I SAMUELE 12 - Embimbiliya - Bíblia Sagrada em Umbundu

¹ Samuele wa popia la va Isareli vosi hati, Tali, ndo yeveleli cosi wa popi lame, haime ndo noleli osoma.

² Cilo tali, osoma yi pita kovaso ene. Ame nda kuka, haime ndukuawele, lomala vange vava va kasi lene. Ame nda pita pita kovaso ene tunde kutila wange toke ketaili lilo.

³ Cilo amilo, misili kovaso a Yehova, kuenda kovaso ombuavekua yaye. Ongombe yelie nda punda? Ocimbulu celie nda punda? Pamue helie nda liaña. Helie nda kangisa? Pamue kulie nda tambula ovitukiko ha vi sitika vovaso? Misi laco kuenje ndi ci tiula.

⁴ Ovo vati, Kua la tu liaña pamue oku tu kangisa. Kua la tambula ovitukiko komunu.

⁵ Eye wa popia lavo hati, Suku eye ombangi, ombuavekua layevo ombangi okuti ene ka wa la sangi cimue peka liange. Vati, Eye ombangi.

⁶ Samuele wa popia lomanu hati, Yehova una wa nolele Mose la Arone haeye wopile olosekulu viene ke Egito eye ombangi.

⁷ Oco talamẽli handi okuti ndu livondeli ku Yehova loku pitulula ovilinga viosi via Yehova vioku popela, vina o lingili ene lolosekulu viene.

⁸ Eci Yakoba a enda ke Egito kuenje va Egito va va kangisa oco olosekulu viene via vilikiya ku Yehova. Yehova yu wa tuma Mose la Arone kuenje vopa olosekulu viene ke Egito, va va tungisa kulo.

⁹ Ovo puãi va ivalako Yehova, Suku yavo, oco eye wa va landisa peka lia Sisera, kesongo liolohoka via Yavini, osoma ya Hasore, kuenda vali peka lia va Filisiti, lopeka liosoma ya Moavi, kuenje va liyaka lavo.

¹⁰ Kuenje va vilikiya ku Yehova vati, Tua lueya omo tua yanduluka Yehova, tua vumba olosuku via Baale levi via Asitorete. Cilo puãi, tu popele peka liovanyali vetu oco tu ku vumba.

¹¹ Yehova yu wa tuma Yerubaale la Baraka kuenda Yefita la Samuele kuenje wo popeli peka liovanyali vene kolonele viosi. Kuenje wa tungi yu wa koki.

¹² Eci wa mõli okuti Nahase, osoma ya va Amoni, wo katukili oco wa popi lame hoti, Hacoko. Osoma yi tu viala!— osimbu Yehova, Suku yene, eye Soma yene.

¹³ Cilo, tali osoma yina wa noli, haiyo wa pingi. Yehova wo wihi osoma.

¹⁴ Nda vu sumbila Yehova loku u vumba loku yevelela kondaka yaye, nda ka vu ñualelapo ocihandeleko ca Yehova, nda ene losoma yu viali, vosi yene, nda vu kuama Yehova, Suku yene, nda ciwa.

¹⁵ Puãi nda ka vu yevelela kondaka ya Yehova, nda vu ñualelapo ocihandeleko ca Yehova, oco eka lia Yehova liu pongolokelimo ene losoma yene.

¹⁶ Oco talamẽli handi. Vanji ocikomo cinene Yehova a linga kovaso ene.

¹⁷ Etaili hẽ, heteke lioku ungulako otiliku? Mbilikiya Yehova okuti o tuma ocilemilo lombela, oco ene vu limbuka loku nola ndomo ekandu liene lia lua, lina wa lingili kovaso a Yehova eci wa pingi osoma.

¹⁸ Oco Samuele wa vilikiya ku Yehova, Yehova yu wa tuma, eteke liaco muẽle, ocilemilo lombela. Kuenje omanu vosi va sumba ca lua Yehova kuenda Samuele.

¹⁹ Omanu vosi va popia la Samuele vati, Likutilila akuenje vove ku Yehova Suku yove, okuti ka tu fi, momo kakandu etu alua ale tua vokinyako vali evĩho eli lioku pinga osoma.

²⁰ Samuele yu wa popia lomanu hati, Ko ka kuati usumba, ocili wa lingi evĩho eli liosi, haimo lumue, ko ka liweki oku kuama Yehova, puãi vumbi Yehova lutima wene wosi.

²¹ Ko ka talukili ovina viesanda vina ka vi kuatisa haivio ka vi popela, omo viesanda muẽle.

²² Momo Yehova ka yanduluka omanu vaye omo onduko yaye yi kola. Momo ca sanjuisa Yehova oku u noli ho lingi omanu vaye muẽle.

²³ Kuenda vali ame, ci kale kupãla lame cokuti kovaso a Yehova ndinga ekandu lioku liweka oku vu likutilila. Ndu longisi onjila yocili haiyo yesunga.

²⁴ Cinene oku vumba Yehova loku u vumba ocili lutima wene wosi. Ivaloki ovina vinene o lingili.

²⁵ Puãi nda haimo vu lingili ekandu vu nyõleha, lene la Soma yene.