I PETULU 1 - Embimbiliya - Bíblia Sagrada em Umbundu

¹ Ame ndi Petulu, haime ndupostolo wa Yesu Kristu, Ndi sonehela vakuetavo va sandokaila kolonele kuiñi kuiñi, ko Pondu lo ko Galatia, lo ko Kapadokia, lo ka Asia, lo ko Bitunia.

² Ene wa noliwi kuenda wa tukuiwi ale la Suku Isia, haene wa kolisiwili le Espiritu okuti vu pokola ku Yesu Kristu, kuenje vu nyilua losonde yaye. Ocali ci love kokuene kuenda ombembua.

³ Suku, Isia ya Ñala yetu Yesu Kristu, a sivayiwe. Tua citiwa evali lohenda yaye ya lua, kuenje, omo Yesu Kristu a pinduiwa kuava va fa, oco tu kuete elavoko li kasi lomuenyo.

⁴ Tua citiwila ocipiñalo ka ci taki, haico ca pua atondelo, kuenje ka ci kunguka. Ocipiñalo caco co solekiwili kilu.

⁵ Omo vu kasi lekolelo, oco unene wa Suku u vu lava toke vu piñala epopelo li tãilili ale oku situluiwa koloneke via sulako.

⁶ Eci, vu ci sanjukila, ndaño cilo vu nyikiwa lohali yiñi yiñi okasimbu kamue.

⁷ Vu nyikiwila okuti okusuapo kuekolelo liene ku vu muisa esivayo lulamba kuenda ekemalo eci Yesu Kristu a tukuluka. Ulu, ndaño u nyõleha, haimo u tẽla oku nyikiwa londalu, puãi okusuapo kuekolelo liene kua velapo vali, okuti ulu u sule.

⁸ Vu sole Yesu Kristu ndaño ka wa lo moli. Ndaño ka vu u moli cilo, haimo vu u kolela, kuenje wa sanjuki lesanju lia piãla ka li popiwa.

⁹ Onima vu tambuila ekolelo liene yeyi, epopelo liovilelembia viene.

¹⁰ Ovaprofeto vana va imbile owanji wocali ca laika oku iya kokuene, va sandiliya loku puliliya epopelo liaco.

¹¹ Va puliliya oku kũlĩhisa ndomo ci kala, kuenda otembo ye ya tukuiwa le Espiritu lia Kristu, lina lia kala loku talavaya vokati kavo, eci lia imba owanji wotokua ya Kristu kuenda ulamba u yi kuama.

¹² Ca situluiwa kokuavo okuti ovo muẽle havoko ovina viaco via sapuiwilua. Cilo, ava vo kundili ondaka yiwa ya va ihiwa le Espiritu Sandu lia tumiwa tunde kilu, ovio ovina vo sapuili. Kuenje ovangelo va livela oku lengelela vovina viaco.

¹³ Oco, pamisi ovitima viene. Lisuluviki. Elavoko liene li loñe lika kocali ciya kokuene eci Yesu Kristu a tukuluka.

¹⁴ Kali ndomãla va pokola okuti, ka vu pangisui loloñeyi vĩvi ndeci wa kaili koloneke vionumbi yene.

¹⁵ Puãi, ndeci u wo kovongi a kola, lenevo koli kovilinga viene viosi.

¹⁶ Momo ca sonehiwa hati, Omo ame ñola oco lenevo vu kola.

¹⁷ Kuenje, nda vu likutilila hoti, A Isietu,— ku o tetuluila vosi omunu omunu ndovilinga viaye, okuti ka kuete ocame, oco, kali lesumbilo osimbu vu kasi olonungi kilu lieve.

¹⁸ Vu ci cokuti wa yovuiwi kovisila viesanda, vina wa piñali kolosekulu viene. Puãi ka wa yovuiwili lovina vi nyõleha ndeci opalata pamue ulu,

¹⁹ te losonde ya tĩla ya Kristu, haeye okameme ka pua etondelo, ka ka kuete etime.

²⁰ Eye Kristu wa ci tukuiwila ale osimbu oluali ka lua sevetiwile handi, puãi wa molehisua kesulilo lioloneke mekonda liene.

²¹ Omo Kristu wa moleha oco ene wa koleli Suku u wo pindula kuava va fa kuenje wo wiha ulamba. Kuenje oco ekolelo liene lelavoko liene li kasilili ku Suku.

²² Cilo, omo okupokola kuene k'Ocili kua yelisa ovitima viene okuti vu tẽla oku sola vakuẽle locisola cocili, oco lisoli pokati lovitima vi yela.

²³ Wa citiwi evali. Ka wa citiwili lombuto yi taka te leyi ka yi taki okuti ondaka ya Suku yi kasi lomuenyo kuenje yi kala ño-o hũ.

²⁴ Momo Atimba osi a soka ndowangu, lulamba wao wosi ndokupulula kuowangu. Owangu vu kukuta, lokupulula ku loluka,

²⁵ puãi ondaka ya Ñala yi kala ño-o hũ. Ondaka yaco oyo ondaka yiwa yo kundiwili.