I SAMUELE 2 - Embimbiliya - Bíblia Sagrada em Umbundu

¹ Hana layevo wa likutilila hati, Utima wange u sanjukila Yehova. Nda kolapo muẽle longusu ya Yehova. Omẽla wange u sepula ovanyãli vange momo nda sanjukila eyovo liove.

² Ka kuli ukuavo o kola nda Yehova, kuavo ka kuli te ove lika. Ka kuli ocikolo ca soka la Suku yetu.

³ Ko ka vanguli vali lepela lia lua. Emande ka li ka tunde kimẽla viene. Momo Yehova eye Suku yukũlĩhiso. Ovilinga vi pesaliwa laye.

⁴ Olohonji violomami via teka, ahoma puãi va pamisua.

⁵ Vakuakuto va talavayela ombolo. Vakuanjala ka va lambuka vali. Osiũle ya cita epanduvali. Ukuamãla valua wa siala ulika.

⁶ Yehova ukuakuipa, haeye o pindola vali. Eye o lowaisa ko Gehena, haeye o londaisa vali

⁷ Yehova o sukaisa haeye o salalaisa. Eye o kupola haeye o yelola.

⁸ O pindula olohũkui koneketela, o yelula olosuke keyala, ha vi tumalisa kumosi lomanu vanene loku vi piñalisa komangu yulamba. Momo olongunji viongongo via Yehova. Kilu liavio wa tumbikako oluali.

⁹ Eye o tata olomãi viomanu vaye vakuacili. Vakuakandu puãi va nyõlẽhẽla vowelema. Momo halolohõloko omunu o yula.

¹⁰ Ovanyãli va Yehova va sasoha. O va lemilila vilu. Yehova o tepisila ovikanjo viosi violuali. Eca olohõlo kosoma yaye, kuenje o luisa unene wombuavekua yaye.

¹¹ Oco Elikana wa tiukila ko Rama. Kuenje omõlaco wa vumba vumba Yehova kovaso a Eli ocitunda.

¹² Ca kala okuti omãla va Eli ka va sungulukile muẽle, ka va sumbilile Yehova.

¹³ Ombilo yovitunda, eci va kala pamosi lomanu, ya kala ndomo: Nda omunu weya locilumba caye, oco ukuenje wocitunda o kokela longalufu yovayo atatu peka. Kuenje osimbu ositu ya kala loku feluka.

¹⁴ Oco imba ongalufu vombia kuenje ocinumba cosi ca kuama kongalufu ca linga cocitunda. Oco va lingaile la va Isareli vosi veyaiya ko Silo.

¹⁵ Kuenda vali, osimbu ka va yokele ulela waco, ukuenje wocitunda iya, kuenje o popia lu wa nena ocilumba hati, Eca ositu yoku yoka yocitunda, momo eye ka tambula ositu ya telekiwa, te yowisu.

¹⁶ Nda u wa nena ocilumba o popia hati, Va yoke tete ulela, oco noke upeko yosi wa yongola, eye nda o kumbulula hati, Oco hacoko, te o yeca cilo muẽle, nda hacoko hu yi nyeha.

¹⁷ Oco ekandu liakuenje vaco lia linga linene ku Yehova, momo alume vaco va tomba ocilumba ca lumbiwa ku Yehova.

¹⁸ Samuele wa vumba vumba Yehova. Eye omõla handi, wa wala wala esanya lielinyu.

¹⁹ Unyamo kunyamo nyõho yaye wo tongela esanya, wo li tualela eci a enda la veyaye oku ka lumba ocilumba cunyamo.

²⁰ Kotembo yaco Eli wa sumuluisa Elikana lukãi waye hati, Suku a ku muise omãla lukãi ulo ndeci a lombele ku Yehova. Kovaso yaco va tiukila konjo yavo.

²¹ Yehova yu wa ivaluka Hana kuenje we mina mina, wa cita omãla valume vatatu lomãla vakãi vavali.

²² Cilo Eli wa kuka ca lua. Wa yeva ndomo omãla vaye valume va kala loku linga vofeka yosi ya Isareli. Wa yeva ndomo va pekaila lakãi va vumba vumba kuvelo wombalaka yoku ñualehela la Suku.

²³ Oco wa popia lavo hati, Nye vu lingila ovina ndevi? Omo komanu vosi njevite ovilinga viene vĩvi.

²⁴ Ocili, amãla vange, eci ndu yevitili, okuti omanu va Suku va kasi oku cu lisiõsuĩli kuosi, ka ca sungulukile.

²⁵ Nda omunu o lingila omunu ukuavo ekandu Suku u tetuluila, puãi nda omunu o lingila Suku ekandu helie u tetuluila? Puãi ka va yevelele kondaka ya soyavo, omo Suku wa panga ale oku va ipãla.

²⁶ Ukuenje Samuele wamamako kutunga kuenda koku soliwa la Suku loku soliwa lomanu.

²⁷ Kuenje ku Eli kueya umue omunu wa Suku, wa popia laye hati, Ca popia Yehova ceci, hati, Nda lisituluilile kepata lia so cina va kaile apika vonjo ya Fareo ve Egito.

²⁸ Yu ndo nola pokati kapata osi a va Isareli ha lingi ocitunda cange loku lamayana kutala wange ha timĩha insensu loku ambata efonde eci a kala kovaso ange, kuenje nda eca kepata lia so ovilumba viosi viange vina via yokiwa haivio via lumbiwa la va Isareli.

²⁹ Oco nye o vanjela locipululu ovilumba vioku yoka levi vikuavo nda tukuila omanu vange? Nye o sumbilila ca velapo omãla vove okuti ame ci sule poku litekula lovinumba via velapo viovilumba vi kola vina via lumbiwa ku Suku lomanu vange va Isareli?

³⁰ Oco Yehova, haeye Suku ya Isareli, wa popia hati, Ocili, nda likuminyile okuti epata liove lepata lia so vu kala ciwa lame otembo ka yi pui. Cilo puãi Yehova hati, Nda litiulamo muẽle. Ava va sumbila ame, ovo sumbilavo, lava va membula ame, ovo va pembuiwavo.

³¹ Tala, kuiya oloneke okuti nyõla ongusu yove longusu yepata lia so, okuti vepata liove ka mu kala vali osekulu.

³² Kotembo yaco ove o tokotelua ca lua vutima eci o vanja locipululu esumũluho lieya kepata lia va Isareli, kuenje vepata liove ka mu kala vali osekulu otembo ka yi pui.

³³ Omunu wosi pokati kepata liove ka tetiwile kutala wange o kala ño-o lomuenyo woku lila loku livela kutima. Omãla vove vosi lolonekulu loloneka, vosi va fa losipata.

³⁴ Ndeci ciya komãla vove vavali, Hafeni la Finehase, cokuti kavali kavo va fa eteke liongongo, ci linga ondimbukiso kokuove.

³⁵ Kuenje ndi likatuila ame muẽle ocitunda cocili, eye o lingainga ndovisimilo viange lolonjongole viange. Ndu muisa epata ka li pui. Kuenje o kala ño hũ kovaso ombuavekua yange.

³⁶ Kuenje wosi wa siala vepata liove enda kokuaye oku pinga okapalata pamue okambu kombolo, hati, Ndinge ohenda, ñape komangu yocitunda cimue okuti oco ndie okambu kombolo.