I ASAPULO 23 - Embimbiliya - Bíblia Sagrada em Umbundu

¹ Eci Daviti a linga ekongo haeye ukualoneke via lua, oco wa tumbika omolaye Salomone ndosoma ya Isareli.

² Yu wongolola olombuale viosi via Isareli, lovitunda la va Lewi.

³ Va Lewi vakuanyamo akuĩ atatu lava va pitahalamo va tendiwa ulume lulume, kuenje va soka olohũlũkãi akui atatu lecelala.

⁴ Daviti wa popia hati, Pokati kavo pa kale olohũlũkãi akuĩ avali la vikuãla va kundikiwa upange wonjo ya Yehova. Olohũlũkãi epandu va linge ovakulu lolonganji.

⁵ Olohũlũkãi vikuãla va linge vakualombundi, Olohũlũkãi vikuãla va tumbangiye Yehova lovisikilo vina nda pangela oku sivaya lavio.

⁶ Daviti wa va tepa kovisoko, ndapata omãla va Lewi, Gerisiono la Kohata la Merari.

⁷ Pova Gerisiono, Ladana la Simei.

⁸ Omãla va Ladana, Yehiyele, usongui, kuenda Setama la Yoele, vatatu.

⁹ Omala va Simei, vava: Selomiti la Hasiyele la Harana, vatatu. Ovo olosekulu viapata a Ladana.

¹⁰ Omãla va Simei vava: Yahate la Sina la Yewusi kuenda Beriya. Kakuala kavo omãla va Simei.

¹¹ Yahate eye usongui, wavali Sina. Puãi Yewusi la Beriya ka va kaile lomãla valua, oco va linga ño epata limuamue pokutendiwa kuaco.

¹² Omãla va Kohata vava: Amirama la Yicihare la Hevirone kuenda Usiyele, vakuala.

¹³ Omãla va Amirama, Arone la Mose. Arone puãi wa tepiwa kuvakuavo, ha kolisa ovina via piala koku kola, eye kumue lomãla vaye, toke oloneke ka vi pui, ha va timĩha insensu kovaso a Yehova, loku u vumba loku sumuluisila vonduko yaye oloneke ka vi pui.

¹⁴ Puãi omãla va Mose, omunu wa Suku, va tendelua vepata lia Lewi.

¹⁵ Omãla va Mose, Gerisiomo la Eliyesere.

¹⁶ Omãla va Gerisiomo, Sevuele haeye usongui.

¹⁷ Omãla va Eliyesere, Rehaviya, haeye usongui. Eliyesere ka kaile vali lomãla vakuavo, puãi omãla va Rehaviya va luile muẽle.

¹⁸ Omãla va Yicihare, Selomiti, haeye usongui.

¹⁹ Omãla va Hevirone, vava: Yeriya haeye usongui, wavali Amariya, watatu Yahasiele, wakuãla Yekameama.

²⁰ Omãla va Usiyele, Mika, haeye usongui, kuenda wavali Yesiya.

²¹ Omãla va Merari, Mahili la Musi. Omãla va Mahili, Eleasa la Kisi.

²² Eleasa wa fa, lomãla valume lakamue, te lika omãla vakãi. Kuenje vangandiavo, omãla va Kisi, va va kuela.

²³ Omãla va Musi, Mahili la Edere la Yeremote, vatatu.

²⁴ Ava ovo va Lewi ndapata olosekulu viavo, haivo akulu vapata avo ndomo va tendiwa kolonduko, omunu omunu. Ovo va linga upange woku vumba vonjo ya Yehova, tunde ku vakuanyamo akui avali lava va pitahalamo.

²⁵ Momo Daviti wa popia hati, Yehova Suku ya Isareli wa eca epuyuko komanu vaye, kuenje o tunga ño hu vo Yerusalãi.

²⁶ Oco va Lewi ka va kuete vali oku ambata otavemakulu lovikuata viosi viupange waco.

²⁷ Ndocihandeleko ca sulako ca Daviti, va Lewi, vakuanyamo akui avali lava va pitahalamo, va tendiwa vosi.

²⁸ Ocikele cavo oku kuatisa va Arone kupange wonjo ya Yehova, lovovitali lovolohondo, loku yelisa ovina viosi vi kola, loku linga upange wosi woku vumba vonjo ya Suku.

²⁹ Va kalavo locikele combolo yoku taliwa, leci cosema ya fina yovilumba violomema, leci colombolo ka vi kuete etumbisa, levi via kangiwa vociyo, levi via yuyiwa, kuenda eci covikuata viosi vioku yonga, levi vioku seteka okulepa lusovi.

³⁰ Omele lomele kuenda oñolosi loñolosi va talama loku pandula loku sivaya Yehova.

³¹ Kasambata lokokumoleha kuosãi lokoloneke violofesta va lumbaila kovaso a Yehova ovilumba viosi vioku pia elisi ndomo via tendiwa vovihandeleko vi tiamela kovilumba.

³² Va kalavo locikele combalaka yoku ñualẽhẽla la Yehova leci cohondo yi kola, leci ca vangandiavo va Arone, ha va lingi upange wonjo ya Yehova.