I SAMUELE 10 - Embimbiliya - Bíblia Sagrada em Umbundu1 Samuele wa nyañula okacitau kulela, wo witila kutue waye, wo sipula, hati, Yehova hẽ, ka ku wavekele okuti o linga osoma yomanu vaye va Isareli? Ove o viala omanu va Yehova, haive o va popela peka liovanyali vavo va va ñuala. Eci cu ku lingila ondimbukiso okuti Yehova wa ku waveka hu lingi Soma yocipiñalo caye. 2 Etaili, eci o tunda kokuange, peyambo lia Rahele vo Selisa, vofeka ya Benjamini, o ka sangapo alume vavali. Va ka popia love vati, Ovimbulu wa kala loku vanjiliya via molẽha. Cilo so ka kuatele vali ovimbulu ohele, o ku kuatela ove ohele hati, Omõlange hẽ, ndinga ndati siu sangi? 3 Oco ove wenda ño toke o pitila ko carvalho ya Tavore. Oko o ñualẽhẽla lalume vatatu va kasi loku lamana ku Suku ko Betele, umue wambata otuhombo tutatu, ukuavo olombolo vitatu, ukuavo ocipa covinyu. 4 Va ku lama, va kuiha olombolo vivali, love o vi tambula povaka avo. 5 Noke ove wenda ko Givea Elohimi, kuna ku kasi asualali va va Filisiti. Oko, poku iñila vimbo, o ñualẽhẽla lovaprofeto vamue va kasi loku vooloka ponumbuko, vambata ovisikilo ndeci ohalupa, lotulialia, lolombendo lalimba, va imba owanji. 6 Oco Espiritu lia Yehova li ku wila longusu yalua hu imbila kumue lavo owanji waco kuenje o pongoloka. 7 Eci olondimbukiso viaco viu ku sanga oco ove o linga cosi ciya kokuove momo Suku o kasi love. 8 Kuenje o livanga oku enda ko Giligali. Lame njiya kokuove ha si lumbi ovilumba vioku pia elisi levi viombembua. O talamẽla oloneke epanduvali toke njiya kokuove oku ku lekisa eci o linga. 9 Eci Saulu a imba onyima ha si Samuele, oco Suku wo wiha utima wiñi; lolondimbukiso viaco viosi via mõleha eteke liaco. 10 Eci veya ko Givea oco ovaprofeto vamue va ñualẽhela. Espiritu lia Suku lio wila longusu ya lua kuenje eye wa imba owanji pokati kavo. 11 Eci vosi vo kũliha ale va mõla ndomo a imbila owanji kumue lovaprofeto oco va livangula pokati vati, Nye eci ceya komõla a Kisi? Saulu nga layevo o tendiwa pokati kovaprofeto? 12 Kuenje umue ukuimbo wa kumbulula hati, Isiavo helie? Oco ca linga olusapo luti, Saulu nga layevo o tendiwa pokati kovaprofeto? 13 Eci a mãla oku imba owanji oco weya konumbuko. 14 Epalanga lia so ya Saulu wa popia laye lukuenje waye hati, Waili pi? Oco eye Saulu hati, Koku vanjiliya ovimbulu. Eci tua limbuka okuti ka vi mõleha oco tua enda ku Samuele. 15 Epalanga lia isia ya Saulu yu wa linga hati, Sapuileko eci Samuele a popia lene. 16 Saulu wa kumbulula hati, Wa tu sapuila okuti ovimbulu via mõleha. Puãi ondaka yoku viala, yina ya popele Samuele, ko yi sapuilile. 17 Oco Samuele wongoluila va Isareli vo Misipa. 18 Wa popia la va Isareli hati, Ca popia Yehova, Suku ya va Isareli, ceci, hati, Va Isareli nda vopa ve Egito, ndo popeli povaka a va Egito kuenda povaka olofeka viosi vio talisi ohali. 19 Ene puãi etaili lilo wa likali Suku yene, Una wo popeli kolohali lolongongo viosi, hoti, Heyeko. Tu ihe osoma yi tu viala. Oco cilo lilekisi kovaso a Yehova onjo lonjo, epata lepata. 20 Oco Samuele wa nena ocipepi apata osi a va Isareli kuenje ocela ca veta epata lia Benjamini. 21 Noke wa nena olonjo viosi viepata lia Benjamini kuenje ocela ca veta onjo ya va Matari. Oku sulako wa nena omãla vosi va Matari kuenje ocela caco ca veta Saulu omõla a Kisi. Puãi eci vo vanjiliya ka vo sangele. 22 Oco va pula vali Yehova vati, Omunu waco hẽ, weya ale? Kuenje Yehova hati, Tala, wa salama pokati kovikuata. 23 Oco va lupuka vo wupako. Eci a talama pokati komanu, eye wa lepa okuti omanu vosi va sulila ño kapepe aye. 24 Samuele yu wa popia lomanu hati, Vu lete hẽ u Yehova a nola? Pokati komanu ka pali ukuavo wa lisoka laye. Kuenje omanu vosi va vilikiya vati, Osoma yi kale hũ lomuenyo. Oco Samuele wa lomboluila omanu omoko yuviali lovikele viawo. Wa vi soneha velivulu kuenje wa li seleka kovaso a Yehova. 25 Kovaso yaco Samuele wa katula omanu vosi ha va endi, omunu konjo yaye, omunu konjo yaye. 26 Saulu layevo wa enda konjo yaye ko Givea, kuenda vamue alume olonope haivo va kolela vovitima eci ca popia Suku, va enda laye. 27 Vamue puãi ka va silivila va linga vati, Ulume o nga o tu popela ndati? Vo pembula. Ka vo nenelele ombanjaile. Eye puãi woha ño. |
Umbundu Bible © United Bible Societies, 1963.
Bible Society in Angola