I SAMUELE 18 - Embimbiliya - Bíblia Sagrada em Umbundu

¹ Eci a mãla oku vangula la Saulu oco utima wa Yonatão wa lipandeka lutima wa Daviti kuenje wo sola ndomuenyo waye muẽle.

² Eteke liaco Saulu wo wambata, kuenje ka tavele okuti o tiukila vali konjo ya isiaye.

³ Yonatão yu wa lisila ocisila la Daviti omo wo sola ndomuenyo waye muẽle.

⁴ Kuenje Yonatão wa lula ocikutu a wala, wa ceca ku Daviti kumosi lovimãleho viaye ndaño osipata yaye lohonji yaye kuenda uvia waye.

⁵ Kovaso yaco Daviti wa tumaiwa la Saulu kuenje kuosi a enda wa linga ciwa cosi o tumila. Noke Saulu wo nola oku linga kesongo liovita kuenje omanu vosi va ci sanjukila. Akuenje va Saulu lavovo va ci sanjukilavo.

⁶ Poku iya konjo eci Daviti a tiuka koku ipaya u Filisiti oco akãi va tunda kovaimbo osi a va Isareli. Veya loku imba loku cĩla ha va ñualehela la Soma Saulu. Veya lolosimbalu lovisikilo viñi viñi kuenda oku imba ovisungo.

⁷ Akãi va litambulola lovisungo lesanju lia lua, vati, Saulu wa ipaya olohulukãi. Daviti wa ipaya olohuluwa.

⁸ Saulu oku ci yeva wa tema calua hati, Va tendela Daviti olohuluwa, ame va nendela olohulukãi. Po kambela nye vali nda huvialiko?

⁹ Tunde keteke liaco Saulu wa fetika oku endiliya Daviti.

¹⁰ Hẽla liaco espiritu lĩvi lia tunda ku Suku lia wila Saulu kuenje wa funguila vonjo yaye osimbu Daviti a kala loku sika ohalupa ndeci a lingainga eteke keteke. Saulu wa kala lonjelia yaye peka.

¹¹ Saulu wa imba onjelia omo a sima hati, Daviti ndu tomẽla vocimano, Daviti puãi wa yepamo luvali.

¹² Saulu wa kala lusumba la Daviti omo Yehova wa kala laye, puãi Saulu, Yehova wo tunda.

¹³ Oco Saulu wo wupa kupange waye, wo kapa kukesongo wohulukãi yimue kuenje Daviti wa ñuala ñuala pokati komanu oku tunda tunda loku iñaila.

¹⁴ Kuenje cosi Daviti a talavaya ca loñoloha omo Yehova wa kala laye.

¹⁵ Eci Saulu a mõla ndomo cosi a talavaya ca loñoloha oco wo yokokela.

¹⁶ Puãi va Isareli vosi la va Yuda vosi va sola Daviti omo wa lisanja eci a ñuala ñuala pokati kavo.

¹⁷ Saulu wa popia la Daviti hati, Omõlange ufeko ukulu wendamba yu, onduko yaye Merava, ndi ku wiha okuti o linga ukãi wove. Cinene o ñuatisa lutõi oku yaka kovita via Yehova. Momo Saulu wa sokolola hati, Eka liange ka li ko vete, eka lia va Filisiti olio liu vete.

¹⁸ Daviti yu wa kumbulula Saulu hati, Ame nga elie, pamue vakuepata liange velie ndeci epata lia tate vi Isareli, okuti ame ndinga ondatembo yosoma?

¹⁹ Puãi eci otembo yeya okuti Merava, omõla a Saulu, nda eciwa ku Daviti, vo weca ku Adriyele u Maholati, kuenje wa linga ukãi waye.

²⁰ Ca kala okuti omõla a Saulu, Mikale, eye wa sola Daviti kuenje va ci sapuila Saulu, oco co sanjuisa.

²¹ Saulu wa sokolola hati, Ndu weca kokuaye okuti u lingila onjanjo okuti eka lia va Filisiti liu veta. Oco onjanja yavali Saulu wa popia la Daviti, hati Cilo o linga ondatembo yange.

²² Saulu wa sapuilavo akuenje vaye hati, Vanguili la Daviti ponele hoti, Tala, Soma o ku sole, lakuenje vaye lavovo va ku sole, oco, tava oku linga ondatembo yosoma.

²³ Oco akuenje va Saulu va loñuinya Daviti olondaka viaco. Daviti yu wa kumbulula hati, Wa simi okuti oku linga ondatembo yosoma ocina cimue citito? Siti ame ndihukũi haime ndimunu waño.

²⁴ Akuenje va Saulu vo sapuila vati, Oco ca popia Daviti oco.

²⁵ Oco Saulu hati, Sapuili Daviti hoti, Soma ka yongola ociveleko te ocita coviyuvuluila via va Filisiti okuti oco ovanyãli vosoma va fetuluinyiwe. Momo Saulu wa livela nda Daviti o fila povaka a va Filisiti.

²⁶ Eci akuenje vaye va sapuila Daviti olondaka evi oco ca sanjuisa Daviti oku linga ondatembo yosoma. Osimbu oloneke ka via tẽlele,

²⁷ oco Daviti wa votoka, wa enda kumosi lomanu vaye kuenje wa ipaya ovita vivali via va Filisiti, wa nena oviyuvuluila vioseo ya tukuiwa kuenje wa vi eca kosoma okuti oco a linge ondatembo yosoma. Saulu yu wo wiha omõlaye Mikale ha lingi ukãi waye.

²⁸ Puãi eci Saulu a ci mõla kuenje wa kũliha okuti Suku wa kala la Daviti kuenda wa limbukavo ndomo va Isareli vosi vo sola,

²⁹ oco Saulu wa yokokela vali enene Daviti. Kuenje Saulu wa linga ño-o unyali wa Daviti.

³⁰ Vakesongo va va Filisiti va setaeka oku yaka. Puãi olonjanja viosi eci va seteka oku yaka, Daviti eye wa yula yula calua okuti akuenje vosi va Saulu ci sule. Oco onduko yaye ya kemãla calua.