I SAMUELE 13 - Embimbiliya - Bíblia Sagrada em Umbundu

¹ Saulu wa kala lanyamo (akuĩ a tatu) eci a fetika oku viala. Wa viala vi Isareli anyamo (ekui la avali).

² Saulu wa nola alume va Isareli olohũlũkãi vitatu. Olohũlũkãi vivali via kala la Saulu vo Mikimase kuenda vofeka yolomunda ya Betele. Ohũlũkãi yimosi ya kala la Yonatão vo Givea lia Benjamini. Omanu vakuavo wa va tiuwiya, omunu kombalaka yaye, omunu kombalaka yaye.

³ Yonatão wa ipãla kesongo lia va Filisiti una wa kala vo Givea. Va Filisiti va yeva okuti va Isareli va va katukila. Va Isareli va yeva okuti Saulu eye wa ipãla kesongo lia va Filisiti.

⁴ Va Isareli vosi va yeva okuti Saulu wa yula olohoka via va Filisiti. Va yevavo okuti va Isareli va suvukiwa la va Filisiti. Oco omanu va kovongiwa oku ongolokela ku Saulu vo Giligali.

⁵ Va Filisiti va lipongiyila oku liyaka la va Isareli, vongolola akãlu akuĩ atatu kolohũlũkãi, kuenda vakuakuendela kotuvalu olohũlũkãi epandu. Asualali vavo va soka ndeseke liokopalaya yokalunga. Va lamana, va tunga ocilombo cavo vo Mikimase, kutundilo wa Betavene.

⁶ Eci alume va Isareli va limbuka okuti va sakalala, momo omanu va suvala, oco omanu va salama valeva kuenda vovitunu, vamẽhi ovawe kuenda voviwundilo ndaño vatangi,

⁷ pamue va pita volonjiva oku yoka Yordão ha va endi kofeka ya Gadi la Gileada. Saulu handi wa siala ko Giligali. Omanu vosi vo kuama loku luluma.

⁸ Wa talamẽla oloneke epanduvali ndotembo yaco ya tukuile Samuele, Samuele puãi keyile ko Giligali kuenje omanu va fetika oku u sanduka.

⁹ Oco Saulu wa popia hati, Neni kokuange ocilumba coku pia elisi leci combembua. Leye wa lumba ocilumba coku pia elisi.

¹⁰ Tuli wa mala oku lumba ocilumba coku pia elisi, tala Samuele weya. Saulu wa tunda oku ka ñualẽhẽla laye loku u lama.

¹¹ Samuele wa pula hati, Wa linga nye? Saulu hati, Eci nda mõla ndomo omanu va fetika oku sanduka love kueyile voloneke via tukuiwa, lomo va Filisiti vongolokela vo Mikimasi,

¹² oco nda popia siti, Va Filisiti va lokela kokuange ko Giligali osimbu ame sia likutililile oku pinga ekuatiso ku Yehova. Oco nda likolisila kuenje nda lumba ocilumba coku pia elisi.

¹³ Samuele yu wa popia la Saulu hati, Wa linga cĩvi. Kua pokuile kocihandeleko ca Yehova, Suku yove, cina a ku handeleka. Momo cilo Yehova nda wa tumãlisa hũ uviali wove ku va Isareli.

¹⁴ Cilo puãi uviali wove ka u tumãla. Yehova wa livanjela ulume ukuotima waye muẽle. Yehova wo nola ha lingi osoma yomanu vaye momo ove kua lingile eci Suku a ku handeleka.

¹⁵ Samuele yu wa votoka, wa tunda ko Giligali ha lamanela ko Givea, imbo lia Benjamini. Kuenje Saulu wa tenda omanu va kala laye kuenje va kala ovita epandu kalume.

¹⁶ Saulu lomõlaye Yonatão kuenda omanu va kala lavo va siala vo Geva, imbo lia Benjamini. Va Filisiti puãi va tungila ocilombo cavo vo Mikimasi.

¹⁷ Kocilombo ca va Filisiti kua tunda vakuakupunda, va litepa ovisoko vitatu. Ocisoko cimue ca loña ko Ofara, kofeka ya Suala.

¹⁸ Ocisoko cikuavo ca loña ko Betehorone, ocisoko cikuavo ca loña kongave ya imba ovaso kocimbota ca Sevomi konẽle yekalasoko.

¹⁹ Vofeka yosi ya Isareli ka mua kaile ocivinda, momo va Filisiti vati, Sanga va Isareli va litelela olosipata lolonjelia.

²⁰ Puãi va Isareli vosi, omunu omunu, va lokaila ku va Filisiti oku lepikisa olombiku violosialuwa latemo lolondiaviti kuenda olomĩla.

²¹ Kuenje oku feta va feta olombiku violosialuwa latemo olopalata vitatu vitatu; olondiaviti lolomĩla va feta olopalata vivali vivali.

²² Oco eteke liovita, povaka omanu va kala la Saulu la Yonatão, ka pa kaile ndaño osipata ndaño onjelia. Saulu puãi lomõlãye Yonatão va kala lavio.

²³ Asualali va va Filisiti va tundila pohopoke ya Mikimasi.