I SAMUELE 20 - Embimbiliya - Bíblia Sagrada em Umbundu

¹ Daviti wa tila ko Nayota vo Rama, weya ku Yonatão, wo pula hati, Nda linga nye? Ongole ye ñasi layo? Ekandu lie nda linga kovaso a so okuti o sanda omuenyo wange?

² Eye wo kumbulula hati, Lakamue, ku fi. Tala, tate ka lingi cimue, ci kale cinene, ci kale citito, te o ci sapuila ame. Leci hẽ, tate o ci ndimbikila nye? Oco hacoko.

³ Daviti puãi wa kumbulula hati, So o kũlĩha ciwa okuti ove o sole ame oco o sokoluila hati, Yonatão ka ka ci kũlĩhe sanga o sumua enene. Puãi, mopia ocili, ndomo Suku o kasi lomuenyo, pa kambela ño katitotito okuti ndi fa.

⁴ Yonatão yu wa sapuila Daviti hati, Cosi o yongola hu ci lingila muẽle.

⁵ Daviti hati, Tala, hẽla osãi yi mõleha lame oku pumba oku tumãla komesa kumosi la Soma ka ci tava; puãi ngece okuti salama vusenge toke koñolosi yeteke liatatu.

⁶ Nda so o mula, popia huti, Daviti wa minga oku enda kimbo liavo ko Beteleme momo oko kuli ocilumba cepata liavo, cimue ci lumbaiwa ulima kulima.

⁷ Nda eye o kumbulula hati, Ciwa,— ci kala muẽle ciwa lukuenje wove, puãi nda wa tema, kolela okuti o kasi oku sokiya oku linga cimue cĩvi.

⁸ Oco linga ohenda kukuenje wove momo wa lisila ocisila ci kola lukuenje wove. Puãi nda kokuange kuli ongole njipaye ove muẽle, nye o nualela ku so?

⁹ Yonatão hati, Eci ci pite kupãla love. Nda nda kũlĩhile okuti tate wa sokiya ale oku ku nyõla nda sia ku sapuilile nga?

¹⁰ Daviti yu wa pula Yonatão hati, Helie o sapuila ame nda so o ku kumbulula lonyeño?

¹¹ Yonatão yu wa sapuila Daviti hati, Tu ende vusenge. Oco kavali kavo va enda vusenge.

¹² Yonatão wa popia la Daviti hati, Yehova, Suku ya va Isareli, a linge ombangi. Hẽla pamue hẽlanya, ola yilo muẽle, pana okuti nda kũlĩhisa ale utima wa tate, tala, nda nda sanga okuti wa sanjukila Daviti si tumi hẽ oku ku sapuila?

¹³ Puãi nda tate wa livela oku ku linga cĩvi, Yehova a ci lingevo Yonatão loku vokinyako, nda si ku ci sapuila loku ku tuma kupãla okuti wenda o koka. Suku a kale love ndeci a kala kala la tate.

¹⁴ Nda lopo ñasi lomuenyo kala lame locisola cocili ca Suku okuti si fi.

¹⁵ Kuenda vali ocisola cove coku sola epata liange ka ci ka pue. Eci Yehova o nyõla palo posi ovanyãli vosi va Daviti,

¹⁶ oco onduko ya Yonatão ka yi ka ivaliwe vonjo ya Daviti.

¹⁷ Oco Yonatão wa pilika Daviti oku lisila vali laye ocisila cocisola o kuatela, momo wo sola ndomo a sola omuenyo waye muẽle.

¹⁸ Yonatão wa popia laye hati, Hẽla osãi yi mõleha, kuenje okukamba kuove komesa ku limbukiwa omo omangu yove yi kala upolokoso.

¹⁹ Hẽlanya okukamba kuaco kuove ku limbukiwa vali enene. Oco kuende kuna wa salamẽle ale eci tua kala ale lombangulo yaco. Kala ocipepi londunda yovawe.

²⁰ Oco ame njimbila konele yayo ovisongo vitatu okuti huti ño ñasi loku asa kocimaho cimue.

²¹ Kuenje tala, numa ukuenje siti, Kuende, kope ovisongo. Nda mopia lukuenje siti, Tala, ovisongo vi kasi konele yongandi yove, vi nyañula, ca lomboloka okuti ove wiya, momo ndeci Suku a kasi lomuenyo ka kuli ohele, ove o kala ciwa.

