I SAMUELE 1 - Embimbiliya - Bíblia Sagrada em Umbundu

¹ Ko Rama Sofi, kolomunda vi Efarimi kua kala ulume, onduko yaye Elikana, omõla a Yerohama, omõla a Elihu, omõla a Tohu, omõla a Sufe, eye u Efarimi.

² Leye wa kala lakãi vavali, ukuavo onduko yaye Hana, ukuavo onduko yaye Penina, Penina wa cita omãla, Hana puãi ka citile.

³ Ulume waco, ulima kulima, wa tunda tunda kimbo liavo ha lamana ko Silo oku fendela loku lumbila Yehova yolohoka ovilumba. Ovitunda via Yehova kotembo yaco, Hafeni la Finehase, omãla va Eli.

⁴ Eteke Elikana a lumba wa eca ovikepa kukãi waye Penina lokomãla vaye valume lomãla vaye vakãi,

⁵ puãi ku Hana, ndaño wo sola, wa eca lika ocikepa cimosi momo Yehova wo sitika vimo.

⁶ Kuenje osepakai yaye yo popela vasende loku u nyumalisa omo Yehova wo sitika vimo.

⁷ Oco ca enda ño-o ulima kulima. Olonjanja viosi eci a lamana konjo ya Yehova oco yo popela vasende. Oco Hana wa lila lila calua, ka tavele oku lia.

⁸ Oco veyaye Elikana hati, A Hana, o lilila nye? Nye ku lila? Utima wove wa nyumalela nye? Ame hẽ, sia velelepo kokuove okuti ekuĩ liomãla valume li sule?

⁹ Eci va mala oku lia loku nyua vo Silo oco Hana wa votoka. Otembo yaco ocitunda Eli wa tumãla komangu yaye ocipepi locikuli cepito lionembele ya Yehova.

¹⁰ Hana wa sumua enene vutima kuenje wa kala loku likutilila ku Yehova loku lila calua.

¹¹ Wa lisilavo ocisila, hati, A Yehova Ukualohoka, nda o tava oku vanja kohali yufeko wove loku njivaluka, okuti oku njivala hacoko, puãi weca kufeko wove omõla ulume, ame omõlaco ndu weca ku Yehova oloneke viosi viomuenyo wange. Kutue waye ka ku piti omoko yomuto.

¹² Osimbu a kala loku likutilila ku Yehova Eli wa vanja omẽla yaye.

¹³ Hana wa kala oku likutilila vutima, omẽla lika ya menoha, ondaka ka ya yevalele. Oco Eli wa sima hati, Ukãi o wa kolua.

¹⁴ Eli yu wa popia laye hati, Toke kotembo yipi o kolua? Litepa lovinyu.

¹⁵ Hana puãi wa kumbulula hati, Kotoko, a Ñala, ame ndukãi wa sumua enene vutima. Sia nyuile ndaño ovinyu ndaño vikuavo vi koluisa, puãi nda kala loku lekisa utima wange ku Yehova.

¹⁶ Ku ka sokise ame ndimõlove lukãi wa viha, momo otembo yosi okuliñuñula kuange ku tunda kutima we yuka ohele lesakalalo.

¹⁷ Eli yu wo tambulula hati, Kuende lombembua. Suku ya Isareli a ku muise eci wo lomba.

¹⁸ Leye ukãi wa popia hati, Ame ndimõlove sange esumũlũho kovaso ove. Oco, wa enda, wa lia, locipala caye ka ca sumuile vali.

¹⁹ Va pasuka omẽle ociteketeke, va fendela Yehova, noke va tiukila konjo yavo ko Rama. Elikana wa kũlĩha Hana ukãi waye kuenje Yehova wo wivaluka.

²⁰ Noke Hana we mina kuenje wa cita omõla ulume. Wo luka Samuele momo hati, Ndo lomba ku Yehova.

²¹ Kuenje ulume Elikana wa lamana kumosi lonjo yaye yosi ha lumbi ku Yehova ocilumba cunyamo loku lemulula ocisila caye.

²² Hana puãi ka lamanele, wa sapuila veyaye hati, Tuli omõla a sumuha ndu tuala okuti o molẽha ku Yehova loku kalako otembo yosi.

²³ Veyaye Elikana wo kumbulula hati, Eci ca ku sunguluka oco o linga. Talamẽla toke wo sumula. Cinene Suku o ku lemuluisa olondaka viove.

²⁴ Oco, eci wo sumula wa enda laye, wambatavo ongombe yanyamo atatu lefa limosi liosema locipa covinyu. Wo tuala konjo ya Yehova ko Silo. Lomõlaco omõla muele.

²⁵ Oco va ipãla ongombe kuenje va tuala omõla ku Eli.

²⁶ Hana yu wa popia hati, A cime cange, ndoku popia muẽle ocili, lomuenyo wove muẽle, ame ndukãi una wa kaile kulo kovaso ove oku likutilila ku Yehova.

²⁷ Nda lombela omõla. Cilo Yehova wa yeva elombelo nda lombele.

²⁸ Oco ndo kundika ku Yehova. Omuenyo waye wosi muẽle wa kundikiwa ku Yehova. Kuenje oko va likutilila ku Yehova.