenda wa yoya olute okuti lua lokila kolonjele.

¹⁴ Akisi yu wa popia lakuenje vaye hati, Tala ulume u wa linga eyui. Nye wo neneli kokuange?

¹⁵ Ame nga nda suka ovayui okuti wa neneli ulume u ha pongolokela eyui kovaso ange? Ulume u nga iñila vonjo yange?