I ASAPULO 18 - Embimbiliya - Bíblia Sagrada em Umbundu

¹ Kovaso yaco, Daviti wa yula va Filisiti, yu wa va vumbisa. Wa tambula Gati kumue lovaimbo alio peka lia va Filisiti.

² Wa yula Moavi, kuenje va Moavi va linga akuenje va Daviti, yu vo lambuila ulambu.

³ Daviti wa yulavo Hadadesere, Soma ya Sova ko Hamati, osimbu a kala loku enda oku ka pamisila uviali waye kolui Ferati.

⁴ Daviti wo nyeha ohũlũkãi yakalu, lolohũlũkãi epanduvali viavakuakuendela kotuvalu, lakui avali kolohũlũkãi viasualali vakuakuendela posi. Daviti wa lakula akanja otuvalu tuosi tuakãlu, puãi wa supisapo otuvalu tuocita cakalu.

⁵ Eci va Suria vo ko Damasko veya oku kuatisa Hadadesere, Soma ya Sova, oco Daviti wa ipaya akui avali lavivali kolohũlũkãi via va Suria.

⁶ Oco Daviti wa kapa ovisoko viasualali vo Suria ya Damasko. Va Suria va linga akuenje va Daviti, kuenje vo lambuila ulambu. Yehova wa yulaisa Daviti kuosi a enda.

⁷ Daviti wa tambula oviyepelo viulu vina viambatelue lakuenje va Hadadesere, kuenje wa vi nena ko Yerusalãi.

⁸ Ko Tivihati lo ko Kuni ovaimbo a Hadadesere, Daviti wopako osipi yalua. Salomone oyo a tunga layo ociva cosipi lolongunji lovikuata viosipi.

⁹ Eci Tou, Soma ya Hamati, a yeva okuti Daviti wa yula olohoka viosi via Hadadesere, Soma ya Sova,

¹⁰ oco wa tuma omolaye Hadorama ku Soma Daviti oku ko lama loku u panduila omo a yaka la Hadadesere, yu wo yula. Momo Hadadesere wa liyaka yaka calua la Tou. Kuenje wa tuma ovikuata viñi viñi viulu lopalata losipi.

¹¹ Evi laviovo Soma Daviti wa vi tumbika ku Yehova, kumue lopalata lulu a pundile kolofeka viosi, kEdome la Moavi, loko va Amoni la va Filisiti la Amaleke.

¹² Avisiai, omõla a Ceruya, wa ipaila ekui lecelala kolohulũkãi via va Edome vocimbota comongua.

¹³ Wa kapa ovisoko viasualali vo Edome. Va Edome vosi va linga akuenje va Daviti. Yehova wa yulaisa Daviti kuosi a enda.

¹⁴ Oco Daviti wa viala Isareli yosi. Wa tepisaila omanu vaye vosi lesunga locili.

¹⁵ Yoava omõla a Ceruya wa kala kesongo kolohoka. Yehosafata omõla a Ahilude wa kala usoleki walivulu.

¹⁶ Sadoke omõla a Ahituva kuenda Ahimeleke omõla a Aviatare, va kala ovitunda. Siavisia wa kala usonehi.

¹⁷ Benaya omõla a Yehoyada wa kala usongui wa va Kerete la va Pelete. Omãla va Daviti va kala asongui vupange wa Soma.