I ASAPULO 15 - Embimbiliya - Bíblia Sagrada em Umbundu

¹ Daviti wa litungila olonjo vimbo lia Daviti, kuenda wangiliyila ocikasa ca Suku ocitumãlo, wa ci tungila ombalaka.

² Oco Daviti wa popia hati, Lomue wa sesamela oku ambata ocikasa ca Suku, te lika va Lewi, momo ovo Yehova a nola ha vambata ocikasa ca Suku, loku u vumba ño hu.

³ Oco Daviti wongoluila Isareli yosi ko Yerusalãi, ha va kopa ocikasa ca Yehova loku ci nena kocitumãlo caco, cina a angiliya.

⁴ Daviti wongolola va Arone, la va Lewi, vava:

⁵ Po va Kohata, Uriyele, usongui, kumue lavangandiaye ocita lakui avali.

⁶ Po va Merari, Asaya, usongui, kumue lavangandiaye ovita vivali lakui avali.

⁷ Po va Gerisiomo, Yoele, usongui, kumue lavangandiaye ocita lakui atatu.

⁸ Po va Elicafana, Semaya, usongui, kumue lavangandiaye ovita vivali.

⁹ Po va Hevirone, Eliyele, usongui, kumue lavangandiaye akui ecelãla.

¹⁰ Po va Usiyele, Aminadava, usongui, kumue lavangandiaye ocita lekui lavavali.

¹¹ Daviti wa pañinya ovitunda vivali Sadoke la Aviatare kuenda va Lewi ava: Uriyele la Asaya la Yoele la Semaya la Eliyele la Aminadava,

¹² kuenje wa popia lavo hati, Ene vulosekulu viapata a va Lewi. Liyelisi ene lavamanjene, oco vu kope ocikasa ca Yehova, Suku ya Isareli, loku ci nena kocitumãlo nda cangiliyila.

¹³ Omo heneko wa cambateli onjanja yatete, oco Yehova Suku yetu a tu vetela, momo ka tuo sandele ndocihandeleko caye.

¹⁴ Oco ovitunda la va Lewi va liyelisa, ha va kopa ocikasa ca Yehova, Suku ya Isareli.

¹⁵ Va Lewi vambatela ocikasa ca Suku kolomuangaluwa povitai viavo, ndomo Mose a ci handeleka, ndondaka ya Suku.

¹⁶ Daviti wa popia lasongui va va Lewi okuti va sokiye vamanjavo olonjimbi, ha va siki longusu ovisikilo viavo, ovisumba lolohalupa layundu, loku imba lolusale.

¹⁷ Oco va Lewi va tukula Hemani, omõla a Yoele, kuenda povangandiaye va tukulapo Asafe, omõla a Berekiya. Povangandiavo va Merari va tukulapo Etani omõla a Kusiaya.

¹⁸ Kuenda kumue lavo, kua tukuiwa vangandiavo vakuacisoko cavali, Sakariya la Bene la Yaasiyele la Semiramote la Yehiyele la Uni la Eliava la Benaya la Maaseya la Matitiya la Elifele la Mikineya la Oved Edome kuenda Yeyele, vosi yavo vakualombundi.

¹⁹ Hemani la Ssafe la Etani olonjimbi, va kala layundu osipi, ha va a siki longusu.

²⁰ Sakariya la Asiyele la Semiramote la Yehiyele la Uni la Eliava la Maaseya la Benaya, va kala lovisumba viocileñi ca Alamote.

²¹ Kuenda Matitiya la Elifele la Mikineya la Oved Edome la Yeyele la Asasiya, va kala lolohalupa viocileñi ca Seminite, loku songuila ovisungo.

²² Kenaniya, usongui wa va Lewi, eye wa songuila ovisungo. Wa longisa oku imba, momo wa kala luloño waco.

²³ Berekiya la Elikana, ovo vakualombundi viocikasa.

²⁴ Sevaniya la Yosiafata la Netanele la Amasai la Sakanya la Benaya la Eliyesere, ovio ovitunda via sika olombeta kovaso yocikasa ca Suku. Oved Edome la Yehiya, ovo vakualombundi viocikasa.

²⁵ Oco Daviti lovakulu va Isareli, lavakesongo liolohulukãi va enda lonjolela oku kopa ocikasa covisila via Yehova konjo ya Oved Edome.

²⁶ Kuenje omo Suku a kuatisa va Lewi vana vambata ocikasa covisila via Yehova, oco va lumba olonui epanduvali lovitupi epanduvali.

²⁷ Daviti wa wala uwalo wavalatanya. Va Lewi vambata ocikasa, lolonjimbi kuenda Kenaniya, usongui wolonjimbi, vosi yavo haico va wala. Daviti wa walavo efonde liovalatanya,

²⁸ Isareli yosi yambata ocikasa covisila via Yehova, loku ulula, loku totãlisa anguena lolombeta layundu lovisumba lolohalupa.

²⁹ Kuenje, eci ocikasa covisila via Yehova ceya kimbo lia Daviti, Mikale, omõla a Saulu ukãi, wa kala ponjanela loku tala. Yu wa mola soma Daviti o cila loku piluka kuenje wo pembula vutima waye.