I ASAPULO 21 - Embimbiliya - Bíblia Sagrada em Umbundu

¹ Satana wa katukila Isareli, yu wa tutuminya Daviti ha tendi va Isareli.

² Oco Daviti wa popia la Yoava la vakesongo kolohoka hati, Kuendi, ka tendi va Isareli, tunde ko Bereseva toke ko Dani, oco vu ci sapuili okuti ñuliha nda vañami.

³ Yoava puãi hati, Omanu vaye nda vañami nda vañami, Yehova a va luise ocita colonjanja. A cime cange, a Soma, ovo havosiko he akuenje va cime cange? Cime cange o ci yonguila nye? Nye a kokelela Isareli ongole?

⁴ Puãi ondaka ya Soma ya yula ondaka ya Yoava. Oco Yoava wa katuka wa ñuala kIsareli yosi, kuenje wa tiuka ko Yerusalãi.

⁵ Yoava wa sapuila Daviti okutendiwa kuaco kuomanu. KIsareli yosi kua kala ohuluwa locita colohulukãi vialume vakualosipata, kuenda ko Yuda kua kala ovita vikuala lakuĩ epandu vali kolohũlũkãi viavakualosipata.

⁶ Puãi ka tendele va Lewi la va Benjamini, momo ocihandeleko ca Soma ku Yoava ca linga ndumbondo.

⁷ Puãi Suku ka sanjukile lelinga eli, kuenje wa veta Isareli.

⁸ Daviti wa popia la Suku hati, Nda lueya calua oku linga ndoco. Cilo puãi, hu pinga, upa ongole yukuenje wove, momo ocili nda linga uveke.

⁹ Yehova wa popia la Gadi, ukuavitumasuku velombe lia Daviti, hati,

¹⁰ Kuende, ka sapuile Daviti huti, Ca popia Yehova ceci, hati, Hu tukuila ovina vitatu. Pokati kavio nolapo cimue, oco hu ci lingile.

¹¹ Oco Gadi weya ku Daviti, wa popia laye hati, Ca popia Yehova ceci, hati, Upapo eci o yongola:

¹² Nda anyamo atatu elambu; nda oku kundulua olosai vitatu lovanyali vove, osimbu osipata yovanyali vove yi ku landula; pamue vali oloneke vitatu viosipata ya Yehova ndokuti efengi vofeka osimbu ungelo wa Yehova a kundula vofeka yosi ya Isareli. Kaliye teta onimbu, si tiula etambululo ku u wa numa.

¹³ Oco Daviti wa popia la Gadi hati, Nda sakatela cimue! Hise ndi wile peka lia Yehova, momo ohenda yaye yalua. Si ka wile peka liomunu.

¹⁴ Oco Yehova wa tuma efengi kIsareli, Kuenje kIsareli kua fa akui epanduvali kolohũlũkãi viomanu.

¹⁵ Suku wa tuma ungelo ko Yerusalãi ha yi nyõli. Eci a si oku yi nyõla, Yehova wa vanjako kuenje wa livela nda ka tumile ohali yaco. Wa popia lungelo una wa kala loku nyõla hati, Kua pua, liwekapo. Ungelo wa Yehova wa talama kocimbandi ca Orinane u Yevusi.

¹⁶ Daviti wa petula ovaso aye kuenje wa mõla ungelo wa Yehova o tai pokati kosi lilu. Peka liaye pali osipata ya tua yõluiwilua Yerusalãi. Oco Daviti kumue lakulu, haivo va wala ovikelei, va lituvika posi.

¹⁷ Daviti wa popia la Suku hati, Hameko hẽ nda tumile oku tenda omanu? Ame, ame nda linga ekandu, haime nda lueya calua. Puãi olomeme evi hẽ, nye via linga? A Yehova Suku yange, hu pinga, eka liove li mbete ame, li vetevo epata lia tate, puãi ekundu ka li ka wile omanu vove.

¹⁸ Oco ungelo wa Yehova wa tuma Gadi ha sapuila Daviti okuti Daviti a lamane, kuenda a tungile Yehova utala kocimbandi ca Orinane u Yevusi.

¹⁹ Oco londaka ya Gadi, yina a popele vonduko ya Yehova, Daviti wa lamanelako.

²⁰ Kaliye Orinane wa kala loku sasa otiliku. Wa ñualapo, yu wa mõla ungelo, kuenje omãla vaye vakuãla valume, vana va kala kumue laye, va salama.

²¹ Eci Daviti eya ku Orinane, Orinane wa vanja, yu wa mõla Daviti. Wa tunda kocimbandi, wa petamela kovaso a Daviti, wa tuvika ocipala caye posi.

²² Daviti wa popia la Orinane, hati, Nyihe ocimbandi oco nungilepo Yehova utala. Ci nyihe, hu feta ondando yaco ya soka. Oco ekundu limuhe pokati komanu.

²³ Oco Orinane wa popia la Daviti, hati, Ci tambula ño! Cime cange Soma a linge eci co sungulukila. Tala, ngeca olongombe viovilumba vioku pia elisi, lolombulo vioku sasa ha vi lingi olohui, lotiliku yocilumba colomema. Cosi ndi ceca.

²⁴ Puãi Soma Daviti wa popia la Orinane, hati, Oco hacoko, te ndi ci landa loku feta cosi. Si yongola oku tambula eci cove si ceci ku Yehova, ndaño oku lumba ovilumba vioku pia elisi evi ka via meselele.

²⁵ Oco Daviti wa landa ocimbandi, yu wa feta ku Orinane ovita epandu violosiekele viulu wa pesaliwa.

²⁶ Daviti oko a tungila Yehova utala. Wa lumba ovilumba vioku pia elisi lovilumba viombembua. Wa vilikiya ku Yehova, leye wo tambulula londalu yokilu, yu ya lokila kutala wocilumba coku pia elisi.

²⁷ Oco Yehova wa handeleka ungelo, leye wa someha osipata yaye vocilalo cayo.

²⁸ Kotembo yaco, eci Daviti a limbuka okuti Yehova wo kumbulula kocimbandi ca Orinane u Yevusi, oco wa lumbilako ovilumba.

²⁹ Momo koloneke viaco ombalaka ya Yehova, yina Mose a tungile vekalasoko, lutala wocilumba coku pia elisi, via kala konumbuko ya Giveone.

³⁰ Puãi Daviti ka telele oku endako ha puliliya Suku, momo wa kala lusumba wosipata yungelo wa Yehova.