I PETULU 3 - Embimbiliya - Bíblia Sagrada em Umbundu

¹ Haico ene akãi, pokoli ku vaveyene okuti vamue, ndaño ka va tava kondaka, kuenda ndaño ondaka yimosi ka yi popiwa, haimo va kokiwa lovilinga viakãi vavo,

² eci va mola ovilinga viene viesunga lesumbilo.

³ Okuliposuisa kuene ka ku ka linge okuliposuisa kuokilu ndeci oku livinda ocifuko, loku limiangulula lulu, pamue oku wala uwalo wolonambelo;

⁴ ku linge puãi oku posuisa omunu wovutima luwalo ka u pongoloka wespiritu, haiwo wusima kuenda wumbombe. Eposo liaco olio li panduiwa la Suku.

⁵ Haico, kosiahũlu akãi va kola, vana va lavokaila ku Suku, va liposuisa loku pokola ku vaveyavo,

⁶ ndeci Sara a pokuile ku Avirahama kuenje wo tukola hati, Ñala. Cilo ene vu linga omãla vaye nda vu linga esunga, kuenje ko tava okuti cimue cu yokokisi.

⁷ Haicovo ene alume, kali lakãi vene lolondunge. Sumbili ukãi ndocikuata ca leñela, momo wakapiñala kumuamue kocali comuenyo. Nda ka vu ci lingi vu tatekiwa oku likutilila cocili.

⁸ Oku sulako mopia siti, Ene vosi, kali lutima umuamue. Lingi vakuahenda. Kali locisola coku sola vakuẽle. Lingi ambombe kuenda asima.

⁹ Ko ka fetuluinyi evĩho levĩho, pamue etuka letuka, cene oku likutilila loku kuatisa, omo oco wa kovongiwili okuti vu piñala esumũlũho.

¹⁰ Momo, U o yongola oku sola omuenyo loku mola oloneke viwa, elimi liaye li liweke kevĩho, lomẽla waye ka u ka popie elimbi.

¹¹ A liweke kevĩho, a linge lawa. A sande ombembua loku yi landula.

¹² Momo ovaso a Ñala a lete vakuesunga, lovatui aye a yevelela olohutililo viavo. Puãi ocipala ca Ñala ci nyumalela olondingaĩvi.

¹³ Nda vu kuete ombili yoku linga esunga elie u lingi cĩvi?

¹⁴ Ndaño vu tala ohali mekonda liesunga, haimo wa sumũlũhi. Ko ka va kuateli usumba ndaño oku va yokokela.

¹⁵ Puãi vovitima viene sumbili Kristu nda Ñala. Olonjanja viosi lipongiyi okuti vu tẽla oku kumbulula komunu wosi o pula oku kũlĩhisa elavoko vu kasi lalio. Ci lingi puãi lumbombe kuenda lesumbilo.

¹⁶ Kali lutima wa sunguluka, okuti, eci vu lavisua, ava vo fũkĩlisili ovilinga viene viwa vu Kristu, va kutiwa osõi.

¹⁷ Momo, hise oku yambuiwa mekonda lioku linga esunga, nda oco Suku a panga, oku yambuiwa mekonda lioku linga cĩvi, hacoko.

¹⁸ Momo Kristu layevo wa fa, wa fila olumue akandu, okuti ukuesunga wa fila vakuakandu okuti o tu tuala ku Suku. Wa pondiwa vetimba puãi wa kuata vali omuenyo vespiritu.

¹⁹ Kuenje vespiritu haimo a kundila ondaka yiwa. Wa yi kundila ovilelembia via kala vokayike.

²⁰ Kosiahũlu koloneke via Noha, eci ovilelembia viaco ka via pokuile, oco epandi lia Suku lia talamela osimbu ocimbaluku ca tungiwa. Kuenje omanu vamue ño vatito, okuti ecelãla lika, va popeliwa kovava omo va kala kocimbaluku.

²¹ Eci ci linga ocisetahãi cepapatiso. Cilo epapatiso liu popela, omo Yesu Kristu a pinduka. Ka li popela ndoku yuisa etimba lia liña, puãi li lekisa oku pinga okuti Suku o wihi utima we lipua.

²² Yesu Kristu wa enda kilu, yu o kasi kondio ya Suku, kuenje ovangelo lolombiali lolosoma via tiamisua kokuaye.