I ASAPULO 17 - Embimbiliya - Bíblia Sagrada em Umbundu

¹ Eci Daviti a kala vonjo yaye, Daviti wa popia luprofeto Natana hati, Tala, ame ñasi vonjo yovinendele, puãi ocikasa covisila via Yehova ci kasi ño vombalaka.

² Natana wa popia la Daviti hati, Linga cosi ci li vutima wove momo Suku o kasi love.

³ Uteke waco puãi ondaka ya Yehova yeya ku Natana, yiti,

⁴ Kuende ka sapuile ukuenje wange Daviti, huti, Ca popia Yehova ceci, hati, Ku ka nungile onjo yoku kalamo.

⁵ Momo sia la kala vonjo tunde eteke nda nena Isareli kulo toke etaili lilo. Puãi nda kala volombalaka viñi viñi lovovitumãlo viñi viñi.

⁶ Kuosi nda ñuala la Isareli yosi, kuli hẽ limue eteke nda pula olonganji via Isareli vana nda kapa ndangombo vomanu vange, siti, Nye ka wa nungilili onjo yovinendele?

⁷ Oco popia lukuenje wange Daviti, huti, Ca popia Yehova Ukualohoka ceci, hati, Nda ku upa kovisenge koku tata olomeme okuti o linga Soma yomanu vange va Isareli.

⁸ Nda kala kala love kuosi wa endaenda, nda kundula ovanyali vove vosi kovaso ove, kuenda hu muisa onduko ndonduko yava va kemãla kilu lieve.

⁹ Kuenje mongiyila omanu vange va Isareli ocitumãlo, ndi va tuika ndocikũla okuti va kala vocitumãlo cavo muẽle, kuenje ka va sakalaisua vali. Olongangala ka vi va nyõli vali, ndeci via lingaile osimbu,

¹⁰ tunde kotembo nda nolela omanu vange va Isareli olonganji. Mokuisavo ovanyali vove vosi. Kuenda vali hu sapuila okuti Yehova o ku tungila onjo.

¹¹ Eci oloneke viove vi telisua kuenje o ka kala lolosekulu viove, oco noke ñatula ombuto yove, umue wopomãla vove muẽle, kuenje ndi pamisa uviali waye.

¹² Eye o nungila onjo, lame ndi pamisa ocalo caye otembo ka yi pui.

¹³ Ame ndinga isiaye leye o linga omolange. Ohenda yange ka yi pongoloka si yupi kokuaye ndeci nda yupa ku u wa ku livangela,

¹⁴ puãi ndu kolisila ño hu vonjo yange lovusoma wange, ocalo caye ci tumãla ño hu otembo ka yi pui.

¹⁵ Natana wa sapuila Daviti olondaka evi viosi locinjonde eci cosi.

¹⁶ Oco Soma Daviti wa iñila, wa tumãla kovaso a Yehova, yu wa popia hati, Ame hẽ, ame elie, a Yehova Suku, lepata liange lie, okuti wa songuila toke cilo?

¹⁷ Haimo lumue eci citito kovaso ove a Suku. Momo wa tukuila epata liukuenje wove oloneke vi keya kovaso, wa sokisa lomunu o kuete omangu yinene, a Yehova Suku.

¹⁸ Kondaka yulamba wa muisa ukuenje wove, Daviti hẽ, o popiako vali nye? Wa kulĩha ukuenje wove.

¹⁹ A Yehova, omo wa sola ukuenje wove, lomo wa ci panga vutima wove, oco wa lingila unene waco wosi, loku situluila ovina evi vinene.

²⁰ A Yehova, ndovina viosi tua yeva lovatui etu, ka kuli wa lisoka love, ka kuli Suku yikuavo.

²¹ Kilu lieve epata li pi lia lisoka lomanu vove va Isareli, vana Suku a endele oku va yovola ha va lingi omanu vaye, onduko yove ha yi kemala lovikomo viene vi koka usumba, loku tundisa olofeka kovaso omanu vove vana wa yovola kEgito?

²² Momo omanu vove va Isareli wa va lingisa vove muẽle, toke koloneke ka vi pui, kuenje ove a Yehova, wa linga Suku yavo.

²³ Kaliye, a Yehova, ondaka wa popia, yi tiamela kukuenje wove lokepata liaye, yi kolisiwe ño hu. Linga ndomo wa popia.

²⁴ Yi kolisiwe, oco onduko yove yi kemainyaiwe ño hũ, oco omanu va popie vati, Yehova Ukualohoka, Suku ya Isareli, eye muẽle Suku ya Isareli. Kuenda epata liukuenje wove Daviti li kolisiwe kovaso ove.

²⁵ Momo ove, a Suku yange, wa situlula kukuenje wove okuti wu tungila epata, oco ukuenje wove wa kuata utoi woku likutilila kovaso ove.

²⁶ Kaliye, a Yehova, ove Suku, kuenje wa likuminya kukuenje wove ocina eci ca posoka.

²⁷ Wa tava oku sumuluisa epata liukuenje wove, ha li kala ño hu kovaso ove. Momo a Yehova eci cosi ove o sumuluisa, ci sumuluha muẽle toke koloneke ka vi pui.