I ASAPULO 20 - Embimbiliya - Bíblia Sagrada em Umbundu

¹ Kotembo yokuca kuolombela, haiyo otembo olosoma viendaenda kovita, oco Yoava wa tunda lolohoka, kuenje wa kundula ofeka ya va Amoni. Wa enda ko Raba, yu wa li ñuala ocingonja. Daviti puãi wa siala ko Yerusalãi. Yoava wa yula Raba, yu wa li kundula.

² Daviti wopa ekolowa kutue wa Soma yavo. Wa mõla okuti okulema kualio kua soka ndotalendo yulu, kuenda vokati kalio mua kala ewe limue lia tĩla calua. Yu va li kapa kutue wa Daviti. Vimbo va pundamo ovikuata viakahandangala.

³ Wopavo omanu va kalamo, wa va kapa kupange woku selala lowu wetemo londiaviti. Eci oco Daviti a linga lovaimbo osi a va Amoni. Oco Daviti lomanu vosi va tiukila ko Yerusalãi.

⁴ Kovaso yaco ko Gesere kua kenduka ovita la va Filisiti. Sibekai u Husiati wa ipa Sipai, ukuambuto yovindululu, va Filisiti va yuliwa.

⁵ Kueya vali oku yaka la va Filisiti. Elihanana, omõla a Yairi, wa ipa Lahimi manja a Goliata u Giti. Ocikundo conjelia yaye ca soka nduti womakina yoku tuta olonanga.

⁶ Kueya vali ovita ko Gati, haiko kua kala ulume umue wa lepa calua. Wa kala lovimuine epandu keka leka, lovimuine epandu komai lomai, viosi via tẽla akuĩ avali la vikuala. Leyevo ukuambuto yovindululu.

⁷ Eci a vayela Isareli, Yonatão omõla a Simea, manja a Daviti, wa wipa.

⁸ Avandeti vakuambuto yovindululu vio ko Gati. Va pondiwa leka lia Daviti leka liakuenje vaye.