I ASAPULO 5 - Embimbiliya - Bíblia Sagrada em Umbundu

¹ Omãla va Ruvene, uveli wa Isareli. Eye muẽle uveli, puãi omo a vĩhĩsa ula wa isiaye, unuñulu waye wa eciwa komala va Yosefe, omõla a Isareli. Oco vepata ka tendiwa nduveli.

² Ndaño Yuda wa velapo vamanjaye, kuenda kokuaye oko kua tunda ombuale, haimo lumue Yosefe eye wa kala lunuñulu.

³ Omãla va Ruvene, uveli wa Isareli, vava: Hanoke la Palu, la Heseroni kuenda Karimi.

⁴ Omãla va Yoele, omolaye Semaya, omõlaye Gogi, omõlaye Simei,

⁵ omolaye Mika, omolaye Raya, omolaye Baale;

⁶ omolaye Bera, una Tigilati Pilesere, Soma ya Asuria, ambatele ndomandekua, haeye ombuale ya va Ruvene.

⁷ Eci apata ovitumbulukila viavo a sonehiwa, vakuocitue waye lapata avo va kala lasongui ava: Yeyele la Sakariya,

⁸ kuenda Bela, omõla a Asasa, omõla a Sema, omõla a Yoele. Bela wa tunga kAroere, toke ko Nevo loko Baale Meone.

⁹ Wa tunga kutundilo, toke apa pa fetikila ekango liolui Ferati, momo oviunda viavo via licitile calua vofeka ya Gileada.

¹⁰ Koloneke via Saulu, va liyaka la va Hagare, yu va va kupula leka liavo, kuenje va tumãla volombalaka viavo vofeka yosi yi kasi kutundilo wa Gileada.

¹¹ Omãla va Gadi va tunga vofeka ya Basiane toke ko Salika, yu va lisuñama lavo.

¹² Yoele, eye watete, wavali Siafama, la Yaanai la Siafata ko Basiane.

¹³ Vakuocitue wavo kapata olosekulu viavo vava: Mingeli la Mesiulama la Seva la Yorai la Yakana la Sia kuenda Heveru, epanduvali.

¹⁴ Ava ovo omãla va Avihayili, omõla Huri, omõla a Yaroha, omõla a Gileada, omõla a Mingeli, omõla a Yesisiai, omõla a Yahido, omõla a Buse.

¹⁵ Ahi, omõla a Avidiyele, omõla a Guni, eye sekulu yapata oavo.

¹⁶ Va tunga ko Gileada ko Basiane, kovaimbo aco lokolonele viosi via Siraono toke kolongave viaco.

¹⁷ Vosi ava va sonehiwa ndapata avo koloneke via Yotama, Soma ya Yuda, lokoloneke via Yerevoama Soma ya Isareli.

¹⁸ Po va Ruvene la va Gadi kuenda onepa yepata lia Manase pa kala olonoi, alume vakuakuambata ociyepelo losipata, vakualohonji, haivo va loñoloha kovita va soka olohulukãi akuĩ akuãla la vikuãla lovita epanduvali lakui epandu kalume, veya voku yaka ovita.

¹⁹ Kuenje va liyaka la va Hagare, kuenda la Yeturi la Nafisi la Nodava.

²⁰ Poku yaka lavo va kuatisiwa, kuenje va Hagare la vosi va kala lavo, va eciwa povaka avo, momo vocilunga caco va vilikiya ku Suku, leye wa yeva kelombelo liavo, momo vo kolela.

²¹ Yu va punda oviunda viavo, ndokuti olohulukãi akuĩ atãlo violongamelo kuenda ovita vivali lakui atãlo kolohũlũkãi violomeme kuenda olohũlũkãi vivali viovimbulu kuenda ocita colohulũkãi viomanu.

²² Valua va fa losipata, momo ovita viaco via Suku. Kuenje va piñala kocitumãlo cavo toke koloneke viumandekua.

²³ Ava va tiamela konepa yepata lia Manase va tunga vofeka, tunde ko Basiane toke ko Baale Herimone loko Senire lo komunda Herimone, momo va licita.

²⁴ Olosekulu viapata vievi: Efere la Yisi la Eliyele la Asiriyele la Yeremiya la Hodaya kuenda Yahidiyele, vosi alume va pama vakuotoi, va kemãla haivo olosekulu viapata avo.

²⁵ Puãi va lueyela Suku yolosekulu viavo, va linga ukahonga momo va kuama olosuku viavakuafeka, vana Suku a nyolele kovaso avo,

²⁶ Oco Suku ya Isareli wa wengula utima wa Pula, soma ya Asuria, kuenda utima wa Tigilati Pilesere, Soma ya Asuria. Va Ruvene la va Gadi lonepa yepata lia Manase wa va tuala vosi kumandekua. Wa va tuala ko Hala loko Havore loko Hara kuenda kolui Gosene, haiko va li toke etaili lilo.