I OLOSOMA 10 - Embimbiliya - Bíblia Sagrada em Umbundu

¹ Nasoma ya Sieva eci a yeva oluhimo lua Salomone, hailuo lua kemalisa onduko ya Yehova, oco weya oku u nyika lapulilo a tĩla.

² Kuenje weya ko Yerusalãi locikumba calua, lolongamelo viambata olosimbolua lulu wakahandangala lovawe a tĩla. Eci eya ku Salomone wo sapuila cosi ca kala vutima waye.

³ Leye Salomone wo tambulula kapulilo aye osi. Lacimue ca tangeleka Soma okuti ka tẽlele oku u ci lomboluila.

⁴ Nasoma ya Sieva eci a mõla uvanga wosi wa Salomone, lonjo yina a tungile,

⁵ lokulia kuokomesa yaye, lokutumãla kuakuenje vaye, lokuvumba kuakulu vaye luwalo wavo, lavakuakopo yaye, lovilumba viaye vioku pia elisi, vina a lumbaila vonjo ya Yehova, oco utima waye wa soya.

⁶ Oco wa popia la Soma hati, Ondaka yovilinga viove luvanga wove yina nda yevela vofeka yange, yocili.

⁷ Haimo ame sia kolelele olondaka toke ndeya, kuenje ovaso ange a ci limuila. Tala, ndaño onepa ka ya sapuililue. Uvanga wove lukuasi via pitahala oluhimo nda yeva.

⁸ Omanu vove va sumũluha! Akuenje vove avandeti vakuakutalama kovaso ove loku yeva uvanga wove, va sumuluha!

⁹ Yehova Suku yove, u wa ku sanjukila haeye wa ku tumbika kocalo ca Isareli, a sivayiwe! Omo Yehova wa kuatela Isareli ocisola ka ci pui, oco wa ku lingisila osoma hu tetulula lesunga.

¹⁰ Yu wa eca ku Soma ocita lakui avali kolotalendo viulu, kuenda olosimbolua viakahandangala lovawe a tĩla. Ka kua leya vali olosimbolua viakahandangala ndevi Nasoma ya Sieva a ihile Soma Salomone.

¹¹ Olonaviyu via Hirama vina via nenele ulu wo kOfiri, viopavo kOfiri oviti viakahandangala vialimugi kuenda ovawe a tĩla.

¹² Oviti vialimugi Soma wa tunga lavio olohuatelelo vionjo ya Yehova levi vionjo ya Soma lolohalupa lotulialia tuolonjimbi. Ka kua leya kuenda ka kua la muiwa oviti vialimugi ndevi, toke etaili lilo.

¹³ Soma Salomone wa iha Nasoma ya Sieva cosi a yongola leci cosi a pinga; Salomone wa wihavo olombanjaile viocali caye covosoma. Oco wa tiukila kuenje wa enda kofeka yaye, eye kumue lakuenje vaye.

¹⁴ Kaliye, opesu yulu Salomone a tambula vunyamo ya soka ovita epandu lakui epandu lepandu kolotalendo viulu,

¹⁵ kuenda vali ulambu a tambola kovakuavitanda lo kovafuli lo kolosoma viosi via Arabia lo kolombiali viofeka.

¹⁶ Soma Salomone wa tunga ovita vivali vioviyepelo vinene viulu wa tẽliwa. Ociyepelo lociyepelo ca tungiwa lovita epandu violosiekele viulu.

¹⁷ Wa tunga ovita vitatu vioviyepelo vikuavo viulu wa tẽliwa. Ociyepelo lociyepelo ca tungiwa lulu wa soka olokilu vivali komeyu. Soma wa vi kapa vonjo yesisi lia Levanone.

¹⁸ Soma wa tungavo ocalo cinene lolombinga violonjamba, yu wa ci laña lulu wopululu.

¹⁹ Ocalo caco ca kala lolondondelo epandu. Vonyima yocalo mua luvikiyiwa utue wonale, kuenda kondio lokepĩli ca kala lotuhuatelelo tuoku yeka ovoko. Konele yotuhuatelelo kua talama olohosi vivali.

²⁰ Konele eyi lokonele oyo kolondondelo viaco epandu kua kala olohosi ekui la vivali via talama vilu. Lakumue kusoma kua tungiwa ocalo ndeci.

²¹ Ovikuata viosi vioku nyuila, via Soma Salomone, viulu, ndaño ovikuata viosi vionjo yesisi lia Levanone viulu wopululu. Lacimue copalata, momo koloneke via Salomone opalata ya tendelue ndocina caño.

²² Vokalunga Soma wa kalamo lolonaviyu via Tarsisi kumue lolonaviyu via Hirama. Vanyamo atatu alonaviyu via Tarsisi vieyaiya lumosi oku nena ulu, lopalata, lolombinga violonjamba lolosima kuenda olonjila violo-pavão.

²³ Oco kukuasi lo kuvanga Soma Salomone wa velelepo olosoma viosi vio kilu lieve.

²⁴ Vakuilu lieve vosi va sanda ocipala ca Salomone ha va yevi uvanga waye una Suku a kapa vutima waye.

²⁵ Va nena omunu omunu ombanjaile yaye, ovikuata viopalata lovikuata viulu, lovowalo lovimaleho lolosimbolua lotuvalu lolomũla, ndulambu unyamo kunyamo.

²⁶ Salomone wongoluila pamosi akalu lavakuakuendela kotuvalu. Wa kala lohulukãi lovita vikuala viakalu, lekui lavivali kolohũlũkãi viavakuakuendela kotuvalu. Wa va kapa vovaimbo akalu, kuenda vo Yerusalãi kumue la Soma.

²⁷ Vo Yerusalãi, Soma wa siatisa opalata ndovawe, kuenda ovinendele wa vi luisa ndoviti viakuyu vatapi.

²⁸ Otuvalu tua Salomone tua tunda kEgito lo ko Kuwe. Ovafuli va Soma va tu landa landa londando ko Kuwe.

²⁹ Ekãlu lia landaiwa kEgito lovita epandu kolosiekele viopalata kuenda okavalu ka landaiwa locita kakuĩ atãlo kolosiekele. Ovafuli va Soma va nenailakovo olosoma viosi via va Hiti lolosoma via Suria.