I PETULU 5 - Embimbiliya - Bíblia Sagrada em Umbundu

¹ Oco ndungula akulu va kasi pokati kene momo ame ndukuluvo, haime ndimbangi yohali ya Kristu, kuenje nambulavo ulamba u tukuluiwa noke.

² Lavi ocunda ca Suku co kundikilui, halocikukuiko, puãi momo vu kuete utima waco, hamekondako liocipululu conganyu, te lutima wombili ndeci Suku o yonguili,

³ haloku tulamelako ava va kundikiwa kokuene, te oku eca ongangu kocunda.

⁴ Oco, eci ungombo unene a tukuluka, vu tambula ekolowa liulamba ka li takata.

⁵ Haico ene amalehe, pokoli kakulu. Vosi yene, okuliketisa ku linge uwalo wene, kuenje livumbi pokati, momo Suku o yaka la vakueyengu, puãi ava va liketisa o va linga ohenda.

⁶ Oco lisepuisi vemẽhi lieka lia pama lia Suku, okuti kotembo yaye o wamisi kunene.

⁷ Ohele yene yosi yi yeki kokuaye momo eye o vu lava.

⁸ Lunguki. Lavululi. Unyali wene eliapu o ñuala ñuala ndohosi yi koma oku sandiliya u a lia.

⁹ Pami lekolelo liene kuenje tamalali laye. Ivaloki okuti vakuẽle voluali luosi va talavo ohali ndene.

¹⁰ Kuenje, kovaso yoku tala ohali okasimbu kamue, oco Suku ukuacali cosi, haeye wo kovongeli kulamba waye ka u pui u kasi vu Kristu, eye muẽle o vu kanguisa, haeye o vu tumalisa loku vu pamisa.

¹¹ Kokuaye ku kale uviali oloneke ka vi pui. Amene.

¹² Okokanda kalo ñasi loku ka tuma kokuene peka lia manjange nda kolela ca lua, Siluano. Nda ka tuma oku vu lungula loku imba uvangi okuti ocali eci nda lombolola oco ocali cocili ca Suku. Kolipo laco.

¹³ Ekongelo li kasi ko Bavulono, hailio lia noliwa ndene, lio lami. Omõlange Marko layevo wa tuma ocilamo.

¹⁴ Lipasuli pokati lesipulo liocisola. Ombembua yi kale lene vosi vu kasi vu Kristu.