I SAMUELE 15 - Embimbiliya - Bíblia Sagrada em Umbundu

¹ Samuele wa popia la Saulu, hati, Yehova wa numa oku ku waveka hu lingi Soma yomanu vaye va Isareli. Oco cilo, yevelela olondaka via Yehova.

² Ca popia Suku yolohoka ceci, Amaleke ndu yambuila eci a linga va Isareli, momo wa va sakalaisa vonjila eci va tunda ke Egito.

³ Oco kuende, ka ipaye amaleke loku nyõla cosi va kuete. Ku ka va kuatele ohenda. Nyõla cosi, lulume lukãi, loñaña loñañulũla, longombe lomeme, longamelo locimbulu.

⁴ Oco Saulu wongoluila omanu vo Telahimi kuenje wa va tenda. Ava va endela posi va tẽla ovita vivali kolohũlũkãi. Va Yuda va tẽla ekuĩ liolohũlũkãi.

⁵ Saulu weya kimbo lia Amaleke, wa lavekela vocimbota.

⁶ Saulu wa popia la va Keni, hati, Kuendi. Tundi pokati ka va Amaleke sanga ndu nyõlẽli pamosi lavo. Momo ene wa lingili va Isareli ohenda eci va tunda ke Egito. Oco va Keni va tunda pokati ka va Amaleke.

⁷ Saulu wa yula va Amaleke tunde ko Havila toke ko Siuri, imbo li kasi kutundilo we Egito.

⁸ Agage, Soma ya va Amaleke, wo kuata lomuenyo. Omanu vosi wa va nyõla losipata.

⁹ Puãi Saulu lomanu va supisapo Agage, va supisapovo evi via velapo pokati kolomeme, lolongombe lovinyama viosi via netisua kuenda otumeme kumosi la cosi ca silivila. Ka va tavele oku vi nyõla. Cosi ca pembuiwa la cosi ka ci silivila va ci nyõla pe.

¹⁰ Ondaka ya Yehova yeya ku Samuele yiti,

¹¹ Nda livela omo nda nola Saulu oku linga osoma, momo wa liweka oku ñuama loku pokola kovihandeleko viange. Samuele yu wa tema kuenje wa likutilila ku Suku uteke wosi.

¹² Samuele wa pasuka ociteketeke ha lisangi la Saulu. Va sapuila Samuele vati, Saulu weyile ko Karimele, wa litungila onjivaluko, noke wa tundako, wa lokila ko Giligali.

¹³ Oco Samuele weya ku Saulu. Saulu wa popia laye hati, Suku a ku sumuluĩse. Nda linga cosi ca popia Suku.

¹⁴ Samuele yu wo pula hati, Nda oco, okulila kuolomeme njevite ndoto kua lomboloka ndati? pamue okulila kuolongombe?

¹⁵ Saulu wa kumbulula hati, Omanu va popela olomeme lolongombe via velapo via va Amaleke. Va vi nena kulo ha va vi lumbi ku Yehova, Suku yove. Vikuavo tua vi nyõla pe.

¹⁶ Oco Samuele wa popia la Saulu hati, Talama handi, hu sapuila eci Yehova a popia lame uteke. Wo kumbulula hati, Ci sapula.

¹⁷ Samuele yu wa popia laye nati, Ndaño ove o sule kovaso ove muẽle haimo haveko hẽ Soma yapata a va Isareli? Yehova wa ku waveka hu lingi Soma ya va Isareli.

¹⁸ Kuenje eye Yehova wa kuĩha ocikundi hati, Kuende, ka nyõle pe vakuakandu vana va Amaleke, ka yake lavo te va nyõleha muẽle pe.

¹⁹ Oco nye kua pokuilile kondaka ya Yehova? Nye wa pundila eci ci silivila? Nye wa lingila ekandu kovaso a Yehova?

²⁰ Saulu wa kumbulula Samuele hati, Ame muẽle, ame nda pokola kondaka ya Yehova, ya ame nda lemũlũla ocikundi Yehova a nyĩha, nda nena Agage, osoma ya va Amaleke, lomanu va Amaleke nda va nyõla pe.

²¹ Omanu puãi, ovo muẽle va punda olomeme via velapo lolongombe lovina vikuavo vi silivila ha va vi lumbila ku Yehova Suku yove vo Giligali.

²² Samuele yu wa kumbulula hati, Yehova nga o sanjukila ovilumba vioku yoka levi vioku pia elisi ndeci a sanjukila oku pokola kondaka ya Yehova? Tala, okupokola kua velapo, okulumba ku sule. Okuyevelela kua velapo, ulela wolomeme u sule.

²³ Momo okusina kua lisoka lekandu liokutãha, lumbinde wa lisoka levĩho lioku fendela oviteka. Omo ove wa pañula ondaka ya Yehova oco eye wa ku pañulãvo okuti ku lingi vali osoma.

²⁴ Oco Saulu wa popia la Samuele hati, Nda linga akandu omo nda lueya ocihandeleko ca Yehova lolondaka viove, lomo nda kuatela omanu usumba loku tava kondaka yavo.

²⁵ Cilo nda samba, ngecele, tu tiukile oco ha fendele Yehova.

²⁶ Samuele wa kumbulula Saulu hati, Si tiukila love momo ove wa likala ondaka ya Yehova kuenje Yehova wa ku pañula okuti ku lingi vali osoma ya va Isareli.

²⁷ Eci Samuele a ñualapo ha endi oco Saulu wa kuata vonanga yaye kuenje ya toka.

²⁸ Samuele yu wa popia la Saulu hati, Etaili Yehova wa ku nyẽha uviali wa va Isareli, wo weca kukuẽle wa ku velapo.

²⁹ Kuenda vali Ulamba wa Isareli ka kembi ndãño oku pongoloka, momo eye hamunuko okuti o pongoloka.

³⁰ Saulu wa popia hati, Nda linga ekandu, haimo lumue sumbile kovaso akulu vomanu vange kuenda kovaso a va Isareli. Tu tiukile oco ha fendele Yehova Suku yove.

³¹ Kuenje Samuele wa tiukila la Saulu. Saulu yu wa fendela Yehova.

³² Oco Samuele hati, Neni kulo kokuange Agage osoma ya va Amaleke. Kuenje Agage weya kokuaye lonjolela hati, Ocili, okulula kuokufa kua pita.

³³ Samuele hati, Ndeci osipata yove ya pumbisa akãi omãla vavo haico nyoho o pumba omõla pokati kakãi. Samuele yu wa sasela Agage kovaso a Yehova vo Giligali.

³⁴ Samuele yu wa tiukila ko Rama. Saulu wa enda konjo yaye vo Givea imbo liaye.

³⁵ Samuele ka muĩle vali Saulu toke keteke liokufa kuaye, haimo Samuele wa sumua oku sokolola Saulu. Kuenje Yehova wa livela omo wa nola Saulu ha lingi osoma ya va Isareli.