I ASAPULO 16 - Embimbiliya - Bíblia Sagrada em Umbundu

¹ Yu va nena ocikasa ca Suku, va ci kapa vokati kombalaka ya tungile Daviti. Kuenje va lumbila kovaso a Suku ovilumba vioku pia elisi lovilumba viombembua.

² Eci Daviti a mala loku lumba ovilumba vioku pia elisi lovilumba viombembua, oco wa sumuluisa omanu vosi vonduko ya Yehova.

³ Yu wa eca ombolo locikepa cositu lombunge yayuva a kukuta komunu omunu, ci kale ulume, ci kale ukãi.

⁴ Wa tukula vamue va Lewi ha va vumbi kovaso yocikasa ca Yehova, loku tumbangiya loku pandula loku sivaya Yehova, Suku ya Isareli.

⁵ Usongui waco Asafe, u o kuaimo Sakariya, kuenda Yeyele la Semiramote la Yehiyele la Matitiya la Eliava la Benaya la Oved Edome la Yeyele. Va sika ovisumba lolohalupa. Asafe puãi wa totãlisa ayundu.

⁶ Benaya la Yahasiele, ovitunda, va sika sika olombeta kovaso yocikasa covisila via Suku.

⁷ Keteke liaco muẽle, ca linga onjanja yatate okuti Daviti wa eca ku Asafe lokovangandiaye osamo eyi yoku pandula Yehova.

⁸ Panduli Yehova, vilikiyi onduko yaye. Sapuili omanu ovilinga viaye.

⁹ Wimbili ovisungo, wimbili ovisungo viesivayo. Vanguli ovikomo viaye viosi.

¹⁰ Lipandi londuko yaye yi kola. Ovitima viava va sanda Yehova vi yolele.

¹¹ Sandi Yehova longusu yaye. Sandi ocipala caye oloneke viosi.

¹² Ivaluki ovopange aye a linga, a saluisa, lovikomo viaye lolonimbu viomela waye,

¹³ ene ambuto ya Avirahama ukuenje waye, ene amãla va Yakoba, wa noliwi laye.

¹⁴ Eye Yehova Suku yetu. Olonimbu viaye vi li voluali luosi.

¹⁵ Wa ivaluka ocisila caye oloneke viosi. Ondaka a handeleka kohulukãi yovitumbulukila,

¹⁶ a likuminya la Avirahama, a eca ku Isake loku lisinga,

¹⁷ wa yi kolisavo ku Yakoba ndocisila, ku Isareli ndocisila ka ci pui.

¹⁸ Hati, hu iha ofeka ya Kanana, ulilo wocipiñalo cene.

¹⁹ Cina va kaile alume ka va luile, ocili vañamiñami, haivo ovakombe,

²⁰ va tungayala kolofeka, va tunda kuviali u, veya komanu vakuavo,

²¹ eye ka tavele umue oku va linga cĩvi. Ocili, wa pisa olosoma mekonda liavo,

²² hati, Ko ka lambi kolombuavekua viange. Ko ka lingisi ovaprofeto vange.

²³ Imbili Yehova, ene alofeka viosi. Lombololi eyovo liaye eteke keteke.

²⁴ Sapuli ulamba waye kolofeka, ovikomo viaye pokati komanu vosi.

²⁵ Omo Yehova unene, wa posokela esivayo lia piãla, haeye wa posokela esumbilo lia piãla, olosuku viosi ci sule.

²⁶ Momo olosuku viosi violofeka, oviteka viaño. Puãi Yehova wa lulika ovailu.

²⁷ Kovaso aye ku kasi ulamba lunene; vonembele yaye, upami lesanju.

²⁸ Muisi Yehova, ene apata omanu, muisi Yehova ulamba lunene.

²⁹ Muisi Yehova ulamba wa posokela onduko yaye. Neni ocilumba, enjui kovaso aye, fendeli Yehova leposo li kola.

³⁰ Lulumili kovaso aye, alofeka viosi. Oluali laluovo lua kola, ka lu sondoloka.

³¹ Ovailu a sanjuke. Ongongo yi yolele. Va sapule kolofeka vati, Yehova o viala.

³² Okalunga kõle lovina viosi vie yukamo. Ovisenge viulule, la viosi vi kasimo.

³³ Oco oviti viusenge vimba ovisungo vionjolela kovaso a Yehova, momo iya, ha tepela olofeka.

³⁴ Panduli Yehova, momo uwa, omo ohenda yaye ka yi pui.

³⁵ Popi hoti, Tu popele, a Suku yeyovo lietu. Tu ongolole, tu popele kolofeka, ha tu pandula onduko yove yi kola, ha tu ulula loku ku sivaya.

³⁶ Yehova Suku ya Isareli a sivayiwe, tunde ka ku ci toke ka ku ci. Omanu vosi va linga vati, Amene, kuenje va sivaya Yehova.

³⁷ Oco Daviti wa sia Asafe lavangandiaye kovaso yocikasa covisila via Yehova, ha va vumbi kovaso yocikasa, loku linga eteke keteke upange wa va sesamela.

³⁸ Wa siavo Oved Edome lavangandiaye akui epandu lecẽlãla. Oved Edome, omõla a Yedutunu, la Hosa, ovo vakualombundi.

³⁹ Kuenda ocitunda Sadoke la vangandiaye ovitunda, wa va kapa kovaso yotavernakulu ya Yehova, kowulu wa kala ko Giveone,

⁴⁰ ha va lumbaila Yehova ovilumba vioku pia elisi kilu liutala wovilumba vioku pia elisi, omele loñolosi, ndomo muẽle ca sonehiwa vovihandeleko via Yehova, vina a handeleka Isareli.

⁴¹ Kumue lavo kua kala Hemani la Yedutunu, la vakuavo va nõliwa, va tukuiwa kolonduko, ha va imbi olopandu ku Yehova, momo ohenda yaye yenda ño hu.

⁴² Hemani la Yedutunu va kala lolombeta layundu avakuakusika, kuenda ovisikilo viovisungo via Suku. Omala va Yedutunu, ovo vakualombundi.

⁴³ Oco omanu vosi va enda, omunu omunu konjo yaye. Daviti wa tiukila ha sumuluisa onjo yaye.