I PETULU 4 - Embimbiliya - Bíblia Sagrada em Umbundu

¹ Omo Kristu a tala ohali eci a kala vetimba, oco lenevo lipongiyili utima waco, momo u wa tala ohali vetimba wa sia akandu.

² Wa a sila okuti otuneke tuo sialelapo oku kala vetimba ka endaenda vali loloñeyi vietimba te locipango ca Suku.

³ Otembo ya pita yi vu tẽle oku linga ndeci vakualofeka va sole oku linga, okuti oku sanjukila upuepue kuenda umbuahuku, loku kolua ovinyu, layele, loku pilula, loku fendela oviteka.

⁴ Cilo va lisalukako omo ka wendaendi vali lavo kayele avo lo kovombondo avo, kuenje vo fũkĩlisi.

⁵ Puãi eteke liavo liya eci va lomboluila u o tãilili ale oku tetuluila ava va kasi lomuenyo lava va fa.

⁶ Oco ondaka yiwa ya kundiwila ndaño ava va fa, okuti ndaño osimbu va kaile vetimba va tetuluiwile ndomanu, haimo vespiritu va mola omuenyo ko pui wa Suku.

⁷ Esulilo liovina viosi vi kasi ocipepi. Oco lunguki. Feleveli lolohutililo.

⁸ Cinene ceci, Kolisiko oku lisola pokati, momo ocisola ci tuvika akandu a lua.

⁹ Lipoki pokati, oku liyeya hakoko.

¹⁰ Omunu omunu a talavaye longavelo a tambula, oku vumba vakuavo ndukalei wa sunguluka woviali viñi viñi via Suku.

¹¹ Wosi o popia, a popie ndu o sapula olondaka viovitumasuku. Wosi o vumba a vumbe ndu o talavaya longusu yo wiha Suku. Ci lingiwe okuti kovina viosi Suku o muisua ulamba la Mitakati Yesu Kristu. Kokuaye ku tiama ño-o hũ ulamba kuenda uviali. Amene.

¹² A vakuacisola, ko ka komoheli ekangiso lia soka ndondalu liya kokuene oku vu nyika. Ko ka simi hoti, Cimue ka ca siatele ceya kokuetu.

¹³ Puãi yoleli omo wa iñili vohali ya Kristu okuti vu yolelavo loku sanjuka eci ulamba waye u tukuluiwa.

¹⁴ Nda vo wimbuili onduko ya Kristu nda wa sumũlũhi, momo nda oco, Espiritu liulamba, okuti Espiritu lia Suku, li kasi lene.

¹⁵ Pokati kene lomue ka ka tale ohali omo a linga omondi, pamue ocimunu, pamue ondingaĩvi, pamue ukuasiata.

¹⁶ Haimo, nda umue o tala ohali omo ukua Kristu, ka ka kuate osõi, puãi a kemainyaile Suku onduko yaco.

¹⁷ Momo otembo yeya yokuti ekanga li fetika, kuenje li fetikila pokati komanu va Suku. Kuenje nda li fetika letu, efulilo liava ka va tavele kondaka yiwa ya Suku li kala ndati?

¹⁸ Ukuesunga nda o popelua tupu wa si oku nyõleha, u ukuakutomba kuenda ukuevĩho o kala ndati?

¹⁹ Oco, ava va tala ohali locipango ca Suku, va linge esunga, kuenje va yeka ovimuenyo viavo kusovoli wocili.