²² Puãi nda mopia lukuenje siti, Tala, ovisongo vi kasi oko kovaso yove, oco ove kuende, momo Yehova o kasi oku ku tuma kupãla.

²³ Kuenje kondaka yetu, yina love lame tua likuminya, tala, Suku o linga ombangi pokati kove lame oloneke vienda ño-o hũ, ka vi pui.

²⁴ Oco Daviti wa salama vusenge. Eci osãi ya mõleha oco Soma wa tumãla kokulia.

²⁵ Soma wa tumãla komangu yaye yi kasi ocipepi locimano ndeci a tuwa. Yonatão wa tumãla komangu yimba ovaso ku Saulu, Avinere wa tumãla konele ya Saulu, omangu ya Daviti puãi ya kala upolokoso.

²⁶ Haimo eteke liaco Saulu ka popele cimue, wa sima hati, Kuli cimue co tateka, ka yelele, ka ku pumbi okuti ka yelele.

²⁷ Puãi eteke lia kuamamo okuti eteke liavali liosãi yokaliye omangu ya Daviti yeyi vali upolokoso. Oco Saulu wa pula omõlaye Yonatão hati, Omõla a Jese hẽ, nye keyilile kokulia ndaño hẽla ndaño etaili?

²⁸ Yonatão wa kumbulula Saulu hati, Daviti wa minga okuti enda ko Beteleme,

²⁹ hati, Ngece, omo epata lietu li lumba ocilumba vimbo. Kota wa ñisika okuti ñalako. Oco cilo nda o nava ngece okuti oco ndi lipasule la vahuvange. Oco keyilile komesa ya Soma.

³⁰ Oco Saulu wa temẽla Yonatão, wa popia laye hati, Ove amõla ukãi wa puiya haeye wa tatama, ame nga sia kũlĩhĩle okuti wa nola omõla a Jese kuenje ci ku kutisa osõi, ci kutisavo osõi epõlõla lia nyõho.

³¹ Momo osimbu omõla a Jese a kasi lomuenyo palo posi ove ku tumãla, ndaño uviali wove ka u tumãla. Oco tuma oku u wupa loku u nena kokuange, momo o fa muẽle.

³² Yonatão wa kumbulula so yaye Saulu hati, O fila nye? Wa linga nye?

³³ Saulu puãi wa kuata onjelia ho veta. Oco Yonatão wa limbuka okuti soyaye wa likapela muẽle oku ipaya Daviti.

³⁴ Oco Yonatão wa tunda komesa lonyeño omo soyaye wo wimbula; ka lile okulia eteke liavali liosãi kuenje wa sumuila calua Daviti.

³⁵ Omẽle, Yonatão wa enda vusenge ndohuminyo yaye la Daviti. Wa enda lokokuenje.

³⁶ Wa popia lokokuenje hati, Lupuka, ka nole ovisongo njimba. Osimbu okokuenje ka lupuka oco wa imba usongo wa ka pitahãla.

³⁷ Eci okokuenje ka pitila apa pa wila usongo wa imba Yonatão oco Yonatão wa vilikiya okokuenje hati, Usongo nga ka u kasi kovaso yove?

³⁸ Kuenje Yonatão wa vilikiya okokuenje hati, Yayulako. Lupuka. Ku ka lende. Oco okokuenje la Yonatão ka nola ovisongo kuenje keya lavio ku cime caye.

³⁹ Okokuenje puãi ka ka kũlĩhile cimue. Yonatão la Daviti ovo lika va ci kũlĩha.

⁴⁰ Oco Yonatão wa eca ohonji lovisongo kokokuenje kaye hati, Kuende, ka vi tuale kimbo.

⁴¹ Tuli okokuenje ka enda Daviti wa votoka konẽle yondunda yovawe, wa wila posi, wa lituvikapo ocipala, wa lituvikapo lutatu. Va lisipula, kuenje kavali kavo va lila calua, Daviti wa lila ca piãla.

⁴² Yonatão wa popia la Daviti hati, Kuende lombembua omo tua lisila ale kavali ketu, vonduko ya Yehova tuti, Yehova o linga ombangi pokati kove lame, o lingavo ombangi pokati kombuto yange lombuto yove otembo yenda ño-o hũ ka yi pui. Oco Daviti wa votoka wa enda. Yonatão wa tiukila kimbo.