I ASAPULO 9 - Embimbiliya - Bíblia Sagrada em Umbundu

¹ Oco Isareli yosi ya tendiwa ocikoti locikoti kuenje ya sonehiwa velivulu liolosoma via Isareli. Kuenda va Yuda va tualiwa kumandekua ko Bavulono, mekonda liakandu avo.

² Va Isareli lovitunda la va Lewi kuenda va Netimini, ovo olonungi viatete via tunga kovipiñalo viavo, kovaimbo avo.

³ Ko Yerusalãi kua tunga vamue va Yuda la va Benjamini la va Efarimi kuenda va Manase.

⁴ Pomãla va Pereci, omõla a Yuda, pa kala Utai, omõla a Amihudu, omõla a Omiri, omõla a Bani.

⁵ Po va Siloni, pa kala Asaya, eye uveli kuenda omãla vaye.

⁶ Po va Sera, pa kala Yewele lavangandiaye va soka ovita epandu lakui ecea komanu.

⁷ Po va Benjamini, pa kala Salu, omõla a Mesiulama, omõla a Hodaya, omõla a Hasenua;

⁸ kuenda Yivineya, omõla a Yerohama, kuenda Ela, omõla a Usi, omõla a Mikiri, kuenda Mesiulama, omõla a Sefatiya, omõla a Reuele, omõla a Yiviniya,

⁹ kuenda vangandiavo ndapata avo, va soka ovita ecea lakui atãlo lepandu komanu.

¹⁰ Povitunda pa kala Yedaya la Yehoyarive la Yakini,

¹¹ kuenda Asariya, omõla a Hilikiya, omõla a Mesiulama, omõla a Sadoke, omõla a Merayote, omõla a Ahituva, usongui wonjo ya Suku,

¹² kuenda Adaya, omõla a Yerohama, omõla a Pasihuri, omõla a Malikiya la Maasai, omõla a Adiyele, omõla a Yahisera, omõla a Mesiulama, omõla a Mesilemite, omõla a Imere;

¹³ kuenda vangandiavo, olosekulu viapata avo, va soka ohulukãi lovita epanduvali lakui epandu komanu. Vosi yavo alume va loñoloha oku linga upange wonjo ya Suku.

¹⁴ Po va Lewi, pomala va Merari, pa kala Semaya, omõla a Hasiuvu, omõla a Asirikama, omõla a Hasiaviya;

¹⁵ kuenda Bakibakare la Heresi la Galala la Mataniya, omõla a Mika, omõla a Sikiri, omõla a Asafe;

¹⁶ kuenda Ovadiya, omõla a Semaya, omõla a Galala, omola a Yedutunu, la Berekiya, omõla a Asa, omõla a Elikana, una wa tunga vovaimbo a va Netofa.

¹⁷ Vakualombundi vava: Sialume la Akuve la Talimone la Ahimana kuenda vangandiavo. Sialume, eye usongui.

¹⁸ Toke cilo wa lavulula kombundi ya Soma, konele yokutundilo. Ovo vakualombundi viocilombo ca va Lewi.

¹⁹ Sialume, omõla a Kore, omõla a Eviyasafe, omõla a Kora, la vamanjaye, vakuepata liaye, va Korihi, ovo asongui vupange, haivo olondavululi violombundi vio tavemakulu. Olosekulu viavo via kaile ale asongui vocilombo ca Yehova, haivo olondavululi viombundi.

²⁰ Finehase, omõla a Eleasara, eye wa linga usongui wavo konahulu, kuenje Yehova wa kaile laye.

²¹ Sakariya, omõla a Meselemiya, eye ukuambundi yombalaka yoku ñualehela la Yehova

²² Ava vosi va nõliwa ndakualombundi va soka ovita vivali lekui la vavali komanu, haivo va tendiwa epata lepata vovaimbo avo. Daviti luprofeto Samuele ovo va va tumbikila ovikele viavo.

²³ Oco ovo lomãla vavo va kala locikele coku lavulula kolombundi vionjo ya Suku, haiyo onjo yo tavemakulu.

²⁴ Vakualombundi va kala kolonele vikuãla, kutundilo lo kutakelo, ko Norte lo ko Sul.

²⁵ Vangandiavo vokovaimbo va sesamela oku iyaiya keteke liepanduvali, ha va kala lavo.

²⁶ Momo vakualombundi vakuãla va velapo, haivo va Lewi, va vongaila ño kupange wavo, kuenda va lavavo olohondo lovikuata via tĩla vionjo ya Suku.

²⁷ Kuteke onjo ya Suku va yimbila vokati, ovo va lala kolonele viaco, momo va kala locikele coku yi lava, leci coku yi yikula omele komele.

²⁸ Vamue pokati kavo va kala locikele covikuata viefendelo, va vi tenda tenda ndaño poku vi soleka, ndaño poku vi eca.

²⁹ Vamue vakuavo va tukuilua oku lava ovitele lovikuata viosi vionembele, kuenda osema ya fina, lovinyu lulela linsensu lolosimbolua.

³⁰ Vamue omãla vovitunda vakuakusokiya olosimbolua.

³¹ Matitiya, umue wa va Lewi, uveli wa Sialume u Kora, wa kala locikele covina vioku yoka voviyo.

³² Vamue vangandiavo omãla va va Kohata va kala locikele colombolo vioku taliwa, oku vi pongiya kesambata lokesambata.

³³ Ava ovo olonjimbi, haivo olosekulu viapata a va Lewi. Va kala ño volohondo vionembele, va kuata kupange wocikele cavo utanya luteke, oco laumue upange ukuavo va linga vali.

³⁴ Ava ovo olosekulu viapata a va Lewi, haivo asongui kovitumbulukila viavo, haivo va tunga ko Yerusalãi.

³⁵ Ko Giveone kua tunga Yeyele, sekulu ya Giveone. Onduko yukãi waye, Maaka.

³⁶ Omolaye uveli, Avidone; va kuamamo Curu la Kisi la Baale la Nere la Nadava,

³⁷ la Gedore, la Ahiyo la Sakariya kuenda Mikilote.

³⁸ Mikilote wa cita Simeama. Ovo va tungavo kumue la vangandiavo ko Yerusalãi, loku lisuñama lavo.

³⁹ Nere wa cita Kisi. Kisi wa cita Saulu, Saulu wa cita Yonatão la Malikisua la Avinadava kuenda Esibaale.

⁴⁰ Omõla a Yonatão, eye Meriva Baale. Meriva Baale wa cita Mika.

⁴¹ Omãla va Mika, Pitone la Meleke la Tarea kuenda Ahasi.

⁴² Ahasi wa cita Yara. Yara wa cita Alemete la Asimawete la Simiri. Simiri wa cita Mosa.

⁴³ Mosa wa cita Binea. Omolaye Refaya, omolaye Eleasa, omolaye Acele.

⁴⁴ Acele wa kala lomãla epandu, olonduko viavo vievi: Asirikama la Bokeru la Isameli la Siariya la Ovadiya kuenda Hanana. Ava ovo omãla va Acele.