I SAMUELE 11 - Embimbiliya - Bíblia Sagrada em Umbundu

¹ Nahase u Amoni wa enda ko Yavesi Gileada, wa li ñuala ocingonja ha li kuata. Omanu vosi va Yavesi va popia la Nahase vati, Tu sapuile eci o tu kisika okuti love letu tu ci likuminya kuenje etu tu ku vumba.

² Puãi Nahase u Amoni wa popia lavo hati, Cimosi lika ndu kisiki ceci, Ene vosi ndu tofoli ovaso okondio okuti ci kutisa osõi va Isareli vosi. Kovaso yaco oco ndi likuminya lene ndomo ene vu mbumba.

³ Akulu va Yavesi va popia laye vati, Tu imbisilepo oloneke epanduvali okuti tu tuma olomunga kofeka yosi ya Isareli. Kovaso yaco, nda ka kuli umue o tu popela, oco tu lieca noke kokuove.

⁴ Eci olomunga vieya ko Givea, kimbo lia Saulu, oco va sapula ondaka yaco komanu vosi, kuenje omanu vosi va lia ca lua.

⁵ Kotembo yaco Saulu wa kala vonjila oku senga olongombe loku iya kimbo. Saulu yu wa pula hati, Omanu nye ci va kuete? Va kasi loku lilila nye? Oco va sapuila ondaka yolomunga via tunda ko Yavesi.

⁶ Eci Saulu a yeva ondaka yaco oco Espiritu lia Suku lia wila longusu kuenje onyeño yaye ya wenguka enene.

⁷ Wa nyañula olongombe vivali, wa vi teta teta otuvinimbu, wa tu eca peka liolomunga, wa tu tuma kofeka yosi ya Isareli, hati, U wosi ka tundi oku kuama Saulu la Samuele oco ci lingiwa lolongombe viaye. Oco ocinjoko ca Yehova ca wila komanu vosi kuenje veya ndomunu umosi.

⁸ Eci a vongoluila vo Beseke oco va Isareli va tẽla ovita vitatu kolohũlũkai kuenda va Yuda va tẽla akui atatu kolohũlũkai.

⁹ Kuenje va vangula lolomunga vieya vati, Sapuili va Yavesi Gileada hoti, Hẽla eci utanya u tua oco vu popelua. Eci olomunga vieya kuenje va ci sapuila oco va yavesi va sanjuka enene.

¹⁰ Oco va Yavesi va popia vati, Hẽla tu lieca kokuove, love o linga letu cosi o yongola.

¹¹ Hela liaco Saulu wa tepisa omanu vaye kovisoko vitatu. Kotembo yoku lendela kuociteketeke oco va iñila vocilombo ca va Amoni, kuenje va va nyõla toke utanya wa tua. Ava va supapo va sandoka okuti ndaño vavali ka va kaile pamosi.

¹² Oco omanu va popia la Samuele vati, Velie va pulile vati, Saulu nga o tu viala? Nena alume vaco okuti tu va ipãla.

¹³ Saulu puãi hati, Lomue ipãliwa etali, momo etali Yehova wa popela Isareli.

¹⁴ Samuele yu wa popia lomanu hati, Enjui, tuendi ko Giligali oko tu tumbuila uviali.

¹⁵ Oco omanu vosi va enda ko Giligali, ko Giligali haiko muẽle va vialekela Saulu ndosoma kovaso a Yehova, haiko va lumbila Yehova ovilumba viombembua kuenje haikovo Saulu lomanu vosi va Isareli va yolelela ca lua.