I SAMUELE 16 - Embimbiliya - Bíblia Sagrada em Umbundu

¹ Yehova wa popia la Samuele hati, Oloneke viñami o sumuĩla Saulu? Siti ame ndo pañula okuti ka lingi vali osoma ya va Isareli. Yukisa ombinga yove lulela. Kuende. Hu tuma ku Jese u Beteleme momo pokati komãla vaye valume opo nda linolẽla osoma.

² Samuele yu wa linga hati, Ngenda ndati? Nda Saulu o ci yeva siti o njipãya. Kuenje Yehova hati, Kuende lonãle, popia huti, Ndeya oku lumbila Yehova ocilumba.

³ Lalekavo Jese kokulumba kuaco. Hu lekisa eci o linga. Love o mbuavekela u hu sapuila.

⁴ Samuele wa linga eci Yehova a popia kuenje weya ko Beteleme. Akulu vimbo veya oku wupilila loku luluma, vati, Weya lombembua?

⁵ Eye hati, Lombembua. Ndeya oku lumbila Yehova ocilumba. Liyelisi. Tuendeli pamosi kokulumba kuaco. Oco wa yelisa Jese lomãla vaye. Wa va laleka kokulumba kuaco.

⁶ Eci veya, Samuele wa vanja Eliava kuenje wa sima hati, Ocili ombuavekua ya Suku yi kasi kovaso aye.

⁷ Yehova puãi wa popia la Samuele hati, Ku ka vanje keposo liocipala caye pamue kokulepa kutunga waye momo ndo pañula. Momo Yehova ka vanji ndeci omunu o vanja, omunu o vanja okumõleha kuokilu, Yehova puãi o vanja vutima.

⁸ Jese yu wa pañinya Avinadava, wo pitisa kovaso a Samuele. Samuele hati, Ndaño eye Yehova ko nolele.

⁹ Oco Jese wa pitisa Siama, Samuele hati, Ndaño eye Yehova ko nolele.

¹⁰ Kuenje Jese wa pitisa omãla vaye valume epanduvali kovaso a Samuele, Samuele wa sapuila Jese hati, Ovo Yehova ka va nolele.

¹¹ Oco Samuele wa pula Jese hati, Omãla vove valume vosi va suapo? Wa kumbulula hati, Kua siala handi kuasula. Eye o kasi loku lisa olomeme. Samuele wa sapuila Jese hati, Tuma oku wupa. Ka tu tumãla te weya kulo.

¹² Wo tumĩla kuenje wo nena. Eye o kusuka, ovaso aye a posoka, oku u vanja wa posoka muẽle. Kuenje Yehova hati, Votoka, u waveka momo eye muẽle.

¹³ Oco Samuele wa nyañula ombinga yulela, wo wavekela pokati ka vahuvaye. Espiritu lia Yehova lia wila Daviti lunene walua tunde keteke liaco. Samuele wa votoka, wa enda ko Rama.

¹⁴ Saulu puãi Espiritu lia Yehova lio tunda, kuenje espiritu lĩvi lia Yehova lio suvalisa.

¹⁵ Akuenje va Saulu va popia laye vati, Espiritu lĩvi lia tunda ku Suku li kasi oku ku sakalaisa.

¹⁶ Oco, a cime cetu, tuma akuenje vove va kasi love ha va vanjiliya umue wa loñoloha koku sika ohalupa. Eci espiritu lĩvi lia Suku li ku wila oco eye o sika kuenje ove o kala ciwa.

¹⁷ Oco Saulu wa sapuila akuenje vaye hati, Mbanjiliyili ulume o sika ciwa, u neneli.

¹⁸ Umue kakuenje wa popia hati, Nda kuliha umue, omõla a Jese u Beteleme, eye muẽle wa loñoloha koku sika, haeye onõi, haeye esualali, ukuotate koku vangula, oku u vanja wa posoka, kuenda vali Yehova o kasi laye.

¹⁹ Oco Saulu wa tuma olomunga ku Jese hati, Numise omõlove Daviti una ukuakulisa olomeme.

²⁰ Jese yu wa sokiya ocimbulu, wa kapako ombolo locipa covinyu kuenda okahombo, wa vi tuma lomõlaye Daviti ku Saulu.

²¹ Daviti weya ku Saulu, wa linga Kalumba kaye, wambayata ovimãleho viaye.

²² Kuenje Saulu wa tuma ku Jese hati, Tava okuti Daviti o kala ño kupange wange, ndu sole muẽle.

²³ Kuenje posi espiritu lĩvi lia Suku lia wilila Saulu oco Daviti wa nyañula ohalupa kuenje wa yi sika leka liaye. Oco Saulu wa tulumũha, wa kala ciwa kuenje espiritu lĩvi lio tunda.