I ASAPULO 22 - Embimbiliya - Bíblia Sagrada em Umbundu

¹ Daviti wa popia hati, Yilo oyo onjo ya Yehova Suku, ulo owo utala wocilumba coku yokela va Isareli ovilumba vioku pia elisi.

² Daviti wa handeleka oku ongolola vakualofeka va kala vofeka ya Isareli, kuenje wa tuma vakuakusonga ovawe ha va songi ovawe oku tunga onjo ya Suku.

³ Daviti wangiliya utale walua woku linga olombambo viapito kuenda atokekelo, kuenda osipi yalua okuti ndaño oku yi pesala, ka ci teliwa;

⁴ kuenda ovinendele viakahandangala, momo va Sitono la va Turo va nena ovinendele via lua ku Daviti.

⁵ Daviti wa popia hati, Omolange Salomone umalehe handi, ka kolele, kuenda onjo yi tungilua Yehova yi laika oku posoka ca piala, oco ekemãlo liayo lulamba wayo u yevale kolofeka viosi. Oco njongola oku yangiliyila. Kuenje Daviti wangiliya ovina vialua osimbu ka file handi.

⁶ Yu wa kovonga omolaye Salomone, kuenje wa wiha ocikundi coku tungila Yehova Suku ya Isareli onjo.

⁷ Daviti wa popia la Salomone, hati, Amolange, ame nda kala lutima woku tungila onduko ya Yehova Suku yange onjo.

⁸ Puãi ondaka ya Yehova yeya kokuange, yiti, Ove wa pesela osonde yalua, wa linga ovita vinene, oco ku tungila onduko yange onjo, momo wa pesela osonde yalua kilu lieve, kovaso ange.

⁹ Ota, o ka cita omõla ulume, o linga ukuepuyuko, kuenje ndu wiha epuyuko kovanyali vaye vosi, vana va ñuala; momo onduko yaye Salomone, kuenje koloneke viaye ngeca ombembua lepuyuko kIsareli.

¹⁰ Eye o tungila onduko yange onjo. O linga omolange, lame ndinga isiaye, kuenje ñolisa ocalo cuviali waye kIsareli, oloneke ka vi pui.

¹¹ Kaliye, amolange, Yehova a kale love, oco o sumuluhe. Tunga onjo ya Yehova Suku yove, ndomo a ku ci popela.

¹² Ewa, Yehova a ku ihe olondunge lukulihiso kuenda a ku ihe ocikundi coku viala Isareli, oco o pokole kovihandeleko via Yehova, Suku yove.

¹³ Oco o sumuluha nda o lingainga lutate ovihandeleko lovisila via Isareli vina Yehova a kundika Mose. Kolisako, kuata utõi! Ku ka kale lusumba, ku ka yokoke!

¹⁴ Kaliye, tala, ndaño lasakalalo alua, haimo nda angiliyila onjo ya Yehova ocita colohũlũkãi violotalendo viulu kuenda ohuluwa yolotalendo viopalata, kuendavo osipi lutale, haivio ka via pesalelue, momo vialua enene. Nda angiliyavo oviti lovawe love hu vokiyakovo.

¹⁵ Kuenda vali kuli vakuopange valua va kasi love, vakuakusonga ovawe, lolokalupindelu lolomesele via loñoloha kovopange aiñi aiñi.

¹⁶ Ulu lopalata losipi lutale, oku vi tenda ka ci teliwa. Votoka, kuatako, Yehova a kale love.

¹⁷ Daviti wa handelekavo olombuale viosi via Isareli, ha va kuatisa omolaye Salomone, hati,

¹⁸ Yehova Suku yene ka kasi hẽ lene? Ka wihili hẽ ombembua kolonele viosi? Eye wa eca peka liange olonungi viofeka, kuenje ofeka ya pokuisilua kovaso a Yehova lomanu vaye.

¹⁹ Kaliye likapeli oku sanda Yehova Suku yene longusu yene yosi lutima wene wosi. Oco katuki, tungi onembele ya Yehova Suku, ho nena ocikasa covisila via Yehova, kumue lovikuata vi kola via Suku vonjo yi laika oku tungilua onduko ya Yehova.