I SAMUELE 17 - Embimbiliya - Bíblia Sagrada em Umbundu

¹ Va Filisiti va konga olohoka viavo oku yaka. Vongolokela ko Sokoha, imbo lia Yuda. Va tungila ocilombo vo Efesedami pokati ka Sokoha la Aseka.

² Saulu la va Isareli vongoloka, va tunga ocilombo vocimbota ca Ela. Va lialekela oku yaka la va Filisiti.

³ Komunda, konẽle eyi, va Filisiti va lialeka. Komunda, konẽle yikuavo, va Isareli va lialeka. Ocimbota ca kala pokati kavo.

⁴ Kocilombo ca va Filisiti kua tunda ocindululu, onduko yaye Goliata, eye u Gati. Utunga waye olonandu vitatu kepaluma.

⁵ Kutue wa wala ongalau yosipi. Ketimba wa wala ocikutu covivela, opesu yocikutu caco olohulũkãi vitãlo violosiekele viosipi.

⁶ Vovolu wa wala ovikapa viosipi. Pokati kapepe pa kala otevele yinene yosipi.

⁷ Ocikundo conjelia yaye ca soka nduti womankina yoku tuta. Opesu yonjelia yaye ovita epandu violosiekele viutale. Ukuenje wambayata otevele yaye wo pitila kovaso.

⁸ Eye wa talama vilu loku vilikiya kolohoka via va Isareli hati, Weyilili nye oku lialekela ovita? Ame nga siu Filisiti ko, lene hawakuenje va Saulu ko? Noli ene muẽle ulume, a lokile kokuange.

⁹ Nda eye o tẽla oku liyaka lame loku njipãya etu tu linga akuenje vene. Puãi nda ame ndi liyaka laye siu wipãya ene vu linga akuenje vetu loku tu vumba.

¹⁰ U Filisiti yu wa popia hati, Etaili mbayela olohoka via va Isareli. Nyihi ulume okuti tu liyaka.

¹¹ Eci Saulu la va Isareli vosi va yeva olondaka viu Filisiti va yokoka, va kuata usumba walua.

¹² Daviti eye wa kala omõla wu Efirata umue u Beteleme yovo yudea, onduko yaye Jese. Wa kala lomãla valume ecẽlãla. Voloneke via Saulu eye wa kukale, anyamo aye a lua.

¹³ Omãla vaye vatatu valume, akulu vendamba, va kuama Saulu koku yaka. Olonduko viomãla vatatu va enda kovita vievi, Nuñulu yaco onduko yaye Eliava, wo kuama pekosi eye Avinadava, tatu yaco eye Siama.

¹⁴ Daviti eye kuasula. Ovakulu va tatu va kuama Saulu.

¹⁵ Daviti wa kala kala la Saulu puãi wa endaendavo oku ka lisa olomeme via isiaye vo Beteleme.

¹⁶ Oloneke akui akuãla u Filisiti weyaiya komẽle lokekumbi oku limõlehisa.

¹⁷ Jese wa sapuila Daviti, hati, Ka tuale lombili ku vahuvove kocilombo efa liolukango kuenda olombolo ekui.

¹⁸ Ka tualevo oloheyo ekui ku kesongo liohulukãi. Nyulavo vahuvove ndomo va kasi, oco wiye o tu sapuile ndomo va kasi.

¹⁹ Ca kala okuti Saulu, lovo, kuenda alume vosi va Isareli, va kala vocimbota ca Ela oku liyaka la va Filisiti.

²⁰ Daviti wa pasuka ociteketeke, wa sia olomema lukuakutata, wambata okulia kuaco, wa enda ndeci Jese o sapuila. Wa pitila kocilombo eci olohoka via kala oku tundila oku yaka loku lihalisa lovisungo viovita.

²¹ Va Isareli la va Filisiti va lialekela oku yaka, ava lolohoka viavo, ava lolohoka viavo.

²² Daviti wa sia ocitele caye peka liukuakutata ovikuata, wa yolokela kovita, weya, wa pasula vahuvaye.

²³ Osimbu a kala loku vangula lavo, tala ocindululu caco, u Filisiti u Gati, onduko yaye Goliata, wa tunda kulala wa va Filisiti kuenje olondaka a popele ale haivio a popia vali. Kuenje Daviti wo yeva.

²⁴ Eci va mõla ulume waco va Isareli vosi vo tila loku yokoka.

²⁵ Kuenje va Isareli va popia vati, Ulume waco weya hẽ wo mõli? Ocili weya oku vayela Isareli. Ulume wosi u wipãya Soma o wiha ukuasi walua, o wihavo omõlaye ufeko, kuenda epata lia soyaye li kala luwale.

²⁶ Daviti yu wa popia lalume va kala ocipepi laye hati, Va linga nye lulume ipaya u Filisiti u ha kutulula va Isareli osõi? Ociyamba caco eci cu Filisiti nga eye elie okuti o vayela olohoka via Suku o kasi lomuenyo?

²⁷ Layevo omanu haico vo kumbulula, vati, Oco muẽle ci lingiwa lulume u wipaya.

²⁸ Huvaye Eliava wa ci yeva eci a vangula lalume kuenje wa temẽla Daviti hati, Weyilila nye? Otumeme wa tu sila elie vekalasoko? Nda kũliha okulituna kuove lahuku utima wove, momo wa lokila oku tala ovita.

²⁹ Daviti yu wa pula hati, Nda linga nye nga? Siti oku pula nda pula ño?

³⁰ Oco wo wimba onyima ha pongolokela kukuavo kuenje cimosi haico a popia vali. Lomanu le cimosi haico vo kumbulula.

³¹ Eci olondaka via popia Daviti via yevala oco va vi pituluila Saulu kuenje wo kovonga.

