I ASAPULO 14 - Embimbiliya - Bíblia Sagrada em Umbundu

¹ Hirama Soma ya Turo wa tuma olomunga ku Daviti. Wa tumavo oviti viovinendele kuenda vakuakusonga ovawe lolokalupindelu, ha vo tungila onjo.

² Daviti wa limbuka okuti Yehova wo vialeka ha lingi Soma ya va Isareli. Wa limbukavo okuti usoma waye wa kemala calua mekonda liomanu vaye va Isareli.

³ Ko Yerusalãi, Daviti wa kuela vali akãi. Daviti wa cita vali omãla valume lomãla vakãi.

⁴ Olonduko viomãla a citila vo Yerusalãi vievi: Siamua la Siovava la Natana la Salomone,

⁵ la Ivehari la Elisua la Elipelete

⁶ la Noga la Nefege la Yafiya,

⁷ la Elisiama la Beliada la Elifelete.

⁸ Eci va Filisiti va yeva okuti Daviti wa wavekua ha lingi Soma kIsareli yosi, oco va Filisiti vosi va tunda ha va sandiliya Daviti. Kuenje Daviti wa ci yeva, yu wa va tundila.

⁹ Va Filisiti veya, va pakasa ocimbota ca Refaimi.

¹⁰ Daviti wa pula Yehova hati, Nundila va Filisiti, ale? O va eca peka liange ale? Yehova wa popia laye hati, Kuende ño momo ndi va eca peka liove.

¹¹ Daviti wa enda ko Baale Perasimi kuenje haiko a va yulila. Daviti wa popia hati, Leka liange Yehova wolumula ovanyali vange ndendunde. Oco ocitumãlo caco va ci tukula vati Baale Perasimi.

¹² Va Filisiti va siako oviteka viavo. Daviti wa tuma oku vi yoka, yu via yokiwa.

¹³ Va Filisiti veya vali, kuenje va pakasa ocimbota ca Refaimi.

¹⁴ Eci Daviti a pula vali Suku, Suku wa popia laye hati, Ku ka lamane. Ñuala konyima yavo. Lisanga lavo kuna ku kasi oviti viamoreira.

¹⁵ Eci o yeva kilu lioviti ondukuso ndokuenda kuasualali, oco tundila ocilunga momo Suku wa livanga kovaso yove ha nyõli olohoka via va Filisiti.

¹⁶ Daviti wa linga ndeci Suku o sapuila, kuenje va nyõla olohoka via va Filisiti tunde ko Giveone toke ko Gesere.

¹⁷ Oluhimo lua Daviti lua sandokaila kolofeka viosi, kuenda Yehova wa yokokisa olofeka viosi kovaso a Daviti.