I ASAPULO 19 - Embimbiliya - Bíblia Sagrada em Umbundu

¹ Kovaso yaco, Nahasi Soma ya va Amoni wa fa, kuenje omolaye wa piñala komangu yaye.

² Daviti wa popia hati, Ñuatela Hanuni omõla a Nahasi ohenda, momo isiaye wa ñuatelele ohenda. Oco Daviti wa tuma olomunga oku ko lembelekela isiaye. Akuenje va David veya ku Hanuni vofeka ya va Amoni ha vo lembeleka.

³ Puãi olombuale via va Amoni via popia la Hanuni vati, Wa soka nga okuti omo Daviti a tuma kokuove ava va ku lembeleka, wa ci lingila esumbilo lia so? Akuenje vaye ka veyilile nga kokuove oku kulihisa ofeka loku yi nyõla loku yi lavulula?

⁴ Oco Hanuni wa kuata akuenje va Daviti, wa va pemula, wa tetela uwalo wavo vombuelo yatako avo, yu wa va katula, kuenje va enda.

⁵ Eci va sapuila Daviti ondaka yalume vaco, eye wa tuma oku va landula, momo alume vaco va kala losõi yalua. Kuenje Soma hati, Kali handi ko Yeriko, toke olonjele viene vi kula vali, oco wiyi noke.

⁶ Eci va Amoni va limbuka okuti va likokela esuvu lia Daviti, oco Hanuni la va Amoni va tuma ohulũkãi yolotalendo viopalata oku fetela akalu lavakuakuendela kotuvalu voko Mesopotamia lokArama Maaka loko Sova.

⁷ Va fetela olohũlũkãi akuĩ atatu la vivali viakalu kuenda Soma ya Maaka kumue lolohoka viaye. Eye weya, yu wa tunga ocilombo kovaso a Medeva. Va Amoni va tunda vovaimbo avo, va liongoluila pamosi ha va yaki.

⁸ Eci Daviti a ci yeva, wa tuma Yoava kumue lolohoka viosi vialume va pama.

⁹ Va Amoni va tunda, va lialeka kepandavelo, osimbu olosoma vina vieyile, via likalela kusenge.

¹⁰ Eci Yoava a limbuka ndomo ocilunga ca kala, okuti konyima yaye ovita, kovaso yaye ovita, oco wa nola vamue pokati kasualali va velapo va va Isareli kuenje wa va aleka ha va yaki la va Suria.

¹¹ Asualali vaye va supapo wa va eca peka lia manjaye Avisiai, kuenje va lialeka ha va yaki la va Amoni.

¹² Eye wa popia hati, Nda ame va Suria si va tela oco ove wiya o ñuatisa. Puãi nda ove va Amoni ku va tela, oco ame hu kuatisa.

¹³ Kolisako! Tu linge ndalume mekonda liomanu vetu kuenda mekonda liovaimbo a Suku yetu. Yehova a linge eci co sungulukila.

¹⁴ Oco Yoava lomanu va kala kumue laye vamela ko va Suria ha va yaki, lovo va tila kovaso aye.

¹⁵ Eci va Amoni va mõla okuti va Suria va tila, lavovo va tila kovaso a Avisiai manja a Yoava kuenje va iñila vimbo. Oco Yoava weya ko Yerusalãi.

¹⁶ Puãi eci va Suria va limbuka okuti va yuliwa la Isareli, va tuma olomunga yu via kopile va Suria vana va kala kesinya lia Ferati. Siofake kesongo kolohoka via Hadadesere, eye wa va songuila.

¹⁷ Eci ca yevala ku Daviti, oco wongolola Isareli yosi, va yoka Yordão, yu veya ku va Suria kuenje va va katuila ovita. Eci Daviti a alekela va Suria ocilunga, ovo va yaka laye.

¹⁸ Va Suria va tila kovaso a Isareli, kuenje po va Suria Daviti wa ipapo alume vakuakuendisa olohũlukãi epanduvali viakãlu, lolohũlukai akuĩ a kuãla viasualali vakuakuendela posi. Wa ipavo Siofake kesongo kolohoka viavo.

¹⁹ Eci akuenje va Hadadesere va limbuka okuti va yuliwa la Isareli oco va linalisa la Daviti, kuenje vo vumba. Oco va Suria ka va tavele vali oku kuatisa va Amoni.