I OLOSOMA 3 - Embimbiliya - Bíblia Sagrada em Umbundu

¹ Salomone yu wa linala la Fareo, Soma yEgito, kuenje wa kuela omõla a Fareo ukãi. Wo nena vimbo lia Daviti, toke a malusula oku tunga onjo yaye muẽle lonjo ya Yehova locimbaka cina ca ñuala Yerusalãi.

² Omanu puãi va lumbaila kolonumbuko, momo toke koloneke viaco, onduko ya Yehova ka ya tungililue onjo.

³ Salomone wa sola Yehova, yu wa endaila vovisila via isiaye Daviti. Haimo wa lumbaila kuenda wa timihaĩla insensu kolonumbuko.

⁴ Soma wa enda ko Giveone ha ka lumbilako, momo oyo onumbuko ya velapo. Kutala waco Salomone wa lumbilako ohulukãi yovilumba vioku pia elisi.

⁵ Ko Giveone, Yehova wa tukulukila Salomone kuteke, vonjoi. Suku wa popia hati, Tukula eci ndu ku iha.

⁶ Salomone wa popia hati, Wa muisa ukuenje wove tate Daviti ohenda yalua, momo wa endaila kovaso ove locili lesunga lesunguluko liutima kokuove. Lopo wo kuatela vali ohenda eyi yinene, momo wa wiha omõla o tumãla kocalo caye, ndomo ci kasi etaili.

⁷ Kaliye, a Yehova Suku yange, wa lingisa ukuenje wove osoma ha Piñala tate Daviti. Puãi ame ndimõla utito, olondunge vioku tunda tunda loku iñaila, si kuete.

⁸ Ukuenje wove o kasi Pokati komanu vove, vana wa nola haivo valua, oku va tenda ka ci tẽliwa, momo valua cimue.

⁹ Oco, eca kukuenje wove utima wolondunge vioku tetuluila omanu vove, oco nẽle oku tepisa pokati keci ciwa leci cĩvi, momo helie o tẽla oku tetuluila epata eli liove, hailio linene?

¹⁰ Ondaka yaco ya sanjuisa Yehova, omo Salomone a pinga ocina eci.

¹¹ Kuenje wa popia laye hati, Omo wa pinga ocina eci, kuenje kua lipingilile omuenyo wa lepa, pamue ovokuasi, ndaño omuenyo wava va ku suvuka kuo pingile, puãi wa pinga olondunge vioku limbuka esunga,

¹² oco tala, nda linga ndondaka yove. Tala, nda ku iha utima wa lunguka haiwo wa loñoloha, oco lomue o lisoka love, ci kale ava va ku tetekela, ci kale ava veya noke.

¹³ Nda ku ihavo eci kua pingile, ndokuti ovokuasi lekemãlo. Oco komuenyo wove wosi, lomue pokati kolosoma o lisoka love.

¹⁴ Nda wendela volonjila viange loku lava ovisila viange lovihandeleko viange, ndeci ca endaile so Daviti, oco ame ha luisa oloneke viove.

¹⁵ Salomone yu wa pasuka, kuenje tala, ca kala onjoi. Oco weya ko Yerusalãi, wa talama kovaso yocikasa covisila via Yehova, kuenje wa lumba ovilumba vioku pia elisi levi viombembua. Yu wa lingila akuenje vaye vosi ofesta.

¹⁶ Oco akãi vavali, ovipuepue, veya ku Soma, yu va talama kovaso aye.

¹⁷ Umue povakãi wa popia hati, A cime cange, ame lukãi u tu kasi vonjo yimuamue. Kuenje ame nda cita omõla osimbu eye a kala vonjo.

¹⁸ Pa pita oloneke vitatu, kuenje ukãi u wa citavo. Tua kala pamosi, lomue vali wa kala vonjo, te lika etu kavali ketu vonjo.

¹⁹ Kuenje uteke, omõla ukãi u wa fa, momo wo lundika.

²⁰ Vokati kuteke, osimbu upika wove a pekela, eye wa pasuka, wopa omõlange konele yange, yu wo kapa ponete yaye kuenje omõlaye wa fa ale, wo kapa ponete yange.

²¹ Kuenje eci nda pasuka omele si nyamisa omõlange, ota, wa fa. Puãi omele eci ndo vanja lutate, tala, hamõlangeko, una nda cita.

²² Ukãi ukuavo wa popia hati, Hacoko, u o kasi lomuenyo eye omõlange, u wa fa eye omõlove. Puãi ukuavo hati, Sio, u wa fa eye omõlove, u o kasi lomuenyo eye omõlange. Eci oco va popia kovaso a Soma.

²³ Oco Soma wa popia hati, U hati, Omõlange eye o kasi lomuenyo, u wa fa omõlove. Puãi ukuavo hati, Hacoko, u wa fa eye omõlove, u o kasi lomuenyo eye omõlange.

²⁴ Kuenje Soma hati, Ka njupili osipata. Yu va nena osipata ku Soma.

²⁵ Soma wa popia hati, Omõla o kasi lomuenyo, u toli pokati, va tepeli, ukãi lukãi onepa yaye.

²⁶ Oco ina yomõla una wa kala lomuenyo wa kuatela omõlaye ohenda, kuenje wa popia la Soma hati, A cime cange, wiha omõla o kasi lomuenyo, ku ka wipaye ño! Puãi ukãi ukuavo hati, Ka ka linge ndaño wange, ndaño wove. U toli pokati!

²⁷ Oco Soma wa kumbulula hati, Omõla o kasi lomuenyo wihi ukãi watete, ko ka wipayi vali, eye ina yaco.

²⁸ Isareli yosi ya yeva ndomo Soma a teta ondaka eyi onimbu, kuenje va sumbila Soma, momo va limbuka okuti olondunge via Suku vioku tetulula via kala laye.