I ASAPULO 26 - Embimbiliya - Bíblia Sagrada em Umbundu

¹ Ovisoko viavakualombundi vievi: Po va Korihi, pa kala Meselemiya, omõla a Kore, umue pomala va Asafe.

² Meselemiya wa kala lomãla, vava: Sakariya, uveli waye, wavali Yehiyaele, watatu Sevadiya, wakuala Yatiniyele,

³ watalo Elami, wepandu Yehohanana, wepanduvali Eliyoenai.

⁴ Oved Edome wa kala lomãla, vava: Semaya uveli waye, wavali Yehosavade, watatu Yowa, wakuala Sakare, watãlo Netanele,

⁵ wepandu Amiyele, wepanduvali Isakare, wecelala Peulitai, momo Suku wo sumuluisa.

⁶ Omolaye Semaya kuo citiluavo omãla, va viala vepata liolosekulu viavo, momo alume va pama vakuotoi.

⁷ Omãla va Semaya vava: Otini la Refaele la Ovede la Elisavade, lavamanjavo, Elihu la Semakiya, alume vakuotõi.

⁸ Ava vosi omãla va Oved Edome, ovo lomãla vavo kumue lavamanjavo, vosi yavo alume va pama, vakuangusu kupange. Va Oved Edome vosi va soka akui epandu lavavali.

⁹ Meselemiya wa kala lomãla lavamanjaye, ekui lecelala, alume vakuotoi.

¹⁰ Kuenda Hosa, wopomala va Merari, wa kalavo lomãla; vava: watete Simiri, ndaño heyeko uveli, haimo isiaye wo kapa kovaso ya vakuavo.

¹¹ Wavali Hilikiya, watatu Tevaliya, wakuãla Sakariya. Omãla vosi va Hosa, lavamanjaye, va soka ekui lavatau.

¹² Ovisoko evindeti viavakualombundi, lasongui vavio kumue la vamanjavo, va tambula ovikele vioku vumba vonjo ya Yehova.

¹³ Ci kale ava vatito, ci kale ava vanene, vosi va imbila olombundi viavo ocela, ndapata olosekulu viavo.

¹⁴ Ocela conele yokutundilo ca veta Selemiya. Noke va imbila omõlaye Sakariya ocela, ukuakulungula lolondunge, kuenje wa vetiya locela conele yoko Norte.

¹⁵ Onele yoko Sul ya eciwa ku Oved Edome, lonjo yolosila komãla vaye.

¹⁶ Siupi la Hosa va tambula onele yokutakelo kumosi lombundi Sialekete vonjila yi lamanisa. Ondavululi ya lisuñama londavululi.

¹⁷ Kutundilo kua kala va Lewi epandu, ko Norte vakuãla veteke, ko Sul vakuãla veteke, kuenda konjo yolosila kua kala vavali la vavali.

¹⁸ Ko Paribara, konele yutakelo, kua kala vakuãla konjila kuenda vavali ko Paribara.

¹⁹ Evi ovio ovisoko viavakualombundi, pomãla va va Korihi lopomãla va Merari.

²⁰ Ahiya, umue pova Lewi, eye ukuacikele cukuasi wonjo ya Suku lukuasi wovina vi kola.

²¹ Omãla va Ladana, omãla va Ladana u Gerisiono, vava: Yehiyeli.

²² Omãla va Yehiyeli, Setama la Manjaye Yoele, ovo vakuacikele cukuasi wonjo ya Yehova.

²³ Pova Amirama lopova Yicihare lopova Hevirone lopova Usiyele,

²⁴ pa kala Sevuele, omõla a Gerisiomo, omõla a Mose, eye kalei kovokuasi.

²⁵ Vamanjaye va citiwa la Eliyesere, vava: omolaye Rehaviva, omõlaye Yesiaye, omolaye Yorame, omolaye Sikiri, omolaye Selomiti.

²⁶ Eye Selomiti kumue la vamanjaye wa lava ukuasi wosi wovina vi kola, vina via tumbikiwa la Soma Daviti lolosekulu viapata lavakesongo volohũlũkãi lava vovita, kuenda vakesongo kolohoka.

²⁷ Povikuata va pundile kovita va tumbikapo vimue oku tumbulula lavio onjo ya Yehova.

²⁸ Cosi ca tumbikilue la Samuele ukuavinjoinjoi kuenda Saulu, omõla a a Kisi, la Avinere, omõla a Nere, la Yoava, omõla a Ceruya, lu wosi wa tumbikile cimue, ovina viaco viosi muẽle via kala peka lia Selomoti la vamanjaye.

²⁹ Pova Yicihare, Kenaniya kumue lomãla vaye va linga upange wofeka ndolombiali kuenda ndolonganji kIsareli.

³⁰ Pova Hevirone, Hasiaviya lavamanjaye, alume vocili, haivo va kala locikele ca Isareli kesinya lia Yordão, konele yutakelo, va soka ohulukãi lovita epanduvali komanu. Ovo va songuila upange wosi wa Yehova, lowu wa Soma.

³¹ Pova Hevirone, Yeriya eye sekulu ya va Hevirone, ndocikoti capata avo. Kulima wakui akuãla wusoma wa Daviti, va sandiliya pokati kavo, yu va sangapo alume va pama vakuotoi. Imbo liavo Yasere ya Gileada.

³² Vamanja a Yeriya alume vocili. Ovo va soka olohulukãi vivali lovita epanduvali kakulu vapata avo. Soma Daviti wa va kapa ndasongui va va Ruvene la va Gadi lonepa yepata lia va Manase, oku songola olondaka viosi vi tiamẽla ku Suku, levi via Soma.