³² Daviti wa popia la Saulu hati, Lomue ka ka konyohe vutima omo eye wa va lingisa usumba. Ukuenje wove enda, o liyaka lu Filisiti u.

³³ Saulu wa popia la Daviti hati, Ove ku tẽla oku enda ku Filisiti u okuti o liyaka laye omo ove umalehe, eye esualali tunde kutila waye.

³⁴ Daviti puãi wa tambulula Saulu, hati, Ukuenje wove wa tata tata olomeme via soyaye. Eci kueya ohosi pamue okanyani oku kuata okameme vocunda,

³⁵ oco nda yi landula loku yi pupola, nda ka popela komẽla wayo. Nda ya ñatukila oco nda yi kuata volonjele. Nda yi pupola loku yipaya.

³⁶ Ukuenje wove wa ipaipa olohosi lotunyani. Lociyamba eci cu Filisiti lacovo ci favo ndolohosi omo wa vayela ovita via Suku o kasi lomuenyo.

³⁷ Kuenje Daviti hati, Yehova una wa mopela kekasa liohosi kuenda kekasa liokanyani eye o mopela peka liu Filisiti u. Saulu wa popia la Daviti hati, Kuende. Suku a kale love.

³⁸ Oco Saulu wa walisa Daviti ovimaleho viaye. Kutue waye wa kapa ongalau yosipi, wo walisa ocikutu covivela.

³⁹ Noke Daviti wa kapa osipata yaye kilu liocikutu covivela. Wa seteka oku enda puãi ka ca tavele omo ka vio wikile. Oco Daviti wa sapuila Saulu hati, Si tẽla oku enda levi omo ka via njikile. Oco Daviti wa vi lula.

⁴⁰ Oco wa kuata peka ombueti yaye. Wa nola polui otuvawe tu sielena tutãlo, wa tu kapa vekolombele, epipili liaye lieli peka, kuenje weya ocipepi lu Filisiti.

⁴¹ U Filisiti weya ocipepi la Daviti. Ukuenje waye wambata otevele yaye wo pitila kovaso.

⁴² Eci u Filisiti wa vanja kuenje wa mõla Daviti wo pembula omo eye umalehe, haeye o kusuka kuenda oku u vanja wa posoka.

⁴³ U Filisiti wa popia la Daviti hati, Ame nga ndimbua okuti wiya kokuange lombueti? Kuenje u Filisitu wa siñala Daviti vonduko yolosuku viaye.

⁴⁴ U Filisiti yu wa sapuila Daviti hati, Enju kokuange kuenje ngeca ositu yove kolonjila viovilu kuenda kovinyama viovusenge.

⁴⁵ Daviti yu wa kumbulula u Filisiti hati, Ove wiya kokuange losipata lonjelia kuenda unga. Ame puãi njiya kokuove vonduko ya Yehova Ukualohoka haeye Suku yolohoka via va Isareli una ove wa vayela.

⁴⁶ Etaili muẽle Suku o ku eca peka liange, hu tesõla, hu teta utue. Ovivimbi violohoka via va Filisiti ndi vi eca kolonjila viovilu lokovinyama viovusenge, oluali luosi ha lu kuliha okuti vo Isareli muli Suku,

⁴⁷ kuenda owiñi wosi ha u limbuka okuti Yehova ka popela losipata pamue lonjelia; momo okuliyaka kuaco kua Yehova kuenje eye o ku eca peka lietu.

⁴⁸ Eci u Filisiti a katuka heya oku kokela ha lisangi la Daviti oco Daviti wa yolokela kulala wasualali ha lisangi lu Filisiti.

⁴⁹ Daviti yu waimba eka vekolombele, wopamo ewe, wa li kapa vepipili, wa limba, kuenje lia veta u Filisiti kupõlo, lia iñila kupõlo waye, kuenje u Filisiti wa kupukila posi.

⁵⁰ Oco Daviti wa yula u Filisiti lepipili kuenda ewe, wa veta lalio u Filisiti loku wipaya. Peka lia Daviti ka pa kaile osipata.

⁵¹ Daviti wa lupukila ku Filisiti, wo vanja, kuenje wa kuata kosipata yaye, wa yi somõla vocilalo, wo wipaya, kuenje wa topola layo utue waye. Eci va Filisiti va mõla okuti onoi yavo va kolelele ya fa va tila.

⁵² Oco alume va Isareli lava va Yuda va votoka lonjuvungo kuenje va lupuisa va Filisiti toke ko Gati kuenda kolombundi vioke Ekirone. Olongase via va Filisiti via kupukila vonjila tunde ko Siare toke ko Gati loke Ekirone.

⁵³ Va Isareli va tiuka koku lupuisa va Filisiti kuenje va punda ocilombo cavo.

⁵⁴ Daviti wa yelula utue wu Filisiti kuenje wo tuala ko Yerusalãi, ovimaleho viaye puãi wa vi kapa vombalaka yaye.

⁵⁵ Eci Saulu a mõla Daviti oku votokela u Filisiti oco wa pula Avinere, kesongo liovita, hati, A Avinere, umalehe u hẽ, omõla elie? Avinere hati, A Soma, ocili muẽle letimba liove, ame siu wi.

⁵⁶ Oco Soma hati, Kũlĩhisa omõla u nda welie.

⁵⁷ Eci Daviti a tiuka koku ipaya u Filisiti oco Avinere wa wambata, wa enda laye ku Saulu, lutue wu Filisiti wowu peka liaye.

⁵⁸ Saulu wo pula hati, Amõlange, ove wumõla elie? Daviti wo kumbulula hati, Ndimõla ukuenje wove Jese, u Beteleme.