I PETULU 2 - Embimbiliya - Bíblia Sagrada em Umbundu

¹ Oco, imbipo upombo wosi, lelimbi liosi, loku likembisa, kuenda alivelo ãvi osi, lalundi osi.

² Liveli ndoloñaña asenjele ovitima ana ka a kuete elimbi. A liveli okuti vu kulila kepopelo,

³ momo kohenda ya Ñala wa mahiko ale.

⁴ Enjui kokuaye, eye ewe liomuenyo lia inasiwa lomanu puãi lia noliwa la Suku kuenje li kuete esumbilo.

⁵ Lene muẽle, lingi ndovawe a kuete omuenyo, okuti onembele y'Espiritu yi tungiwa lovawe aco. Vonembele yaco ene vu linga ovitunda vi kola, evi vi lumba ovilumba viespiritu, vina via sungulukila Suku, kuenje vi lumbiwa vonduko ya Yesu Kristu.

⁶ Momo ocisonehua ca popia citi, Tala, ñapa vo Siono ewe. Ewe liaco lia noliwila oku linga ewe lievindi, hailio lia sumbiwa. Lu wo kolela ka kutiwa osõi.

⁷ Oco, kokuene wa koleli, eye wa sesamela esumbilo, puãi kuava ka va kolelele, Ewe olomesele via inasi, olio lia linga liokilu lievindi

⁸ kuenda vali, citi, Ewe liaco liocilondokua, hailio ewe li va tatamisa. Va lilondoka omo va sinila ondaka ya Suku, ndeci ca va tukuiwila ale.

⁹ Ene puãi, vumbuto ya noliwa, haene vuvitunda viusoma, vufeka yi kola, vucikumba ca Suku, okuti vu lekisa ovilinga vi komohisa viona wo kovongi ho tundi vowelema, ha wivi kocinyi caye ci komohisa.

¹⁰ Kotembo yale ka wa kaili omanu, kaliye puãi vumanu va Suku. Ale ka wa muili ohenda, kaliye puãi wa moli ohenda.

¹¹ A vakuacisola, ndu vetiyi ndakombe kuenda ndovingendeleyi, siti, Yuvuli oloñeyi vietimba, vina vi yaka lutima.

¹² Kali lovituwa via sunguluka pokati ka vakualofeka, okuti, nda vo lundili ndolondingaĩvi, va mola ovilinga viene viwa, kuenje va sivaya Suku veteke liepasulo.

¹³ Mekonda lia Ñala, pokoli kovihandeleko viosi viomanu vakualomangu, ci kale kosoma yinene ndu wa piãla,

¹⁴ ci kale kolonguluvulu via tumiwa losoma oku yambula olondingaĩvi loku sivaya olondingaiwa.

¹⁵ Momo Suku wa panga okuti wimuli onumbi yaveke lovilinga viene viwa.

¹⁶ Kali ndomãla vamãle, haimo lumue, umãmãle wene ka u ko wihi omoko yoku linga akandu. Lingi ndakuenje va Suku.

¹⁷ Sumbili omanu vosi. Soli vakuẽle. Sumbi Suku. Sumbili Soma.

¹⁸ Akuenje, pokoli ku vacime cene lesumbilo liosi, ava va kuete esunga lohenda lika, havoko, te lava va kãla lavovo.

¹⁹ Momo omunu o panduiwa nda ivaluka ocikele caye kovaso a Suku kuenje o pandikisa lohali, ndaño ohali yaco hayesungako.

²⁰ Nda vu linga cĩvi kuenje vo veti, ndaño vu tala ohali yaco lepandi, vu sesamela ndati oku panduiwa? Puãi, nda vu tala ohali lepandi eci vu linga esunga, oco ci panduiwa la Suku.

²¹ Momo oco wa kovongiwili. Kristu wo taleli ohali, kuenje wo sili ongangu yokuti vu kuama volomãi viaye.

²² Eye ka lingile ekandu, lelimbi ka lia sangiwile vomẽla waye.

²³ Eye, eci vo lavisa, ka va tiuwilile elaviso, leci vo talisa ohali, ka sokoluile oku va fetuluinya, puãi wa talamela u o tetulula olondaka lesunga.

²⁴ Eye muẽle wa tu ambatela akandu etu vetimba liaye eci lia valeliwila kekulusu. Wa ci lingila okuti eci tua fa kakandu, oco tu kuata omuenyo kuenje tu litumbikila oku linga esunga, Wa sakuiwi lovisimbimbi viaye.

²⁵ Momo wa kaili loku tungayala ndolomeme, kaliye puãi, wa tiukili kungombo wovitima viene, haeye ukuaku vi lava.