I ASAPULO 28 - Embimbiliya - Bíblia Sagrada em Umbundu

¹ Daviti yu wongoluila ko Yerusalãi olombuale viosi via Isareli, lasongui vapata la vakesongo liovisoko vina via vumba Soma, kuenda vakesongo liolohũlũkãi la vakesongo liovita, kuenda vakalei kovokuasi lovikuata viosi via Soma, levi viomãla vaye, kuenda vakalei velombe lalume vakuotõi la vosi muẽle va pama vakuotõi.

² Oco Soma Daviti wa votoka vilu, yu wa popia hati, Ene avamanjange, amanu vange! Njeveleli. Nda kala lutima woku tungila ocikasa covisila via Yehova onjo yimue yepuyuko, haiyo yociliatelo ca Suku. Kuenje nda angiliyile hã si yi tungi.

³ Puãi Suku wa popia lame hati, Ku ka tungile onduko yange onjo, momo wukuavita kuenda wa pesela osonde.

⁴ Haimo Yehova Suku ya Isareli, wa nola ame vepata liosi lia tate, si lingi ño hu Soma ya Isareli. Momo wa nõla Yuda, ha lingi ombiali, kuenje vepata lia Yuda omo a nõla epata lia tate. Pomãla va tate, ame a sanjukilapo ha ndingisa Soma ya Isareli yosi.

⁵ Pomãla vange vosi, momo Yehova wa nyiha omãla valua, eye wa nolapo omolange Salomone ha tumãla kocalo cusoma wa Yehova kIsareli.

⁶ Wa popia lame hati, Omõlove Salomone, eye o tunga onjo yange lovitali viange, momo ndo nõla ha lingi omolange, lame ndinga isiaye.

⁷ Kuenje, nda o pandikaisa loku linga ovihandeleko viange lovihõlo viange, ndeci etaili, oco ñolisa usoma waye olotembo ka vi pui.

⁸ Kaliye, kovaso a Isareli yosi, haiyo ohongele ya Yehova, kuenda kovaso a Suku o tu yevite, lavi kuenda sandiliyi ovihandeleko viosi via Yehova Suku yene, oco vu tumãle vofeka yilo yiwa, loku yeca ndocipiñalo komãla vene, koloneke vi enda ño hu.

⁹ Love, amolange, a Salomone, kuliha Suku ya soyove, u vumba loku pua evelo kuenda lutima wove wosi. Momo Yehova o pendusola ovitima viosi, kuenje o limbuka ovipangelo viosi viovisimilo. Nda ove u sanda, eye o tava oku sangiwa love. Puãi nda u yanduluka, leye o ku takumũla ño hũ.

¹⁰ Oco kaliye yevelela. Momo Suku wa ku nola hu tungi onembele ongusu, ci linga.

¹¹ Oco Daviti wa eca komolaye Salomone oseteko yocindumba conembele, leyi yolonjo viaco, leyi yolohondo vioku soleka ovokuasi, leyi yolosapalalo, leyi yolohondo viovokati, kuenda eyi yohondo yocitumãlo cohenda.

¹² Wa wihavo oseteko yovina viosi a sokoluile lespiritu ndokuti yeyi yovitali vionjo ya Yehova, leyi yolohondo viosi via ñualako, leyi yolohondo viovokuasi onjo ya Suku, leyi yolohondo vioku soleka ukuasi wovina vi kola;

¹³ leyi yi tiamela kovisoko viovitunda la va Lewi, leyi yupange wosi wonjo ya Yehova, leyi yovikuata viosi viupange wonjo ya Yehova.

¹⁴ Wo tukuila opesu yulu woku panga ovikuata viosi viovopange aiñi aiñi. Wo tukuilavo opesu yovikuata viosi viopalata, viovopange aiñi aiñi.

¹⁵ Wo tukuilavo opesu yolondiyelo viulu leyi yolovela viaco, ndokuti ondiyelo londiyelo kumosi lolovela viayo, kuenda vali opesu yolondiyelo viopalata, ndokuti yondiyelo londiyelo kumosi lolovela viayo, ndesilivilo liayo kupange.

¹⁶ Wa tukulavo opesu yulu woku panga olomesa violombolo vioku taliwa, ulu womesa lomesa, leyi yopalata yoku panga olomesa viopalata.

¹⁷ Wa tukulavo opesu yulu wopululu wolongalufu, lowu wolombasiya, lowu watiyela ulu wa fina, lowu wolokopo viulu, lopesu yokopo lokopo, kuenda yatiyela opalata, etiyela letiyela.

¹⁸ Wa ecavo ulu wopululu, wa pesaliwa, woku panga utala winsensu, kuenda ulu woseteko yekalu, hailio va Keruvi, vana va nyanyumula avava avo loku tuvika ocikasa covisila via Yehova.

¹⁹ Daviti hati, Ocisonehua ceka lia Yehova, oco ca ndomboluila ovina evi viosi, ndaño muẽle ovopange osi oseteko yilo.

²⁰ Daviti wa popia lomolaye Salomone hati, Kolisako, kuata utõi, linga upange u. Ku ka kale lusumba, ku ka yokoke, momo Yehova Suku, haeye Suku yange, o kasi love. Eye ka ku tokoka, ndaño oku ku yanduluka, toke upange wosi wonjo ya Yehova u pua.

²¹ Tala, ovisoko viovitunda levi via va Lewi, vievi, kuenje vi linga upange wosi wonjo ya Suku. Kuenda kupange waco wosi o laika oku kala lomanu vosi vana va loñoloha, haivo va tava oku linga ovopange aiñi aiñi; ndaño asongui lomanu vosi lovo le va pokola kovihandeleko viove.